पत्रकारमा कोरोना देखिएपछि प्रदेश २ मा परीक्षणको दायर बढाइँदै

A+ A A-

प्रदेश २ मा हालसम्म ४ जनामा कोरोना संक्रमण पुष्टि भएको छ । अहिलेसम्म धनुषा, बारामा १/१ र पर्सामा २ जना पत्रकारमा कोरोना संक्रमण पुष्टि भएको छ ।

चारै जनाकाे अहिले आइसोलेसनमा उपचार जारी छ । ४ सक्रिय पत्रकारमा काेराेना देखिएपछि फिल्डमा रिपोर्टिङ गर्ने पत्रकारलाई चुनौती थपिएको छ । नेपाल पत्रकार महासंघ धनुषाका पूर्व सभापति रहिसकेका प्रदेश २ का सांसद रामअशिष यादवले पत्रकारहरूले विशेष सर्तकर्ता अपनाउनुपर्ने बताए ।

अहिले पनि यहाँका धेरै पत्रकार सामान्य मास्क लगाएर स्थगलगत रिपोर्टिङ गरिरहेका छन् । साधनको अभावका साथै केहीले भो भाइरसलाई गम्भीरताका साथ नलिँदा जोखिम बढेको छ । जनकपुरधामका चिकित्सक डा. सज्जन ठाकुरले यो भाइरस अअन्य रोग जस्तो सामान्य नरहेकाले सबैले गम्भीर हुनुपर्ने बताए ।

हाम्रो सानो असावधानीले अरूमा समेत संक्रमण फैलन सक्ने भएकाले सबैले सावधानी अपनाउन पर्ने उनले बताए । आफ्नो व्यक्तिगत सरसफाइ गरेको खण्डमा मात्रै पनि कोरोनाको संक्रमणबाट बच्न सकिने चिकित्सकहरूले बताइरहेका छन् ।

‘सबै पत्रकारले मास्क र पञ्जा अनिवार्य रुपमा लगाउनुपर्छ । म दिनभरी फिल्डमै रहने गर्छु तर मास्क जुन बेला पनि लगाउँछु’ पत्रकार घनश्याम मिश्रले भने । कोरोना भाइरस फैलिन रोक्न अहिलेसम्म धनुषा र पर्साका ५ दर्जनभन्दा बढी पत्रकारमा परीक्षण गरिएको छ ।

कोरोना परीक्षण गर्दा संक्रमण रोकिने नेपाल पत्रकार महासंघ धनुषाका अध्यक्ष अनिल मिश्रले वताए । पहिला पत्रकारहरूलाई बस्न, कम्प्युटर लगायतको व्यवस्थापन पत्रकार महासंघमै गरेको थियो । तर, अहिले १ जनामा संक्रमण देखिएपछि कार्यालय बन्द गरिएको छ ।

अहिले प्रदेश २ मा कोरोना संक्रमण रोक्न प्रयासका साथै पत्रकारको बीमा लगायतका सुविधाहरू प्नि सुरू गरिएको छ । अहिलेसम्म रौतहटका ८५ जना पत्रकारको बिमा गरिएको छ ।
नेपाल पत्रकार महासंघ रौतहट शाखाले सदस्य तथा सक्रिय सञ्चारकर्मीका लागि कोरोना बिमा गराएको हो । माधव नारायण नगरपालिकाको आर्थिक सहयोगमा रौतहटका ८५ संचारकर्मीका लागि ८५ लाखको बिमा गरिएको हो ।

संक्रमितको संख्या बढ्न थालेपछि रौतहटमा पनि जोखिम बढेको छ । ‘विपतीको समयमा खटिरहेका सञ्चारकर्मीको मनोबल उच्च बनाउन र सुरक्षासमेत प्रदान गर्ने उदेश्यले बिमा शुल्क रकम सहयोग गरेको हौैँ,’ मेयर वीरेन्द्रराय यादवले भने, ‘नेपाल पत्रकार महासंघको अनुरोधमा संचारकर्मीको लागि सहयोग गर्न पाउँदा खुसी लागेको छ ।’

नेपाल पत्रकार महासंघसँग आवद्ध नभएका तर जिल्लामा सक्रिय पत्रकारिता गरिरहेकालाई पनि बिमा कार्यक्रममा समेटेको पत्रकार महासंघ रौतहट शाखाका सचिव गौतम श्रेष्ठले बताए । प्रतिव्यक्ति ६ सयका दरले ५१ हजार बिमा शुल्क माधवनारायण नगरपालिकाले सहयोग गरेको छ ।

प्रकाशित मिति: बुधबार, जेठ ७, २०७७ १०:२३