सुदूरपश्चिममा बढ्यो कोरोना जोखिम : ४ दिनमा परीक्षणबिनै ३ हजार भित्रिए

A+ A A-

सुदूरपश्चिम प्रदेशमा ४ दिनमा कैलालीको गौरीफन्टा नाकबाट मात्रै ३ हजार २ सयभन्दा बढी नेपाली भित्रिएका छन् । चैत्र २ र ३ गते ९ सय ५०, ७ गते ८ सय ५८ र ८ गते २ हजार ४ सय ९८ जनाको उद्धार गरिएको जिल्ला प्रशासन कार्यालय कैलालीले जनाएको छ ।

२ र ३ गते भित्रिएका ९ सय ५० जनाको भने र्‍यापिड टेस्ट गरिएको थियो । महाराष्ट्रबाट आएका ६१ जनाको पीसीआर परीक्षणसमेत गरिएको थियो । तर, ७ गते आएका ८ सय ५८ जनालाई र्‍यापिड टेस्टसमेत नगरी गाउँ पठाइएको छ । ८ गते आएका २ हजार ४ सय ९८ जनामध्ये ६ सय जनाको मात्रै परीक्षण गरिएको जनाइएको छ ।

४ दिनको अवधिमा झण्डै ३ हजार नेपाली परीक्षणबिनै नै गौरीफन्टा नाकाबाट भित्रिएका छन् । तर, अधिकासंको कोरोना भाइरस संक्रमण परीक्षण भने हुन सकेको छैन् ।

परीक्षणबिनै उद्धार, समुदायमा कोरोना संक्रमण फैलिने जोखिम

जनप्रतिनिधिको दबाबमा भारतका विभिन्न शहरबाट आएका नागरिकलाई कोरोना भाइरसको परीक्षण नै नगरी धमाधम नेपाल प्रवेश गराइँदैछ । भारतममा ठूलो संख्यामा नेपाली छन् र ती आउँदै छन् भन्ने जानकारी हुँदाहुँदै पनि तीनै तहका सरकार यसप्रति गम्भीर देखिएका छैनन् ।

भारतका विभिन्न ठाउँबाट हजारौँ नागरिक सीमानजिक आउन थालेपछि चुनौती थपिएको छ । तर, त्यसका लागि स्थानीय, प्रदेश र संघीय सरकारको तयारी नहुँदा संक्रमणको जोखिम बढेको छ ।

पूर्वतयारीबिनै उनीहरूलाई नेपाल प्रवेश गराइएको छ । जसका कारण स्थानीय प्रशासनका अधिकारी पनि तनाबमा छन् । श्रोतका अनुसार स्थानीय प्रशासन र सुरक्षा अधिकारीले परीक्षणबिनै भारतबाट नागरिक ल्याउँदा जोखिम बढने बताए पनि जनप्रतिनिधिको दबाबमा उनीहरूलाई नेपाल प्रवेश गराइएको हो ।

भारतका विभिन्न क्षेत्रबाट आएका करिब ३ हजार बढी नागरिकलाई धनगढीको गौरीफन्टा नाकाबाट स्वदेश प्रवेश गराइएको हो । भारतको दिल्ली, ममहाराष्ट, गुजरात राजिस्थान, हरियाणालगायतका विभिन्न शहरबाट बस रिर्जभ गरेर आएका उनीहरूले नेपाल-भारत नाकामा स्वदेश प्रवेशको माग गर्दै प्रदर्शन गरेपछि अबेर स्थानीय प्रशासनले नेपाल प्रवेश गराएको थियो ।

उनीहरूलाई केही स्थानीय तहले बस, टिपर र ट्याक्टरमा राखेर आफ्नै क्षेत्रमा लगेर क्वारेन्टइनमा राखेका छन भने कतिपय सवारी साधन नपाएपछि धनगढीका विभिन्न विद्यालयमा बसेका छन् । आएका मध्ये धेरै जसो सुदूरपश्चिमका अन्य देशका विभिन्न जिल्लाका छन् ।

यसैबीच कैलालीसँग जोडिएको पलियामा रहेका थप १ हजार जनालाई आज स्वदेश प्रवेश गराइँदैछ । भारतका विभिन्न ठाउँबाट हजारौँ नागरिक सीमानजिक आउन थालेपछि चुनौती थपिएको छ । तर, त्यसका लागि स्थानीय, प्रदेश र संघीय सरकारको तयारी नहुँदा संक्रमणको जोखिम बढेको छ ।

सुदूरपश्चिमसँग जोडिएका भारतीय जिल्लामा लकडाउन खुकुलो भएपछि नेपाली स्वदेश आउन लागेका हुन् । हजारौँको उद्धार भए पनि सयौँको मात्रै परीक्षण भएको छ । भारतमा सबैभन्दा बढी संक्रमित रहेको महाराष्ट्रबाट आएका मजदुरको समेत परीक्षण हुन सकेको छैन् ।

स्थानीय प्रशासनले उद्धारका लागि समन्वय गरे पनि स्थानीय र प्रदेश सरकारले परीक्षणको व्यवस्थापन गर्न नसक्दा समस्या भएको कैलालीका प्रमुख जिल्ला अधिकारी यज्ञराज बोहराले बताए। । ‘ठूलो संख्यामा नेपालीको उद्धार गरेका छौँ,’ उनले भने, ‘किट नै नपाएपछि परीक्षणबिनै भित्र्याउन पर्ने बाध्यता रहेको छ ।’

परीक्षणका लागि स्थानीय र प्रदेश सरकारसँग समन्वय भए पनि सबैको परीक्षण हुन नसकेको उनले बताए । प्रदेश सरकारले पनि किटको अभाव रहेको जनाएको छ । प्रदेश स्वास्थ्य निर्देशक डाक्टर गुणराज अवस्थीले किट अभाव रहेको स्वीकार गरे । उनले र्‍यापिड किटका लागि स्वास्थ्य मन्त्रालयका र विभागसँग समन्वय भइरहेको बताए ।

१४ जिल्लाका ३ सय १९ नेपाली दार्चुलबाट भित्रिए

यसैगरी, भारतमा मजदुरी गर्न गएका १४ जिल्लाका नेपालीको उद्धार गरिएको छ । दार्चुला र धार्चुला जोड्ने झोलुंगे पुल भएर बिहीबार ३ सय १९ जना मजदुरको उद्धार गरिएको हो ।

बन्दाबन्दीका कारण भारतमा अलपत्र परेका नागरिकलाई दुवै जिल्ला (दार्चुला र पिथौरागढ) का जिल्ला अधिकारीबीच भएको सहमतिअनुसार नेपाली मजदुरको उद्धार गरिएको हो । भारतको दिल्लीदेखि पिथौरागढका विभिन्न शहरमा मजदुरी गर्न गएका नेपालीलाई बिहान झोलुंगे पुल खुलाएर उद्धार गरिएको सहायक प्रमुख जिल्ला अधिकारी टेकसिह कुवरले जानकारी दिए ।

जिल्ला प्रहरी कार्यालय दार्चुलाका सूचना अधिकारी सुरेन्द्र प्रसाद जोशीका अनुसार दार्चुलाका १२२ जना, कैलाली ३, कञ्चनपुर ६, जुम्ला २१, अछाम ५, सुर्खेत ५५, दैलेख २८, डोटीका ७, बैतडीका ३९, हुम्ला १, रुकम ३, बझाङ १४, बाके ९, र रामेछाम ६ जनाको उद्धार गरिएको छ । उद्धार गरिएका विभिन्न जिल्लाका नागरिकलाई सदरमुकाम खलंगाको खुलामञ्चमा राखिएको छ ।

अस्पतालको आइसोलेसन वार्ड भरियो

कोरोना शंकास्पद बिरामीले सेती अस्पतालको आइसोलेसन वार्ड भरिएको छ । भारतबाट फर्किएका १९ जना कोरोना संक्रमणको आशंकामा सेती प्रादेशिक अस्पतालमा भर्ना भएसँगै आइसोलेसन वार्ड बिरामीले भरिएको हो ।

भारतबाट आएका १९ जना थपिएपछि २४ शैयाको आइसोलेसन वार्डमा २३ जना कोरोना शंकास्पद बिरामीको संख्या पुगिसकेको छ । सीमा क्षेत्रमा गरिएको र्‍यापिड टेस्टमा पोजेटिभ देखाएका र कोरोनासँग मिल्ने लक्षण भएका १९ जनालाई सेती प्रादेशिक अस्पतालको आइसोलेसनमा भर्ना गरिएको हो ।

बझाङको जयपृथ्वी नगरपालिका-३ का २१ वर्षीय पुरुष, वडा नम्वर ११ का २३ वर्षीय पुरुष, डोटीको दीपालय सिलगढी नगरपालिकाका २८ वर्षीय पुरुष, बडिकेदार गाउँपालिका ५ का १८ वर्षीय युवक, डडेल्धुराको पर्शुराम नगरपालिकाका २७ वर्षीय युवक र कञ्चनपुरको पुनरवास नगरपालिका-५ का २८ वर्षीय युवकलाई प्रादेशिक अस्पतालको आइसोलेसनमा भर्ना गरिएको हो ।

यस्तै, बैतडीको मेलौली नगरपालिका-४ का ३३ वर्षीय पुरुष, सोही ठाउँका १९ वर्षीय युवक, २३ वर्षीय युवक, शिवनाथ गाउँपालिकाका २७, २४, २२, २०, ३०, २० वर्षीय पुरुषलाई अस्पतालको आइसोलेनमा भर्ना गरीएको हो । यस्तै, अछामको मेल्लेख ४ का ३० वर्षीया महिला, ११, ४ वर्षीय बालक र ३२ वर्षीय पुरुषलाई पनि भर्ना गरिएको सेती प्रादेशिक अस्पतालका सूचना अधिकारी दिलीप कुमार श्रेष्ठले जानकारी दिए ।

उनका अनुसार योसँगै कोरोनाको आशंकामा प्रादेशिक अस्पतालको आइसोलेसनमा भर्ना भएका बिरामीको संख्या २३ पुगेको छ । यसअघि बैतडीका १ जना र धनगढीका ३ जनालाई पनि कोरोना आशंकामै प्रादेशिक अस्पतालको आइसोलेसनमा भर्ना गरिएको थियो ।

प्रकाशित मिति: शुक्रबार, जेठ ९, २०७७ १३:४२