परीक्षण बढाएर शैक्षिक क्षेत्र खुला गर्दै जानुपर्छः प्रवक्ता शर्मा

A+ A A-

नेपाली कांग्रेसका प्रवक्ता विश्वप्रकाश शर्माले शिक्षा क्षेत्रलाई लामो समय पूर्णतः बन्द गरेर राख्न नहुने बताएका छन् । कोरोना परीक्षणको दायरा बढाउँदै विभिन्न विकल्पहरूका साथ शैक्षिक संस्था खुला गर्नुपर्ने उनको भनाइ छ ।

नेपाल शिक्षक संघ चितवनले आयोजना गरेको शिक्षकहरूको १० दिने सूचनाप्रविधियुक्त सिकाइ तालिमको समापन कार्यक्रममा बोल्दै प्रवक्ता शर्माले शैक्षिक क्षेत्र लामोसमय पूर्णतः बन्द गरेर राख्न नहुने बताएका हुन् ।

अहिलेकै अवस्थामा विद्यालय सञ्चालन गर्न नसकिने भएपछि कोभिड-१९ को परीक्षणलाई व्यापक बनाउँदै लगे विकल्पहरूका आधारमा सञ्चालन गर्न सकिने उनको भनाइ थियो ।

तत्काल १ लाख बढी शिक्षक विद्यार्थीको पीसीआर परीक्षण गरी सामाजिक दूरी कायम राख्दै विद्यालय सञ्चालन गर्न सकिने उनले बताए ।

विद्यालय सञ्चालन र परीक्षणका लागि पनि उनले विकल्पहरू अगाडि सारेका छन् । व्यक्तिपिच्छे परीक्षण नगरी १०/१५ जनाको समूहका स्वाबसँगै मिसाएर परीक्षण गर्ने र नदेखिएमा उक्त समूहको मात्रै छुट्टाछुट्टै पुनः परीक्षण गर्ने गर्दा धेरैलाई छिटो परीक्षण गर्न सकिने प्रवक्ता शर्माले बताए ।

यस्तै, विद्यालय पनि सबै नखुलाएर हप्ताको ३ दिन जोरकक्षाहरू (२, ४, ६, ८ र १० कक्षा) र हप्ताको ३ दिन बिजोर कक्षाहरू (१, ३, ५, ७ र ९ कक्षा) सञ्चालन गर्दा सामाजिक दूरी कायम गर्न सकिने उनले सुझाव दिए ।

शिक्षण सिकाइलाई पनि पहिलेजस्तो अंकमा आधारित नभएर विद्यार्थीको क्षमताका आधारमा सञ्चालन गर्नुपर्ने उनको सुझाव छ । एसईई परीक्षाको १ दिन अगाडि परीक्षा स्थगित हुनु र लामोसमय घरको उकुसमुकुसमा बस्दा बालबालिकामा पछि मानसिक असर देखिन सक्ने भन्दै लामो समय शिक्षण संस्था बन्द गरेर राख्न नहुने प्रवक्ता शर्माले बताए ।

विद्यालय सञ्चालन र सिकाइमा विभिन्न विकल्पहरू अपनाएर भए पनि शिक्षण संस्थालाई पूर्णत बन्द हुन दिन नहुने उनले स्पष्ट पारे ।

१० दिनसम्म चलेको तालिममा ३५ जिल्लाका २७० शिक्षकहरूको सहभागिता रहेको शिक्षक संघ चितवनका अध्यक्ष डा. हरिप्रसाद कँडेलले जानकारी दिए ।

समापन कार्यक्रममा चितवनका प्रमुख जिल्ला अधिकारी नारायणप्रसाद भट्टराई, शिक्षक महासंघ चितवनका अध्यक्ष कोमलनाथ घिमिरे, संघका संस्थापक अध्यक्ष देवेन्द्र उपाध्यायलगायतले तालिम प्राप्त शिक्षकहरूलाई सिकेको कुरा कक्षा कोठामा लागू गर्न शुभकामना दिएका थिए ।

प्रकाशित मिति: मंगलबार, जेठ ६, २०७७ ०८:४३