कुहिएको चामल प्रकरण : सप्लायर्सले गुणस्तरहीन चामल वडामा पुर्‍याएको छानबिन समितिको निष्कर्ष

कुहिएको चामल प्रकरण : सप्लायर्सले गुणस्तरहीन चामल वडामा पुर्‍याएको छानबिन समितिको निष्कर्ष

A+ A A-

धनगढीमा राहतमा कुहिएको चामल वितरण भएको विषयमा गठित छानबिन समितिले सप्लयर्सलाई कारबाही थाल्नुपर्ने सुझावसहितको प्रतिवेदन तयार पारेको छ ।

वडा नम्बर ४ मा वितरण भएको राहतमा कुहिएको र किरा परेको चामल आएको गुनासो बढेपछि उपमहानगरले छानबिन थालेको थियो । उक्त समितिले जनताको स्वास्थ्यमाथि खेलबाड गर्ने गरी चामल वितरण गरिएको निष्कर्ष निकालेको छ ।

उपमहानगरपालिकाको छानबिन समितिका संयोजक तथा वडा नम्बर १८ का वडाध्यक्ष मुरारी अधिकारीले २ सय क्विन्टलभन्दा बढी चामल खानयोग्य नभएको बताए । सप्लायर्सले २० र ३० केजीको चामलको बोरा गुणस्तरीय दिएको र १५ केजीको बोरामा कैफियत पाइएको उनको भनाइ छ ।

उक्त छानबिन समितिले सप्लायसैले जनताको स्वास्थ्यमाथि खेलबाड गरेको निष्कर्ष निकालेको छ । सोहीअनुरूप कारबाही थाल्नुपर्ने सुझाव आफूहरूको रहेको समितिका सदस्य तथा वडा नम्बर तीनका वडाध्यक्ष बलबहादुर ऐरको भनाइ छ ।

उपमहानगरपालिकाका मेयर नृप वडले छानबिनमा जो कोही पनि दोषी देखिए कारबाही गरिने बताए । नगरपालिकालाई समेत मुछिएको भन्दै आफू दोषी देखिए पनि कानुनी कठघरामा उभिन तयार रहेको उनको भनाइ छ ।

यता खाद्य प्रविधि तथा गुण नियन्त्रण कार्यालयले समेत सो विषयमा छानबिन गरिरहेको छ । लक डाउनका कारण केही ढिलाइ भए पनि प्रयोगशालाको प्रतिवेदन तयार पारेर चामलको गुणस्तर जाँच गरी कानुनी कारबाही थालिने कार्यालयका सूचना अधिकारी दीपक कुँवरको भनाइ छ ।

छानविन समितिले २ दिन लगाएर ५ वडाहरूमा वितरणका लागि राखिएको चामलको स्थलगत अनुगमन गर्दै चार वडामा कुहिएको र एक वडामा राम्रो चामल पाएको थियो ।

छानबिन समितिले चार वडामा एक हजार तीन सय ५१ कट्टा कुहिएको र किरा परेको चामल फेला पारेको थियो । नम्बर ४ मा २ सय ६९ कट्टा, वडा नम्वर ५ मा ८ सय ८७ कट्टा, वडा नम्बर १ मा ९ मा ९५ कट्टा र वडा नम्बर २ मा १०० कट्टा कुहिएको चामल पाईएको छानबिन समितिले जनाएको छ ।

वडा नम्बर १२ मा वितरण गरिएको चामल राम्रो र खान योग्य रहेको समितिको भनाई थियो । १६ वडामा वितरण गरिएको चामल भने राम्रो भएका त्यहाँ वितरण गर्दा कुनै समस्या र गुनासो आएको छैन् । छानबिन समितिले सबै विषयमा छानबिन र अनुगमन गरेपछि प्रतिवेदन तयार पारिएको छ ।

दिइएको ३ दिनको समय सीमा आज बिहान पुगे पनि प्राविधिक कारण प्रतिवेदन तयार पार्न ढिलाइ भएको हो । छानबिनको प्रतिवेदनमा सम्झौताअनुसार चामल आपूर्ति नगरेको, खाद्यान्न आपूर्तिका लागि खोलिएको टेण्डरका केही बुँदाहरू पलना नगरेको, ईस्पेफिकेशन नगरिएको, खाद्यान्नको नमुना परीक्षण नगरिएको, मध्य मसिनो चामल आपूर्ति गर्नुपर्नेमा केही मोटो चामल आपुर्ति गरेको, सार्वजनिक खरिद ऐनका केही बुँदा पालना नगरेको लगायत निष्कर्ष छानविन समितिले निकालेको छ ।

अख्तियारले समेत उक्त विषयमा छानबिन थालिसकेको छ । उप महानगरले २ करोड ६१ लाखमा चामल खरिदको ठेक्का धनगढीकै ठाकुर ट्रेड लिङ्कलाई दिएको थियो । राहतमा विवाद भए पनि अहिले वितरण प्रक्रिया भने सबै वडामा ठप्प छ ।

प्रकाशित मिति: मंगलबार, जेठ ६, २०७७ १५:२९