३५ दिनयता सुदूरपश्चिममा कोरोना संक्रमितको संख्या शून्य

फाइल तस्वीर

A+ A A-

सुदूरपश्चिम प्रदेशमा पछिल्ला ३५ दिनयता कोरोना भाइरस संक्रमित फेला परेका छैनन् । देशका विभिन्न जिल्लामा पछिल्ला केही दिनयता कोभिड–१९ का संक्रमितको संख्या दिनहुँ बढी रहे पनि सुदूरपश्चिममा भने सो अवधिमा संक्रमित फेला नपरेका क्षेत्रीय स्वास्थ्य सेवा निर्देशनालय दिपायल राजपुरले जनाएको छ ।

संक्रमित फेला नपरे पनि पछिल्लो समय भारतबाट सुदूरपश्चिमका विभिन्न नाकाबाट भित्रिन लागेका नागरिकका कारण कोरोनाको उच्च जोखिममा रहेको स्वास्थ्यकर्मी बताउँछन् । यहाँका कैलाली, कञ्चनपुर, दार्चुला र बैतडी नाकाबाट नागरिक भित्रिन थालेपछि सिङ्गो प्रदेश कोरोनाको उच्च जोखिममा छ ।

प्रदेशमा गत चैत १४ मा कोरोना भाइरस संक्रमणणको पहिलो घटना फेला परेको थियो । त्यसपछि ५ जना कोरोना संक्रमित देखिएकामा सबै निको भएर घर फर्किसकेका कारण सुदूरपश्चिममा कोरोना संक्रमितको संख्या शून्य भएको क्षेत्रीय स्वास्थ्य निर्देशक गुणराज अवस्थीले बताए । कोरोना सङ्क्रमितको उपचारका लागि यहाँको सेती प्रादेशिक अस्पताल कैलालीलाई कोरोना डेडिकेटेड अस्पतालका रुपमा सञ्चालन गरिएको उनले जानकारी दिए ।

पछिल्लो समय सेती प्रादेशिक अस्पतालमा ५६ जना कोरोनाको शंकास्पदलाई निगरानीमा राखिएको अस्पतालका सूचना अधिकारी दिलीपकुमार श्रेष्ठले जानकारी दिए । उनका अनुसार पछिल्लो १ सातामा कैलाली र कञ्चनपुर हुँदै अरु जिल्ला गएका तीन जनामा कोरोना संक्रमणको पुष्टि भइसकेकाले सुदूरपश्चिम भारतबाट आउनेका कारण उच्च जोखिममा रहेको छ । महेन्द्रनगर, अत्तरिया हुँदै दैलेख आठबीस नगरपालिका-१ सात्तलाका ३५ वर्षीय १ युवामा सोमबार कोरोना संक्रमण पुष्टि भएसँगै कैलाली र कञ्चनपुरबाट अरू जिल्ला गएका व्यक्तिमा कोरोना पुष्टि हुनेको संख्या ३ पुगेको बताइएको छ ।

त्यसैगरी कैलालीबाट बर्दिया फर्किएकी ११ वर्षीया १ बालिका र कञ्चनपुरबाट काठमाडौं गएकी ३३ वर्षीया महिलामा कोरोना संक्रमण पुष्टि भएको थियो । बर्दियाकी कोरोना संक्रमित ११ वर्षीया बालिका कैलालीको गोदावरी र भजनी नगरपालिकामा ४२ दिन आफन्तको घरमा बसेर फर्किएकी बुझिएको छ । सम्पर्कमा आएका व्यक्तिको परीक्षण भइसकेको र सबैमा कोरोना सङ्क्रमण नभएको पुष्टि भइसकेको क्षेत्रीय स्वास्थ्य निर्देशनालयले जनाएको छ ।

कञ्चनपुरबाट काठमाडौं गएकी कोरोना संक्रमित महिला बेदकोट नगरपालिकाकी भएको खुलेको छ । उनको सम्पर्कमा आएका व्यक्तिको पनि परीक्षण भइसकेको र कसैमा पनि संक्रमण नभएको बताइएको छ ।

सुदूरपश्चिमका विभिन्न जिल्लामा १ हजार ६ सय ७९ जना क्वारेन्टाइनमा रहेका र १३ जनालाई आइसोलेसनमा राखिएको छ । जसमध्ये सेती प्रादेशिक अस्पताल, बाजुरामा ३/३, टीकापुरमा ४, बझाङ, डडेल्धुरा र डोटीमा १/१ जनालाई आइसोलेसनमा राखिएको छ । रासस

प्रकाशित मिति: बिहीबार, जेठ ८, २०७७ २०:२४