प्रदेश ३ को हिउँदे अधिवेशन भोलीबाट

A+ A A-

प्रदेश ३ को प्रदेशसभामा हिउँदे अधिवेशन भोली आइतबारबाट सुरु हुँदैछ । अधिवेशनमा छलफलको लागि प्रदेश सचिवालयमा ३ वटा संशोधन विधेयक दर्ता भइसकेका छन् ।

हिउदे अधिवेशन शुरु भएपछि सभामा छलफलकालागि पेश गर्न ३ वटा संशोधन विधेयकका साथै ७ वटा विधेयकहरु दर्ता भएका हुन् । सभामा छलफलकालागि गत पुस महिनामै प्रदेशसभाका पदाधिकारी तथा सदस्यको पारिश्रमिक र सुबिधा सम्बन्धि ऐनको संशोधन विधेयक दर्ता भएको थियो ।

यसैगरी गत माघमा प्रदेशस्तरका केही सार्वजनिक लिखत प्रमाणीकरण ऐन २०७४ को संशोधन विधेयक दर्ता भएको थियो । कर तथा गैरकर राजश्व सम्वन्धि ऐनको संशोधन विधेयकपनि गत फागुनमा दर्ता गरिएका छ । यी संशोधन विधेयकका साथै प्रदेश बालबालिकाको अधिकार सम्वन्धमा व्यवस्था गर्न बनेको विधेयक समेत संसदमा दर्ता भइसकेका छन् ।

दर्ता भएका विधेयकहरु १७ चैत्रमा प्रदेशसभाको हिउँदे अधिवेशन शुरु भएपछि छलफलमा जाने प्रदेश नम्बर ३ उपसभामुख राधिका तामाङले जानकारी दिइन् । यस्तै प्रदेशसभामा प्रदेश राष्ट्रिय वनको संरक्षण र सुव्यवस्था गर्न बनेको विधेयक, प्रादेशिक सहकारी सम्वन्धि विधेयक, सूचनाको हक सम्वन्धि विधेयक, प्रादेशिक व्यापार व्यवसाय सम्वन्धि विधेयक, प्रदेशको सार्वजनिक सडक व्यवस्था तथा सञ्चालन विधेयक दर्ताको तयारीमा रहेको प्रदेशको आन्तरिक मामिला तथा कानून मन्त्रालयका अधिकृत मदन शिवाकोटीले जानकारी दिए ।

हिउँदे अधिवेशनमा प्रदेश राजधानी र नामाकरणको विषयले पनि प्रवेश पाउनेछ । प्रदेश प्रमुख अनुराधा कोइरालाले नेपालको संविधानको धारा १८३ को उपधारा १ बमोजिम भोली १७ चैतको अपरान्ह ३ बजे बस्ने गरी हिउँदे अधिवेशन आह्वान गरेकी छन । मुख्यमन्त्री तथा मन्त्रिपरिषद् कार्यालयको सिफारिसअनुसार अधिवेशन आह्वान गरिएको प्रदेश प्रमुख सचिवालयले जनाएको छ । यसअघि गत १ जेठ देखि १२ पुससम्म वर्षे (बजेट) चलेको थियो ।

प्रदेश ३ का मुख्यमन्त्री डोरमणि पौडेलले हिउँदे अधिवेशनमा अगावै प्रदेश राजधानीको विषय टुंगिने सार्वजनिक कार्यक्रममा दाबी गर्दै आएका थिए, तर त्यसको छांटकाट अझै नदेखेको प्रतिपक्ष दलको बुझाई छ । हिउदे अधिवेशन अगाडि नै आन्तरिक छलफल र सहमति भैसक्ने मुख्यमन्त्री पौडेलले बताउदै आएका छन् । अझैपनि राजनीतिक सहमतिकै आधारमा राजधानी र नामकरणको विषय टुंगिने मुख्यमन्त्रीले बताउदै आएका छन् । प्रतिपक्ष दल नेपाली कांग्रेसले राजधानीको विषय नटुंगिएसम्म बैठक चल्न नदिने बताएको छ ।

प्रकाशित मिति: शनिबार, चैत १६, २०७५ २२:३५