चलचित्र विकास बोर्डको अध्यक्षका लागि भीमा मैनालीले दिइन् आवेदन

A+ A A-

चलचित्र विकास बोर्डको रिक्त अध्यक्ष पदका लागि नेपाल सरकारले दरखास्त आह्वान गरेकोमा १ महिलासहित ९ जना चलचित्रकर्मीहरूले आवेदन दिएका छन् ।

तत्कालीन अध्यक्ष केशव भट्टराईको गत २९ मंसिरमा निधन भएपछि सो पद रिक्त रहँदै आएको थियो ।

सञ्चार तथा सूचना प्रविधि मन्त्रालयले प्रतिस्पर्धात्मक प्रक्रियाबाट अध्यक्ष नियुक्तिका लागि आवेदन माग गरेको हो । सो पदका लागि महिलातर्फबाट भगवतीकुमारी मैनाली उप्रेती (भीमा) ले पनि आदेवन दिएकी छन् । लामो समयदेखि चलचित्रको क्षेत्रमा लागेकी उनी अध्यक्ष पदका लागि आफू योग्य भएको दाबी पनि गरेकी छन् ।

उनी भन्छिन्– ‘चलचित्र क्षेत्रमा लागेको धेरै समय भयो । चलचित्र विकास बोर्डको अध्यक्ष भई चलचित्रको विकासमा महत्त्वपूर्ण भूमिका खेल्ने प्रतिवद्धताका साथ मैले आवेदन पेस गरेकी छु ।’

सानैदेखि विद्यार्थी राजनीतिमा रही विभिन्न सांस्कृतिक तथा सचेतनामूलक कार्यक्रमहरूमा सक्रिय रहँदै तत्कालीन अनेरास्ववियूका विभिन्न कमिटीमा रहेर कार्य गरिसकेकी छन् । उनले २०५४ सालमा मकवानपुरबाट तत्कालीन नेपाल कम्युनिस्ट पार्टी (एमाले) कोे संगठित सदस्यता लिएकी थिइन् भने पार्टीको पक्षमा निरन्तर उभिँदै आएको पनि देखिन्छ ।

जनसांस्कृतिक महासंघअन्तर्गत रही पार्टी महाधिवेशनलगायत पार्टीका विभिन्न सांस्कृतिक कार्यक्रम र सचेतनामूलक कार्यक्रम गर्दै पार्टीको संगठन विस्तारमा समेत लागिपरेर काम गरिसकेको अनुभव छ उनमा ।

दुई दशकभन्दा लामो समयदेखि स्वदेशी तथा विदेशी चलचित्रहरूमा कलाकार, लेखक, निर्देशक भई काम गरिसकेकी उनले समाजशास्त्रमा स्नातकोत्तर तथा ओस्कार इन्टरनेसनल कलेजबाट चलचित्र लेखन तथा निर्देशनमा स्नातकसम्मको अध्ययन गरेकी छन् ।

हाल ललितपुर जिल्लामा जनसांस्कृतिक महासंघको संयोजक र जनपक्षीय चलचित्रकर्मी संघको केन्द्रीय सदस्य भई काम गर्दै आएकी उनी चलचित्र क्षेत्रमा काम गरेको अनुभव तथा चलचित्र विकास बोर्डले गत वर्ष अध्यक्ष पदका लागि मागेको आवेदनमा समेत उत्कृष्ट कार्ययोजना प्रस्तुत गरेकी थिइन् । जसका कारण उनलाई यस पटकको अब्बल आवेदकका रूपमा लिइएको छ ।

वरिष्ठ कलाकार नीर शाह भन्छन्, ‘चलचित्र विकास बोर्डले तोकेको मापदण्डअनुरुप भीमाजीले अवसर पाउनुपर्छ ।’

त्यस्तैगरी, अन्य कलाकारहरू मिश्री थापा, कविता आले, मिथिला शर्मा, रमा थपलिया, शारदा गिरी, मेनुका प्रधान तथा यादव खरेललगायतले पनि भीमा नै बोर्डको अध्यक्ष पदका लागि दाबेदार उम्मेदवार रहेको बताएका छन् ।

भीमा भन्छिन्, ‘हामीलाई महिला नेतृको आवश्यकता छ । हाम्राभन्दा पनि राम्राले अवसर पाउनुपर्छ भन्दै केही कलाकर्मी तथा अग्रजहरूले सहयोग र हौसला दिनुभएको छ । यसले मलाई थप ऊर्जा मिलेको छ ।’

प्रकाशित मिति: शनिबार, जेठ १०, २०७७ १२:००