नीति तथा कार्यक्रम आउनुअगाडि डराएको थिएँ, अब ढुक्क भएँ : गगन थापा

A+ A A-

विश्व नै कोरोना महामारीमा जुधिरहेका बेला नेपालमा आगामी वर्षका लागि नीति तथा कार्यक्रम प्रस्तुत भएको छ । राष्ट्रपति विद्यादेवी भण्डारीले संघीय संसदको संयुक्त बैठकमा नीति तथा कार्यक्रम गर्दै समृद्ध नेपाल सुखी नेपालकै नारालाई प्राथमिकतामा राखिएको छ ।

यद्यपि, विभिन्न राजनीतिक दलका नेता तथा विषय विज्ञहरूले नेपाल कोरोना भाइरस संक्रमणको जोखिमलाई मध्यनजर गर्दै लागू गरिएको लकडाउनका कारण परेको असरलाई सम्बोधन गर्दै नीति तथा कार्यक्रम ल्याउनुपर्ने सुझाव दिएका थिए । सरकारले भने परम्परागत शैलीमै नीति तथा कार्यक्रमण ल्याएको भन्दै प्रमुख प्रतिपक्ष दलका युवानेता एवं सांसद गगन थापाले यो वर्ष सरकारले देशमा चमत्कार गर्ने भन्दै ब्यंग्य गरेका छन् । उनले नीति तथा कार्यक्रमबारे प्रतिक्रिया दिँदै यस्तो बताएका हुन् ।

कोरोनाको प्रभावका कारण स्रोत खुम्चिने बताइएको बेला महत्वाकांक्षी योजना ल्याएर सरकारले चमत्कार गर्न खोजेको उनको टिप्पणी छ । उनले नीति तथा कार्यक्रममा कोरोनाले पारेको प्रभावका बारेमा उल्लेख नगरिएको, स्रोत खुम्चिएको अवस्थामा पनि महत्वाकांक्षी कार्यक्रम ल्याएको र प्रदेशमा रहेका नेपालीप्रति कुनै सम्बोधन नभएको उल्लेख गरेका छन् ।

'नीति तथा कार्यक्रम आउनुअगाडि डराएको थिएँ, अब ढुक्क भएँ । कोरोनाले नेपालमा खासै प्रभाव नै पारेको रहेनछ । ढुकुटी पनि दह्रै रहेछ। साधनस्रोत प्रशस्तै रहेछ,' उनले ट्विटरमा भनेका छन्, 'ठीकठाक मात्र हाेइन, यो वर्ष त देशमा चमत्कार नै हुने रहेछ । देश परदेशमा भएका कोही पनि आत्तिनुपर्ने रहेनछ । सरकार त पाएकै हो । धन्यवाद मेरो सरकार !'

प्रकाशित मिति: शुक्रबार, जेठ २, २०७७ २१:०२