दाजु-भाइ मिलेर बाबुको हत्या गरी घरभित्र खाडल खनेर पुरेको खुलासा

A+ A A-

विराटनगरमा वृद्ध बाबुको हत्या गरेको आरोप २ छोरा पक्राउ परेका छन् । हत्यापछि उनीहरूले शवलाई घरकै कोठामा खाडल खनेर पुरिदिएका प्रहरी अनुसन्धानबाट खुलेको छ ।

विराटनगर–१४ झटियाहीका २९ वर्षीय रोहित र २६ वर्षीय नागेन्द्र चौहानले आफ्नै बाबुलाई कोदालो प्रहारबाट हत्या गरि कोठामै गाडेको घटना सार्वजनिक भएको हो ।

सामान्य विवादपछि ६९ वर्षीय बाबु सत्यराम भनिने सीताराम चौहानको ३ जेठमा दुवै छोरा मिलेर हत्या गरेको जिल्ला प्रहरी कार्यालय मोरङले जनाएको छ । सामान्य विवादमा बाबुको हत्या गरेका अभियुक्तहरूले घरकै खाटमुनि खाडल खनेर शव पुरेका सूचनाको आधारमा पुगेको प्रहरीले बुधबार साँझ घरको कोठामा रहेको खाटमुनिबाट झण्डै ४ फिट गहिरो खाडलबाट मृतकको शव निकालेको थियो ।

मृतकका माइला छोरा र बुहारीकै सूचनाको आधारमा पुगेको प्रहरीले शव बरामद भएसँगै मृतकका २ भाइ छोरा रोहित र नागेन्द्रलाई नियन्त्रणमा लिएर अनुसन्धान सुरु गरेको थियो ।

बुधबार साँझ शव भेटिएको घटनालाई मोरङ प्रहरीले २४ घन्टा नबित्दै निष्कर्षमा पुर्‍याएको जिल्ला प्रहरी कार्यालय मोरङ प्रमुख प्रहरी उपरीक्षक विश्व अधिकारीले बिहीबार दिउँसो भर्चुअल पत्रकार सम्मेलनमा जानकारी दिए ।

‘मृतक सीताराम र उनका जेठा छोरा रोहित सँगसँगै बस्दै आएको तथा माइला छोरा विराटनगरको भट्ठी मोडमा परिवारसहित बस्दै आएको पाइएको छ । यसअघि ठेला चलाएर जीवीकोपार्जन गर्दै आएका मृतक सीताराम लकडाउनयता छोराबाटै खर्चबर्च लिएर दैनिकी धानिरहेको प्रारम्भिक अनुसन्धानबाट खुलेको छ’ प्रहरी उपरिक्षक अधिकारीले भने ।

जेठ ३ गते मादक पदार्थ सेवन गरेर विराटनगर–१४ स्थित घर गएका २ भाइले बाबुले पैसा माग्दा भएको विवादपछि राति ९ बजेतिर कोदालो प्रहार गरी हत्या गरेको खुलेको उनले बताए ।

उनीहरूले हत्या गरेको भोलिपल्ट मात्र २ भाइले कोठामै खाडल खनेर शव पुरेको पाइएको छ । जुन शव प्रहरीले ७ गते साँझ मात्र बरामद गरेको थियो । अभियुक्तमध्ये मृतकका जेठा छोरा रोहित लागुऔषधको दुर्व्यसनीसमेत रहेको जनाइएको छ ।

जेठा छोरा केही काम नगर्ने दुर्व्यसनी तथा माइलो छोराले समेत अन्तरजातीय विवाह गरेका कारण बाबु र छोराबीच यसअघिदेखि नै सम्बन्धमा कटुता रहँदै आएको बताइएको छ । मृतकका ३ भाइ छोराहरूमध्ये कान्छा छोरा ५ वर्षअघिबाटै सम्पर्कविहीन रहेको तथा श्रीमतीको समेत केही वर्षअघि निधन भइसकेको जनाइएको छ ।

प्रकाशित मिति: बिहीबार, जेठ ८, २०७७ १८:२५