अलपत्र नेपालीद्वारा दिल्लीस्थित दूतावासमा प्रदर्शन र धर्ना, २० हजारभन्दा धेरै अलपत्र

अलपत्र नेपालीद्वारा दिल्लीस्थित दूतावासमा प्रदर्शन र धर्ना, २० हजारभन्दा धेरै अलपत्र

A+ A A-

विश्वव्यापी फैलिएको कोरोना भाइरस (कोभिड-१९) महामारीका कारण पछिल्लो समय भारत पनि प्रभावित बनेको छ । भारतमा रहेका लाखौँ नेपाली कोरोनाका कारण अलपत्र अवस्था छन् ।

अलपत्र परेका नेपाली नेपाल फर्कन माग गर्दै भारतको नयाँदिल्लीस्थित नेपाली दूतावास प्रदर्शनमा उत्रिएका छन् । उनीहरूले साँझ विहान छाक टार्न समेत मुस्किल परिरहेको बताएका छन् । उनीहरूमध्ये कतिपयले देशै फर्कन पाउनुपर्ने माग गरिरहेका छन् भने कतिपयले तत्काल राहत उपलब्ध गराउन माग गर्दै नेपाली दूतावास दिल्लीमा धर्नासमेत दिएका छन् ।

एक सातादेखि भारतको नयाँदिल्लीस्थित नेपाली दूतावासमा सयौँको संख्यामा पुगेका नेपालीले प्रदर्शन गरेका हुन् । तर, उनीहरूको भीडलाई प्रहरीले तत्कालै तितरवितर बनाएको थियो ।

कोरोना संक्रमणका कारण प्रभावित बनेका विभिन्न राज्यबाट आ-आफ्नो गन्तव्यमा पुग्ने सिलसिलमा दिल्ली आइपुगेका प्रवासी नेपाली लकडाउनका कारणमा दिल्लीमै अड्किएका छन् । यतिबेला उनीहरूसँग भएको सीमित खर्च सकिएको अवस्थामा खान बस्नसमेत असुविधा भएकोले उनीहरू परिवारसहित राहतको माग गर्दै दूतावासको गेटमा प्रदर्शन धर्नामा हेल्प नेपाली मिशन भारतका अध्यक्ष केवी कार्कीले जानकारी दिएका छन् । दूतावासले उनीहरूको गुनासो नसुनेको र प्रहरी लगाएर धपाउने गरेको उनको भनाइ छ ।

दूतावासअगाडि ठूलो संख्यामा रहेका नेपाली नेपाल पठाइदेऊ कि त खान बस्न देउ भन्दै नारा लगाएकाका कार्कीले जानकारी दिए । प्रदर्शनका क्रममा दूतावासले दिल्ली प्रहरीलाई बोलाएर प्रदर्शनकारीलाई खेदाउनेसमेत गरिएको छ ।

प्रदर्शनकारीले प्रहरीलाई आफ्नो कुरा बुझाएपछि प्रहरीको रोहवरमा दूतावासका कर्मचारी र प्रदर्शनकारीबीच वार्ता भएको थियो । वार्तामा दूतावासले पीडितहरूको सूची माग गरेको र केही दिनमै राहत उपलब्ध गराइने प्रतिबद्धतासमेत गरेको बताइएको छ । प्रदर्शनकारीले यदि दूतावासले १० दिन भित्रमा राहत उपलब्ध नगराए दिल्ली प्रहरीको अनमुति लिएर धर्ना बस्ने निर्णय गरेको समेत एक प्रदर्शनकारीले बताएका छन् ।

भारतमा करिब २० हजार नेपाली अलपत्र अवस्था रहेको हेल्प नेपाली मिशन भारतले जनाएको छ । भारतका विभिन्न स्थानमा रोजगारी अन्य कामका लागि आएका १ लाखभन्दा धेरै नेपाली समुदायमा खान बस्नको समस्या भएको हेल्प नेपाली मिशन भारतले जनाएको छ । यसरी अलपत्र अवस्थामा रहेका नेपालीमा स्वास्थ्यको समस्या हुन थालेको छ । उनीहरूमा कोरोना हुनसक्ने समेत अशका गर्ने थालिएकको छ ।

प्रकाशित मिति: सोमबार, जेठ ५, २०७७ १३:०७