बजेट नबढाएर कृषि क्षेत्र माथि उठाउन सकिँदैनः मन्त्री भुसाल

फाइल तस्वीर

A+ A A-

कृषि तथा पशुपन्छी विकास मन्त्री घनश्याम भुसालले कृषि क्षेत्र उठाउन सामान्य मिहिनेतबाट उठाउन सम्भव नहुने बताएका छन् । नेपाल उद्योग परिसंघले सोमबार गरेको वेबिनारमा मन्त्री भुसालले कोभिड–१९ को महामारीका कारण संकटमा परेको कृषि क्षेत्र उठाउन राज्यको भूमिका बढाउनुपर्ने बताए ।

‘महामारीका कारण समस्या कृषि क्षेत्र नै बढी संकटमा छ भने समाधान पनि कृषि क्षेत्रबाटै संभव देखिएको छ’ मन्त्री भुसालले भने, ‘त्यसका लागि राज्यको भूमिका बढाउनुपर्ने हुन्छ ।’ उनले सरकारले यो क्षेत्रमा बजेट बढाएर ल्याउने बताए । ‘कुल ग्राहस्थ उत्पादन (जीडीपी) मा २७ प्रतिशत योगदान रहेको अनि ६० प्रतिशत जनसंख्या आवद्ध भएको कृषि क्षेत्रलाई २ प्रतिशत जति बजेट छुट्याएर मात्रै पुग्नेवाला छैन’ उनले भने ।

महामारीका कारण सम्भावित भोकमरीबाट बच्न सरकारले कृषि क्षेत्रलाई विशेष प्राथमिकता दिनुपर्ने अवस्था आएको उनले बताए । मन्त्री भुसालले तत्कालीन समस्या मात्रै नभएर कृषि क्षेत्रको दीर्घकालीन विकासका लागि नै मन्त्रालयले ‘सुरक्षित कृषि, सुनिश्चित बचत’को कार्यक्रम ल्याएको बताए ।

किसानले अपहेलित भएर बस्नुपर्ने तत्कालीन अवस्थाबाट मुक्त हुँदै कृषि क्षेत्रमा लगानी बढाउने अवसरसमेत अहिले तयार भएको उनले बताए । ‘कृषि उत्पादन बढाउन संघीयतामा जानुको विकल्प छैन । उत्पादन, भण्डारण र वजारीकरणको संयन्त्र सबै स्थानीय तहसम्म लैजानुपर्छ’, मन्त्री भुसालले भने । कृषि उत्पादन बढाउन स्थानीय सरकारलाई सशक्त र प्रभावकारी बनाउनुपर्नेमा उनले जोड दिए ।

कृषि क्षेत्रको यान्त्रिकरण भाषणले मात्रै नहुने भएकाले वस्तुगत तथ्यका आधारमा सरकारले योजना ल्याउनुपर्ने मन्त्री भुसालले बताए । ‘पहिले हामीलाई पुग्ने खाद्यान्न उत्पादन गर्ने अवस्था सिर्जना गर्नुपर्छ । जतिसक्दो चाँडो आयात अन्त्य गरेर यान्त्रिकरणमा जान सकिन्छ’ मन्त्री भुसालले भने ।

कृषि क्षेत्रमा राज्यको भूमिका बढाउनुपर्ने आवश्यकतामा जोड दिएका मन्त्री भुसालले निजी क्षेत्रलाई लगानीका लागि आह्वानसमेत गरे । महामारीकै कारण १५ लाख अतिरिक्त श्रमशक्ति थपिने, ३० प्रतिशत पहाडी जमिन बाँझो भएको र सरकारले समेत कृषि क्षेत्रमा लगानी सुनिश्चित गर्ने कार्यक्रम ल्याएकाले नीजि क्षेत्रले लगानी गर्ने राम्रो अवसर भएको उनले बताए ।

‘महामारीकै कारण सिर्जित समस्या हल गर्न सकिएन भने यो अवसर नभएर चुनौती मात्रै रहन्छ’ मन्त्री भुसालले भने । यसका लागि सरकारले निजी क्षेत्रसँग सहकार्य गरेर कृषि क्षेत्र उकास्न तयार रहेको उनको भनाइ छ ।

प्रकाशित मिति: मंगलबार, जेठ ६, २०७७ २०:३९