कागेश्वरी नगरपालिकामा अनलाइन अध्यापनका लागि शिक्षकलाई तालिम

A+ A A-

कोरोना भाइरस (कोभिड-१९) को महामारीका कारण लकडाउन लम्बिदै जाँदा पठनपाठन ठप्प हुँदै गएपछि विद्यार्थीको पढाई रोकिन नदिन सरकारी विद्यालयका शिक्षकलाई सूचना प्रविधिमा आधारित अध्यापनसम्बन्धि तालिम दिन थालिएको छ ।

राजधानी काठमाडौं भित्रैका सरकारी विद्यालयका शिक्षकका लागि कतिपय नगरपालिकामा त्यस्तो तालिम दिन सुरू गरिएको हो । त्यसक्रममा कागेश्वरी मनोहरा नगरपालिकामा नेपाल राष्ट्रिय शिक्षक संगठन कागेश्वरी मनोहरा नगर कमिटीले पहिलो चरणको ३ दिने सूचना प्रविधिमा आधारित शिक्षक प्रशिक्षक तालिम दिएको छ ।

४ देखि ६ जेठसम्म सम्पन्न तालिममा नगरपालिकाका ३० जना शिक्षक सहभागी भएका थिए । नगरपालिकाभित्र पहिलो चरणमा सहभागी ३० प्रशिक्षक शिक्षकबाट कम्तीमा पनि ३ सय शिक्षकलाई सूचना प्रविधिमा आधारित पठनपाठनमा अभ्यस्त बनाउने गरी लगातार तालिम सञ्चालन गर्दै लैजाने उद्देश्य राखिएको त्यसनगर संगठनका अध्यक्ष छत्रबहादुर कटुवालले बताए ।

तालिमका क्रममा अनलाइन भिडियो कन्फरेन्स–जुम, जिमिट र जिस्विटलगायतबाट सय जनासम्म विद्यार्थीलाई एकै पटक सहभागी गराएर कसरी अध्यापनमा संलग्न गराउन सकिन्छ भन्नेबारे प्रशिक्षण दिइएको माध्यमिक तहका शिक्षक कृष्णबहादुर कार्कीले जानकारी दिए ।

‘अहिलेलाई एसईई परिक्षाको तयारीमा रहेका विद्यार्थीहरूलाई भिडियो कन्फरेन्सबाटै विद्यार्थीहरूलाई शिक्षकले पाठ्य सामग्री उपलब्ध गराउने, पढाउने, गृहकार्य गराउने उद्देश्य राखिएको छ’, कार्कीले भने, ‘यसको प्रभावकारिता हेरेर नगरपालिकाभित्रका विद्यालयका अन्य तहका विद्यार्थीहरूलाई पनि भिडियो कन्फरेन्सबाटै पठनपाठन अघि बढाउने प्रयासमा छौँ ।’

३ दिने तालिमको मंगलवार समापन गर्दै नगर प्रमुख कृष्णहरि थापाले लकडाउनको अवधिमा घरमा रहेका सरकारी विद्यालयका सबै तहका विद्यार्थीहरूलाई अनलाइन प्रविधिबाट अध्यापन गराउने थप योजना ल्याउन आग्रह गर्दै नगरपालिकाले सक्दो सहयोग गर्ने प्रतिबद्धता व्यक्त गरेका थिए ।

अर्का शिक्षक गीता तिमल्सिनाले लकडाउन लम्बिदै गएको खण्डमा अनलाइन प्रविधिबाट शैक्षिक शत्र प्रभावित नहुने गरी पठनपाठन गराउन सकिनेमा तालिमबाट आफू विश्वस्त बनेको बताइन् ।

तालिमका क्रममा नगरपालिकाका कानुनी सल्लाहकार बिदूर ढुंगाना, नगर शिक्षा समितिका संयोजक डा. गणेश अधिकारीलगायतले पनि बन्दाबन्दीको अवस्थामा सूचना प्रविधिमा आधारित भएर अध्यापन गराउने विषयमा केन्द्रीत रहेर सुझावहरू राखेका थिए ।