गण्डकी प्रदेश विकास समितिद्वारा आर्थिक मामिला मन्त्रालयसँग छलफल

A+ A A-

गण्डकी प्रदेशको अर्थ तथा विकास समितिले विभिन्न मन्त्रालयबीचको छलफललाई तीब्र पारेको छ । यसै क्रममा समितिले आर्थिक मामिला तथा योजना मन्त्रालयसँग आर्थिक वर्ष २०७७/०७८को बजेट तथा कार्यक्रम तर्जुमाका बारेमा छलफल गरेका छ ।

समितिका सभापति दीपक कोइरालाले मन्त्रालयबीच गरेको छलफलमा स्वास्थ्य र कृषिको बजेट बढाउनु पर्ने, उत्पादन, रोजगारी, कृषि विमा लगायतमा छलफल भएको जानकारी दिए । उनले सरकारले नै कृषि उत्पादनको न्यूनतम मूल्य तोकेर बिक्री वितरणको व्यवस्था मिलाउने व्यवस्था, गत वर्षका महत्वपूर्ण योजना, प्रदेशका सबै नागरिकको स्वास्थ्य बीमा गराउनु पर्नेलगायतका सुझाव दिएको बताए ।

समितिले कोभिड-१९ पछि विदेशमा रहेका नेपाली स्वदेश फर्कँदा उनीहरूलाई पनि रोजगारी दिने गरि नीति तथा बजेट ल्याउन सुझाब दिएको छ । गण्डकी प्रदेशका मुख्यमन्त्री पृथ्वीसुब्बा गुरुङले आर्थिक वर्ष २०७७/०७८मा शिक्षा स्वास्थ्य र कृषिलाई प्राथामिकतामा राखेर बजेट ल्याउने तयारी गरिएको बताए । कोभिड-१९ ले शिक्षा स्वास्थ्यमा लगानी गर्नुपर्ने सन्देश दिएको उनका भनाइ थियो ।

आर्थिक मामिला तथा योजनामन्त्री किरण गुरुङले अहिले आउने बजेट स्वाभाविक बजेट नभएको बताए । उनले स्वास्थ्य क्षेत्रमा पहिलेको भन्दा २ गुणा बढी बजेट आउने बताए । मन्त्री गुरुङले कृषिको बजेट पनि बढेर आउने बताउदै क्रमगत योजनालाई भने निरन्तरता दिइने बताए ।

उनले कोभिड-१९को कारण आर्थिक क्षेत्रमा ठूलो नोक्सानी भएको बताउँदै अब सुरक्षित रहँदै उत्पादन र विकास निर्माणका काममा लाग्नु पर्ने बताए ।

छलफलमा अर्थ तथा विकास समितिका सदस्य इन्द्रलाल सापकोटा, बिनोद केसी, मीनप्रसाद गुरुङ, चन्द्रमोहोन गौचन, जनकलाल श्रेष्ठ, सरिता गुरुङ र डोबाटे विश्वकर्माले प्रदेश सरकाले अन्य प्रदेशको भन्दा उत्कृष्ट बजेट ल्याउन र संघीयतामाथि प्रश्न उठाउनेलाई नीति कार्यक्रम र बजेटबाट जवाफ दिनु पर्ने बताए ।

छलफलमा कोरोना भाइरसरोगले गण्डकी प्रदेशको जनजिवन र अर्थतन्त्रमा परेको असरवारे प्रदेशका योजना आयोगका उपाध्यक्ष डा. गिरिधारी शर्मा पौडेलले प्रारम्भिक प्रतिवेदन प्रस्तुत गरेका थिए । डाक्टर शर्माले कोरोनाको कारण वैशाख मसान्तसम्म गण्डकी प्रदेशको विप्रेषणमा १९ अर्ब २३ करोड ५२ लाख नोक्सानी भएको बताए ।

त्यसैगरी, कुल ग्राहस्थ उत्पादनतर्फ १९ अर्ब ३ करोड १३ लाख नोक्शानी गरी कुल ३८ अर्व २६ करोड ६५ लाख नोक्सानी हुने अनुमान गरिएको उनले बताए ।

प्रकाशित मिति: सोमबार, जेठ ५, २०७७ १५:०६