सुदूरपश्चिमका कोरोना संक्रमित : सरकारी कर्मचारीदेखि हत्या आरोपीसम्म

A+ A A-

सुदूरपश्चिम प्रदेशमा ४० दिनपछि ५ जनामा एकै दिन कोरोना भाइरसको संक्रमण पुष्टि भएको छ । यसअघि १ वैशाखमा कैलालीको लम्कीकी १ वृद्धमा कोरोना भाइरस संक्रमण देखिए यता सुदूरपश्चिममा नयाँ संक्रमित देखिएका थिएनन् ।

सुदूरपश्चिममा पहिलो पटक पहाडी जिल्लामा पनि कोरोना संक्रमण देखिएको छ । शुक्रबार कोरोना भाइरस संक्रमण पुष्टि भएकाहरूमा कैलालीका ३, डडेल्धुराका १ र बैतडीमा १ जना रहेका छन् ।

बाह्य जिल्लाबाट आएका थिए कैलालीका ३ संक्रमित

कैलालीको जानकी गाउँपालिका-४ का संक्रमित जेठ १ गते भारतबाट आएका थिए । उनीसँगै ३ जना आएको भए पनि अन्य २ जनामा भने संक्रमण नदेखिएको वडा अध्यक्ष गगनसिंह चौधरीले बताए । उनका अनुसार भारतको महाराष्ट्रबाट आएका उनीहरू कैलालीको कालाकुण्डा नाकाबाट भित्रिएका थिए ।

कालाकुण्डाबाट लुकीछिपि आउने क्रममा संक्रमण देखिएका युवालाई प्रहरीले घर पुग्नुअघि नै पक्राउ गरेर जानकी गाउँपालिका-१ मा रहेको सरस्वती माविको क्वारेन्टाईनमा राखेको वडा अध्यक्ष चौधरीले बताए । उनले अन्य २ जनालाई पनि घरमा पुग्ने बित्तिकै प्रहरीले पक्राउ गरी क्वारेन्टाइनमा राखेको थियो ।

यस्तै, जानकी गाउँपालिका ७ मा केरोना संक्रमण देखिएका २ जना पनि बाह्य जिल्लाबाट आएका थिए । संक्रमितमध्ये २३ वर्षीय पुरुष इटहरीबाट आएका थिए भने २६ वर्षीय पुरुष बाँकेबाट आएका थिए । सरस्वती माविकै क्वारेन्टाइनमा रहेका उनीहरूमध्ये बाँकेबाट आएका युवक जेठ ३ गते र इटहरीबाट आएका युवक वैशाख ३० गते आएको वडा अध्यक्ष लक्ष्मण चौधरीले बताए । उनले संक्रमित दुवै जना सरस्वती माविकै क्वारेन्टाइनमा रहेको बताए ।

२ संक्रमितलाई घरबाटै ल्याइएको थियो क्वारेन्टाइनमा, गाउँ घुमेका थिए

कैलालीका २ जना कोरोना संक्रमितलाई घरबाटै क्वारेन्टाइनमा ल्याइएको खुलेको छ । बाँके र इटहरीबाट फर्किएका २ जना संक्रमित लुकीछिपी घरमै बसेको सूचना पाएपछि जानकी गाउँपालिकाले प्रहरी लगाएर क्वारेन्टाइमा ल्याएको खुलेको हो ।

जानकी गाउँपालिका-७ का २ जना संक्रमितमध्ये १ जना इटहरी र १ जना बाँकेबाट फर्किएका थिए । जानकी गाउँपालिकाकी उपाध्यक्ष उमा महतोले उनीहरू दुवै जनालाई घरबाटै क्वारेन्टाइनमा ल्याएर स्वाब सकलन गरिएको बताइन् ।

उपाध्यक्ष महतोले भनिन, ‘इटहरीबाट आएका युवक बैशाख ३० गते जानकी गाउँपालिका पुगेका थिए भने अर्का सक्रमित युवक बाँकेबाट जेठ ३ गते कैलाली पुगेका थिए । क्वारेन्टाइन लानुअघि एक जना ४ दिन र १ जना एक दिन घरमै बसेका थिए । सो समयमा उनीहरू गाउँमा घुमेको पनि जानकारी आएको छ ।’

उनका अनुसार गाउँपालिकाले क्वारेन्टाइनमा बस्न आग्रह गर्दा नमानेपछि दुवै जनालाई प्रहरीको सहयोगमा सरस्वती माविको क्वारेन्टाइनमा राखिएको थियो । जानकी गाउँपालिकाकै अर्का संक्रमित भने भारतबाट आएका थिए ।

उनलाई नाकाबाटै क्वारेन्टाइनमा राखिएको थियो । गाउँपालिकाको वडा नम्बर ४ र ७ का १९, २३ र २६ वर्षीय युवकमा कोरोना पुष्टि भएको थियो । संक्रमित तीनैजनालाई अहिले टीकापुर अस्पतालको आइसालेसनमा राखिएको छ ।

संक्रमितको सम्पर्कमा आएका व्यक्तिको खोजी सुरु

कैलालीमा थप तीन कोराना संक्रमित देखिएसँगै उनीहरूसँग सम्पर्कमा आएका व्यक्तिको खोजी सुरु गरिएको छ । जानकी गाउँपालिकाको सरस्वती माविको क्वारेन्टाइनमा रहेका ३ युवामा कोरोना संक्रमण पुष्टि भएसँगै उनीहरूसँग सम्पर्कमा आएकाहरूको खोजी सुरु गरिएको स्वास्थ्य शाखा प्रमुख जीतबहादुर चौधरीले बताए ।

‘हामीले इलाका प्रहरी कार्यालय टीकापुरसँग समन्वय गरी सम्पर्कमा आएकाहरुको खोजी सुरु गरेका छौँ’, चौधरीले भने। गाउँपालिका वडा नम्बर ४ र ७ का उनीहरू भारतको महाराष्ट्र, नेपालगञ्ज र इटहरीबाट आएको बताइएको छ ।

भारतबाट आएका संक्रमित यही जेठ १ गते कैलालीको सत्ती भन्सार नाका हुँदै जानकी गाउँपालिका पुगेका थिए । त्यस्तै, इटहरीबाट आएका युवक गत वैशाख ३० गते र नेपालगञ्जबाट आएका युवक जेठ ३ गते गाउँपालिका पुगेको जानकी गाउँपालिकाका स्वास्थ्य संयोजक चौधरीले जानकारी दिए । संक्रमितलाई क्वारेन्टाइनमा राखिएको थियो ।

संक्रमितको सम्पर्कमा आएका व्यक्तिको खोजी सुरु गरिएको इलाका प्रहरी कार्यालय टीकापुरका प्रहरी प्रमुख मनोहरप्रुसाद भट्टले जानकारी दिए । टीकापुर नगरपालिकासँग प्रत्यक्ष सीमा जोडिएको हुँदा टीकापुर नरगपालिकामा पूर्ण सतर्कता अपनाइएको छ ।

टीकापुर नगरपालिकाका प्रमुख तपेन्द्र बहादुर रावलले छिमेकी पालिकामा संक्रमण देखिँदा नगरपालिकामा उच्च जोखिम रहेको बताउँदै आवागमनलाई पूर्णरुपमा निषेध गर्ने विषयमा छलफल गरिने जानकारी दिए ।

कैलालीको मोतीनगर र जवलपुर सिल

जिल्लाको जानकी गाउँपालिकामा कोरोना संक्रमित देखिएपछि प्रशासनले कैलालीको टीकापुरमा लकडाउनमा कडाइ गरेको छ । जानकी गाउँपालिकासँग टीकापुर जोडिएको पालिका हो । जानकीमा सङ्क्रमित देखिएपछि टीकापुरमा थप जोखिम बढेको छ । टीकापुर पनि जोखिममा रहेको भन्दै टीकापुर बजार बन्द गरिने तयारी प्रशासनले गरेको छ ।

टीकापुर बजारमा मानिसको आवतजावत पूर्णरूपमा बन्द गरिने टीकापुरका प्रहरी नायब उपरीक्षक मनोहरप्रसाद भट्टले जानकारी दिए । संक्रमित आएर गाउँमा समेत बसेकाले जानकी गाउँपालिका-७ को मोतीनगर र जवलपुर गाउँ सिल गरिएको उनले जानकारी दिए ।

संक्रमण पुष्टि भएका जानकीको मोतीनगर र जवलपुरका २ युवामध्ये मोतीनगरका युवाको टीकापुर र मोतिनगरमा धेरै मानिससँग सम्पर्क भएको देखिएको भट्टले बताए ।

टीकापुर अस्पतालमा उपचार सुरु

संक्रमित तीनै जनाको टीकापुर अस्पतालको आइसोलेसनमा राखेर उपचार सुरु भएको छ । संक्रमित सबैको अवस्था सामान्य छ । टीकापुर अस्पतालमा १२ शय्याको आइसोलेसन वार्ड छ ।

अवस्था जटिल भए बाहिर पठाउन सकिने भए पनि अहिले टीकापुरमै उपचार थालिने अस्पतालका डा. जितेन्द्र कँडेलले बताए ।

जानकी गाउँपालिकाको क्वारेन्टिनमा ४५ जना थिए । तीन जनामा सङ्क्रमण देखिएपछि क्वारेन्टिनमा बसेका, उनीहरूको सुरक्षा, रेखदेखमा खटेका सबैको स्वास्थ्य परीक्षण गरिने गाउँपालिकाका स्वास्थ्य शाखा संयोजक जीत बहादुर चौधरीले जानकारी दिए ।

बैतडीका संक्रमित २ महिनाअघि भारतबाट आएका थिए

बैतडीको शिवनाथ गाउँपालिका १ का कोरोना संक्रमण देखिएका २२ वर्षीय पुरुष २ महिना पहिले भारतबाट आएका थिए । शिवनाथ गाउँपालिकाका अध्यक्ष कर्ण सिह साउँदले भारतबाट उनी चैत्र महिनामै आएको बताए । उनले संक्रमित युवा स्थानीय १ युवतीको हत्या आरोपमा १५ वैशाखदेखि नै जिल्ला प्रहरी कार्यालयको नियन्त्रणमा रहेको बताए ।

‘भारतबाट आएको धेरै समय भइसकेको छ । उनलाई कहाँबाट कोरोना संक्रमण भयो भन्ने बारेमा अनुसन्धानमै छौँ’ उनले भने ‘अहिले उनको परिवारलाई होम क्वारेन्टाइनमा बस्न लगाउँदै छौँ ।’

डडेल्धुराका सक्रमित सरकारी कर्मचारी

डडेल्धुरामा कोरोना संक्रमण देखिएका २८ वर्षीय पुरुष परशुराम गाउँपालिका १० का हुन् । उनी भने डडेल्धुराकै एक सरकारी कार्यालयमा काम गर्ने कर्मचारी रहेको वडा नम्बर १० का वडा अध्यक्ष हर्क बहादुर कार्कीले बताए ।

उनले संक्रमित व्यक्ति डडेल्धुरा सदरमुकाममै बस्ने गरेको बताए । पछिल्लो पटक चैत्र १४ गते आफ्नो घर परशुराम गाउँपालिका १० मा गएका उनी वैशाख २८ गते सदरमुकाम फर्किएको अध्यक्ष कार्कीले बताए ।

उनले अहिले संक्रमितको परिवारलाई क्वारेन्टाइनमा राख्ने तयारी भइरहेको बताए । संक्रमित युवक केही दिनअघि स्वास्थमा समस्या देखिएपछि अस्पताल भर्ना भए पनि उनी निको भएर घर फकिएका थिए । सोही क्रममा उनको जिल्ला अस्पताल डडेल्धुरामा स्वाव संकलन गरिएको थियो ।

शुक्रबार संक्रमित देखिएका सबैको धनगढीको कोरोना प्रयोगशालामा कोरोना परिक्षण गरिएको हो । सुदूरपश्चिममा यसअघि ५ जना कोरोना संक्रमित देखिएकोमा पाँचौ जना निको भएर घर फर्किसकेका छन ।

५ संक्रमितको ३ जिल्लामा उपचार हुँदै

४० दिनपछि सुदूरपश्चिम प्रदेशमा कोरोना भाइरसका नयाँ संक्रमित भेटिएपछि उनीहरूलाई सम्बन्धित जिल्लामै उपचार सुरु गरिएको छ । शुक्रबार एकै दिन सुदूरपश्चिमका तीन जिल्लाका ५ जनामा कोरोना पुष्टि भएपछि उनीहरूलाई अस्पतालको आइसोलेसनमा राखी उपचार सुरु गरिएको हो ।

सबै संक्रमितलाई सेती प्रादेशिक अस्पतालमा ल्याउने तयारी भए पनि उनीहरूको स्वास्थ्य अवस्था सामान्य भएकाले सम्बन्धित क्षेत्रकै अस्पतालमा भर्ना गरिएको छ ।

कैलालीका ३ जना संक्रमितलाई टीकापुर अस्पताल, डडेल्धुराका २८ वर्षीय संक्रमितलाई पनि डडेल्धुरा अस्पतालकै आइसोलेसनमा र बैतडीका संक्रमितलाई पनि जिल्ला अस्पतालमै राखिएको छ ।

प्रकाशित मिति: शनिबार, जेठ १०, २०७७ १२:४६