१० जनामा कोरोना देखिएपछि कचनकवल गाउँपालिकाका ५ वटा वडा सिल

A+ A A-

कोरोना संक्रमण पुष्टि भएपछि झापाको दक्षिणी भारतीय सीमावर्ती क्षेत्रमा रहेको कचनकवल गाउँपालिका सिल गरिएको छ । भारतबाट आएका १० जना नेपाली नागरिकमा कोरोना भाइरस संक्रमण पुष्टि भएपछि गाउँपालिकाका ५ वटा वडा सिल गरिएको गाउँपालिका अध्यक्ष अञ्जार आलमले जानकारी दिए ।

भारतबाट आई गाउँपालिकाको क्वारेन्टाइनमा बसेकामध्ये सोमबार एक जना र मंगलबार ९ जनामा कोरोना देखिएको छ । संक्रमितहरु गत शनिबार पाठामारी नाकाबाट नेपाल प्रवेश गरेका हुन् । दोहोरो अंकमा संक्रमित देखिपछि गाउँपालिका ७ वडामध्ये भारतसँग जोडिएका ५ वडा सिल गरिएको आलमले जानकारी दिए । गाउँपालिकाको १ देखि ५ नम्बर वडा सिल गरिएको हो ।

स्थानीय पथरिया माविको क्वारेन्टाइनमा भारतको मुम्बई र दिल्लीबाट आएका ३३ जनालाई राखिएको थियो । उनीहरूको स्वाब परीक्षण गर्दा १० जनाको रिपोर्ट पोजेटिभ आएको हो । अन्यको पनि रिपोर्ट पनि आउने क्रममा रहेको बताइएको छ । सोमबार साँझ संक्रमित पुष्टि भएका पुरुषलाई विराटनगर स्थित कोभिड–१९ उपचार कृन्द्रमा उपचारका लागि ल्याइएको छ ।

मंगलबार थप ९ जनालाई विराटनगर ल्याउने तयारी भइरहेको गाउँपालिका अध्यक्ष अध्यक्ष आलमले बताए । संक्रमण बढेपछि गाउँपालिकाले केचनाको महेन्द्ररत्न माविमा क्वारेन्टाइन बनाउने भएको छ । अहिले पथरिया माविमा ३३ र लक्ष्मीप्रसाद देवकोटा माविको क्वारेन्टाइनमा एक महिला गरी ६४ जना छन् । उनीहरू सबै भारतका विभिन्न राज्यबाट रेल र ट्रक चढेर आएको जनाइएको छ ।

कचनकवलको ५ वटा वडा भारतको विहार राज्यस्थित किशनगञ्ज जिल्लासँग जोडिएको छ । खुला सीमाका कारण भारतबाट लुकिछिपी नेपाली नागरिक आउने क्रम जारी छ । बोर्डरसम्म आइपुगेका नेपालीहरूलाई भारतीय एसएसबीले पनि नेपाल प्रवेश गराइदिने गरेकाले सीमामा थप चुनौती देखिएको गाउँपालिकाले जनाएको छ ।