'एमसीसी मूलढोकाबाटै आउँछ, जस्ताको त्यस्तै पास हुँदैन'

A+ A A-

नेकपाका वरिष्ठ नेता झलनाथ खनालले अमेरिकी सहयोग नियोग मिलेनियम च्यालेञ्ज कर्पोरेशन (एमसीसी) संसदमा जस्ताको त्यस्तै पास नुहने बताएका छन् ।

अमेरिकी सहयोग नियोग (एमसीसी) र नेपाल सरकारबीच १४ सेप्टेम्बर, सन् २०१७ मा अनुदान सम्झौता भई त्यसको अनुमोदनका लागि प्रतिनिधिसभामा २०७६ सालको वर्षे अधिवेशनमा पेश भएपछि सार्वजनिक बहस सुरु भएको थियो ।

सत्तारुढ दल नेपाल कम्युनिस्ट पार्टी (नेकपा) भित्र एमसीसीका विषयमा लामो समयदेखि बहस जारी छ । एक पक्ष यसलाई जसरी पनि पास गर्नुपर्छ भन्ने छ भने अर्को पक्ष यसलाई जस्ताको त्यस्तै पास गर्न नहुने अडानमा छ ।

नेकपामा नै बहसको विषय बनेको एमसीसी सम्झौता अहिलेसम्म संसदबाट पास हुन सकेको छैन ।

अमेरिकी इण्डो प्यासिफिक रणनीति (आइपीएस) संग एमसीसीको सम्बन्धबारे समेत लामो समयदेखि बहस हुँदै आएको छ । सत्तारुढ नेकपाको स्थायी कमिटी लगायत पार्टीमा समेत एमसीसीबारे लामो बहस भएको थियो ।

नेपाल कम्युनिस्ट पार्टी (नेकपा) को २०७६ साल माघ १५ देखि १९ गतेसम्म काठमाडौंमा सम्पन्न केन्द्रीय कमिटीको दोस्रो पूर्ण बैठकमा नेपाल सरकार र एमसीसीबीच भएको सम्झौता र आइपीएसका सम्बन्धमा गहन अध्ययन र विश्लेषण गरेरमात्र पार्टीले आवश्यक निर्णय गर्न नेतृत्वलाई सुझाव दिएको खनाल बताउँछन् ।

केन्द्रीय कमिटीको बैठकले नेपाल र अमेरिकाको एमसीसीबीच १४ सेप्टेम्बर, २०१७ मा भएको सम्झौता र आईपीएसका सम्बन्धमा अध्ययन गरी सुझावसहित प्रतिवेदन पेश गर्न केन्द्रीय सचिवालयका सदस्य वरिष्ठ नेता झलनाथ खनालको संयोजकत्वमा ३ सदस्य कार्यदल गठन ग¥यो ।
कार्यदलले आफ्नो प्रतिवेदन पार्टीलाई बुझाएको छ । तर प्रतिवेदनले जस्ताको त्यस्तै पास गर्न नसकिने सुझाव दिएपनि सरकारको नीति तथा कार्यक्रममा नै यो विषय समावेश भएपछि नेकपामा कहि जस्ताको त्यस्तै पास हुने त होइन भन्ने आशंका जन्मिएको छ ।

कार्यदलका सदस्य भिम रावलले त संसदमा नै एमसीसी झस्केलाबाट आउन थालेको बताएका थिए । उनको भनाइको खण्डन गर्दै पार्टी अध्यक्ष तथा प्रधानमन्त्री केपी शर्मा ओलीले संसदमा नै एमसीसी झस्केलाबाट होइन मुल ढोकाबाट नै आउने बताएका छन् ।

ओलीको भनाइपछि नेकपामा पुनः एमसीसी बहस सुरु भएको छ । एमसीसी पार्टीको बैठकबाट निर्णय हुने स्थायी कमिटी सदस्य युवराज ज्ञवाली बताउँछन् ।

ज्ञवालीले भने ‘एमसीसी जस्ताको त्यस्तै त पास हुने कुरै आउँदैन । कार्यदलले बुझाएको प्रतिवेदन स्थायी कमिटीले अध्ययन गर्छ । त्यसपछि पार्टी कमिटीले दिएको सल्लाह अनुसार मात्र पास हुन्छ ।’

खनाल भन्छन्, ‘यदि एमसीसी जस्ताको त्यस्तै पास गरे नेपालको सार्वभौमितामाथि आँच आउछ । सार्वभौमिकतामाथि आच आउने कामलाई पार्टीले सहयोग गर्दैन । संसदबाट पनि पास हुँदैन ।’

प्रकाशित मिति: बिहीबार, जेठ ८, २०७७ १७:५६