पर्सामा असुरक्षित बन्दै मिर्गौला बिरामी, १ महिनामै ७ जनाको मृत्यु

A+ A A-

पर्सामा मिर्गौला बिरामी असुरक्षित बन्दै गएका छन् । १ महिनामा ७ जनाले ज्यान गुमाएपछि मिर्गौलाका बिरामी असुरक्षित बन्दै गएका हुन् । ज्यान गुमाउने सबैले नेशनल मेडिकल कलेजमा उपचार गराइरहेका थिए ।

कोभिड–१९ अस्पताल बनाइएपछि नारायणी अस्पतालमा मिर्गौला रोगीको डायलासिस सेवा बन्द गरिएको छ । नारायणी अस्पतालबाट स्थानान्तरण गरी मडिकल कलेजमा डायलासिस गराउन थालिएको छ ।

सरकारले कोभिड–१९ अस्पताल बनाएपछि नारायणी अस्पतालमा नियमित डायलासिस सेवा लिँदै आएका ४० बिरामीलाई अस्पतालले सरकारी दर रेटमै सेवा पाइने भन्दै मेडिकल कलेजमा पठाएको थियो । नारायणी अस्पतालले मेडिकल कलेजमा डायलासिस सेवाका लागि स्थानान्तरण गरेका ४० जनामध्ये ७ जना मिर्गौला रोगीको मेडिकल कलेजमा डायलासिस गराउने क्रममै मृत्यु भएको हो ।

मृत्यु हुनेहरूमा वीरगन्ज १२ मुर्लीकी ४५ वर्षीय नाशरिन बानो, वीरगन्ज १५ लक्ष्मणवाका ६० वर्षीय नागेन्द्र झा, पर्सा भौराटारका २४ वर्षीय कृष्ण ठाकुर, रौतहट गौरकी ५० वर्षीय तलबुन नेशा, बारा अमवाका ६० वर्षीय नन्दलाल महत्तो, सर्लाहीका ३५ वर्षीय अजय कार्की र रौतहट गौरका रन्जित मण्डल रहेका छन् ।

७ हप्तामा ७ जना मिर्गौला रोगीको मृत्यु भएको मेडिकल कलेजमै आफ्नी आमा कृष्णा देवीको डायलासिस गराइ रहेका वीरगन्ज ३ प्रगतिनगरका राम विश्वास कुशवाहाले बताए ।

‘नारायणीले मेडिकलमा पठाएको ७ हप्तामा ७ जनाको मृत्यु भइसकेको छ’, उनले भने, ‘यसले अरू मिर्गौला रोगी पनि त्रसित भएर अवस्था जटिल बन्दै गएको छ ।’ पूर्वाधार अभावमा ४० जना बढी विरामीलाई डाइलोसिस गर्नुपर्ने भएकोले मेसिनलाई तीब्र गतिमा चलाउनुको साथै एउटै मेसिनमा १ दिनमा १० जनालाई डाइलोसिस गरेको कारण विरामीहरूले ज्यान गुमाउनु परेको विरामीकाको आफन्तको आरोप छ ।

नारायणी अस्पताललाई पुनः जनरल अस्पताल नै बनाउनुपर्ने भनेर आन्दोलन भए पनि त्यो कागजमा मात्रै सीमित रहँदा डाइलोसिस सेवा लिई रहेका विरामीहरूले समस्या भोगिरहेका बिरामीको गुनासो छ ।

कोरोनाको महामारी फैलिरहेको अवस्थामा वीरगञ्जस्थित कुनै अस्पतालले कोरोना अस्पताल बनाउन नमानेपछि संघीय सरकारले नारायणी अस्पताललाई कारोना अस्पताल घोषणा गरेपछि आकस्मिकसहित सम्पूर्ण सेवा बन्द गरिएको थियो ।

नारायणी अस्पताललाई कोरोना अस्पताल बनाउने संघीय सरकारले गरेको निर्णयलाई मध्यनजर गर्दै अस्पताल प्रशासनले २ वैशाखमा सार्वजनिक सूचना टाँस गर्दै सोही दिनदेखि अस्पतालको सम्पूर्ण सेवा बन्द भएको र यहाँबाट पाउने सम्पूर्ण सेवाहरु नेशनल मेडिकल कलेजबाट लिने भनेर जानकारी गराएको थियो ।

सरकारको उक्त निर्देशनपछि नारायणीमा नियमित डायलासिस सेवा लिंँदै आएका ४० मिर्गौला रोगीलाई सेवाका लागि मेडिकल कलेजमा सारिएको थियो । तीमध्ये ७ जनाको मृत्यु भएपछि अहिले पनि मेडिकल कलेजमा ३४ जनाले डायलासिस गराउँदै आइरहेका छन् ।

नारायणीबाट मेडिकलमा पठाइएका ४० मध्ये वीरगन्ज मुर्लीकी नाशरिन बानोको मेडिकल कलेजमै डायलासिस गराइरहेकै अवस्थामा ९ वैशाखमा मृत्यु भएको थियो । त्यसयता जेठ पहिलो हप्तासम्म बानोसँगै ७ जनाको मृत्यु भएको छ ।

नारायणी अस्पतालबाट मेडिकल कलेजमा स्थानान्तरण गरिएका मिर्गौला रोगीहरूको डायलासिस गर्ने क्रममा चरम लापरवाही गरिएका कारण रोगीहरूले ज्यान गुमाइरहेका आफन्तको आरोप छ । ‘डायलासिसका लागि हामीलाई साँझ ५ नै बोलाउँछन् । तर ५–६ घण्टा कुराएर राखेपछि राति ११–१२ तिर मात्रै डायलासिस मेसिनमा जोड्छन्’, कुशवाहाले भने, ‘त्योभन्दा पहिले मेडिकलले शुल्क तिर्ने बिरामीको डायलासिस गर्छन् , उनीहरुको पालो सकिएपछि मात्रै हामी निःशुल्कवालाको पालो आउँछ ।’

कुशवाहाका अनुसार नारायणी अस्पतालमा एउटा डायलोजरबाट डायलासिस हुने गरेकोमा मेडिकल कलेजमा भने एउटै डायलोजरबाट १० पटकसम्म डायलासिस गर्ने गरिएको छ । उनले भने, ‘नारायणीबाट पठाइएका रोगीलाई निःशुल्क सेवा दिनु पर्ने हुन्छ त्यसैले बिरामीलाई मेसिनमा जोडेपछि हतार गरेर रगत पम्पिङ गर्ने स्पिड पनि बढाइ दिन्छन् ।’

नेपाल सरकारले विपन्न नागरिक कार्यक्रम अन्तर्गतप्रति बिरामीले एक पटक डायलासिस गरेबापत नेशनल मेडिकल कलेजलाई २ हजार ५ सय रुपैयाँसमेत दिने गरेको छ । त्यसबाहेक डायलोजर र आवश्यक केमिकलसमेत मेडिकल कलेजलाई नेपाल सरकारले सित्तैमा दिने गरेको नारायणी अस्पतालका मेसु डाक्टर मदन उपाध्यायले जानकारी दिए ।

मेडिकल कलेजका निर्देशक डा. प्रमोद सर्राफले भने डायलासिस सेवामा कुनै लापरवाही नगरिएको दाबी गरे । कलेजमा रहेका १० वटा डायलासिस मेसिनको क्षमता ४० जना बिरामीलाई सेवा दिने रहेको भए पनि पछिल्लो समय ९० जना बिरामीलाई सेवा दिनुपर्ने बाध्यता रहेको उनले बताए । ‘क्षमताभन्दा बढी बिरामी भएपछि हारगुहार गरेर प्राविधिक र स्वास्थ्यकर्मीलाई काममा खटाएका छौँ’, उनले भने, ‘अस्पतालबाट कुनै पनि लापरवाही भएको छैन ।’

प्रकाशित मिति: शनिबार, जेठ १०, २०७७ ११:२२