गुल्मीका कोरोना संक्रमित: मन्त्री र स्थानीय तह भन्छन् मृत्यु, अस्पताल भन्छ हाेइन

गुल्मीका कोरोना संक्रमित: मन्त्री र स्थानीय तह भन्छन् मृत्यु, अस्पताल भन्छ हाेइन

A+ A A-

गुल्मीका कोरोना भाइरस (कोभिड-१९) संक्रमितको मृत्यु भएको खबर बारम्बार आइरहँदा अस्पतालले भने उनी जीवित रहेको दाबी गरेको छ ।

सोमबार साँझ पनि उनको मृत्युका खबर सामाजिक सञ्जालमा आएपछि अस्पतालले विज्ञप्ति नै जारी गरेर मृत्युको खबर असत्य रहेको बताएको थियो ।

गुल्मीबाट उपचारका लागि आएका संक्रमित पुरुषको बुधबार मृत्यु भएको खबर केही सञ्चार माध्यममा आएपछि अस्पतालले संक्रमित पुरुषको मृत्यु नभएको भन्दै विज्ञप्ति निकालेको छ । उनको भेन्टीलेटरको सहायतामा उपचार भइरहेको र स्वास्थ्य स्थिति गम्भिर भएको बताएको छ ।

अस्पतालका सञ्चालक सुरज भट्टराईले बिरामीको मृत्यु खबर सत्य नभएको बताए । स्वास्थ्य निर्देशनालयका सूचना अधिकृत मानबहादुर वलीले पनि संक्रमितको उपचार भइरहेको बताए ।

यद्यपि, तिलोत्तमा नगर प्रमख बासुदेव घिमिर र मदाने गाउँपालिकाले पनि आफूहरूलाई अस्पतालले मृत्यु भएको खबर पठाएको बताएका थिए ।

सोमबार कोरोना संक्रमण पुष्टि भएका उनलाई रुपन्देहीको तिलोत्तमास्थित क्रिमसन अस्पतालमा भर्ना गरिएको छ । गुल्मीको मदाने गाउँपालिका पुर्कोट घर भएका उनी गत जेठ १ गते ज्वरो आउने र रुघाखोकी लाग्ने भएपछि अस्पतालमा भर्ना भएका थिए । भर्ना भएको दिनदेखिनै भेन्टिलेटरको सहायतामा आइसियूमा उनको उपचार भइरहको छ ।

उनको मृत्यु भएको अस्पतालका संचालक दुर्गा पाण्डे, प्रदेश ५ का सामाजिक विकाश मन्त्री सुदर्शन बराल र मदाने गाउँपालिकाका अध्यक्षले बताएपछि शिलापत्रले संक्रमितको मृत्यु भएको समाचार प्रकाशन गरेको थियो । तर अस्पताल प्रशासनले भने उनीहरुको भनाई झुटो भन्दै बिरामीको मृत्यु नभएको र अवस्था जटिल रहेको बिज्ञप्ति जारी गरेको छ ।

अस्पतालका संचालक समिति सदस्य, मन्त्री र गाउँपालिका अध्यक्षको श्रोतका आधारमा तयार पारिएको समाचार अन्ततः गलत पर्न गएकाले यसवाट बिरामी, उनका आफन्त र सरोकारवाला सबैमा पर्न गएको असुबिधाप्रति शिलापत्र क्षमायाचना गर्दछ ।

प्रकाशित मिति: बुधबार, जेठ ७, २०७७ १३:१७