प्रधानमन्त्रीले भारतसँग पौँठेजोरी खेलेर बिरालोको घाँटीमा घण्टी बाँध्ने काम गरेः मुख्यमन्त्री गुरुङ

प्रधानमन्त्रीले भारतसँग पौँठेजोरी खेलेर बिरालोको घाँटीमा घण्टी बाँध्ने काम गरेः मुख्यमन्त्री गुरुङ

A+ A A-

कोरोना कहरकाबीच गण्डकी प्रदेश सभाको बजेट अधिवेशन सरू भएको छ । विगतका अधिवेशन नदिपुरस्थित प्रदेश सभाको सभाहलमा सञ्चालन हुँदै आएको भए पनि यो वर्ष भने कोरोनाका कारण सामाजिक दूरी कायम गर्नुपर्र्ने भएपछि प्रदेशसभाको बैठक पोखरा सभागृहमा सुरू भएको हो ।

जिर्ण अवस्थामा रहेको पोखरा सभागृहलाई हतारहतारमा मर्मतसम्भाव गरेर अधिवेशन सञ्चालन गर्न मिल्ने बनाइएको हो ।

आइतबारदेखि सरू भएको प्रदेश सभा बैठकमा प्रदेशमा कोरोनाको रोकथामका लागि सरकारको तयारी, लकडाउनले पारेको प्रभाव लगायतका बारेमा प्रमुख प्रतिपक्ष दलका नेता कृष्णचन्द्र नेपाली लगायत सांसदहरूले उठाएका विभिन्न प्रश्नको जवाफ दिँदै गण्डकी प्रदेशका मुख्यमन्त्री पृथ्बिसुब्बा गुरुङले सरकारको तयारीबारे संसदलाई जानकारी गराएका छन् ।

उनले कोरोना नियन्त्रणका लागि प्रदेश सरकार तदारुपताको साथ लागि परेको बताए । मुख्यमन्त्री गुरुङले प्रदेश सरकारको तयारीकै कारण कोरोना नियन्त्रण गर्न सफल भएको बताए । ‘प्रदेशमा कोरोना संक्रमणबाट केही हदसम्म मुक्तिनाथ माताले बचाइन् होला । तर, कोरोनाको संक्रमण फैलिन नदिन प्रदेश सरकारले समेत आवश्यक साबधानी र उपाय अपनाएको छ’, उनले भने, ‘हामीले तयारी गर्दागर्दै पनि बाहिरबाट आएका व्यक्तिहरुको कारण कोरोना महामरीमा ग्रीन जोन कायम गर्न सकिएन ।’

उनले राष्ट्रिय मापदण्ड अनुसारको क्वारेन्टाइन निर्माणको लागि सरकार लागि परेको बताए । मुख्यमन्त्री गुरुङले प्रदेशका विभिन्न जिल्लामा भित्रिनेका लागि आवश्यक क्वारेन्टाइनको अवस्था बुझ्नका लागि विभिन्न जिल्लामा पुगेको बताए ।

उनले अतिक्रमित भूमि फिर्ता गर्ने र राष्ट्रियता जोगाउने अवसर आएको बताए । मुख्यमन्त्री गुरुङले अतिक्रमित भूमि समेटेर नयाँ नक्सा जारी गरेसँगै राष्ट्रियताको लडाईं सुरू भएकोसमेत बताए । लडाईं लामो हुनसक्ने भए पनि अतिक्रमित भूमि फिर्ता नभएसम्म यो लडाई जारी रहने उनको भनाई थियो ।

मुख्यमन्त्री गुरुङले अतिक्रमित भूमि फिर्ता गर्ने अवसर पाएका प्रधानमन्त्री केपी ओली भाग्यमानीसमेत भएको बताए । भारतसँग पौठेजोरी खेलेर विरालोको घाँटीमा घण्टी बाँध्ने काम केपी ओलीले गरेको बताउँदै उनले भने, ‘मृत्युको मुखमा पुगेर बाँचेको केपी ओलीलाई अतिक्रमित भूमि फिर्ता गर्ने अवसर पाएका छन्, यस हिसाबले उनी भाग्यमानी हुन् ।’

उनले गण्डकी प्रदेशमा खाद्यन्न सामाग्रीको आयतनिर्यातमा कुनै पनि समस्या नभएको बताए । मुख्यमन्त्री गुरुङले फागुन मसान्तसम्म सबै योजनाहरू उत्साहको साथ सम्पन्न भएको बताए । उनले केहि योजना लकडाउनको अवधिमा पनि जारी रहेको बताए ।

मुख्यमन्त्री गुरुङले अग्रमोर्चामा खटिएर कामगर्ने कर्मचारीलाई ३० लाखको स्वास्थ्य बिमा गर्ने योजना अगाडि बताएको बताए । उनले गण्डकी प्रदेश विश्व बिद्यालयमार्फत ५ सय बेडको टिचिङ अस्पताल खोल्ने प्रक्रिया अगाडि बढेको बताए ।

नेपाली कांग्रेस संसदीय दलका नेता कृष्णचन्द्र नेपालीले अतिक्रमित भूमि फिर्ताका लागि परिपक्व कुटनीतिमार्फत पहल गर्न सरकारलाई आग्रह गरे । साथै, उनले प्रदेशको आगामी बजेट कोरोना केन्द्रीत गर्न सुझाव दिए ।

राष्ट्रिय जनमोर्चाका कृष्ण थापाले एकल महिला तथा अपाङ्ता भएकाहरुको सामाजिक सुरक्षा भत्ता थप्नुपर्ने बेलामा सरकारले कटौती गरेर गल्ती गरेको भन्दै सच्याउन आग्रह गरे ।

राष्ट्रिय जनता समाजवादी पार्टी संसदीय दलका नेता हरिशरण आचार्यले कोभिड–१९ लाई देखाएर फेरिपनि विकास र समृद्धिमा काम गर्न नसकेको भनेर बस्नुपर्ने अवस्था आएको भन्दै यसमा सुधार ल्याउन आग्रह गरे ।

संसदको अर्को बैठक मंगलबार दिउँसो १ बजे बस्ने सभामुख नेत्रनाथ अधिकारीले जानकारी दिए ।

प्रकाशित मिति: आइतबार, जेठ ११, २०७७ २०:३९