अतिक्रमित भूमि फिर्ताको प्रतिवद्धता ऐतिहासिक र प्रशंसनीय : कमल थापा

A+ A A-

राष्ट्रपति विद्यादेवी भण्डारीले लिम्पियाधुरा, लिपुलेक र कालापानी क्षेत्र नेपाली भूमि भएको र त्यसलाई प्राप्त गर्न ठोस कूटनीतिक पहल गरिने बताएकी छन् । आगामी वर्षका नीति तथा कार्यक्रम प्रस्तुत गर्दै राष्ट्रपति भण्डारीले लिम्पियाधुरा, लिपुलेक र कालापानी फिर्ता गराउनका लागि सार्थक कूटनीतिक पहल थालिने बताएकी हुन् ।

राष्ट्र प्रमुखको तहबाट सरकारको नीति तथा कार्यक्रममा नै पहिलो पटक लिम्पियाधुरालगायतका अतिक्रमित नेपालको भूमि फिर्ता लिने प्रतिवद्धता ऐतिहासिक तथा प्रशंसनीय रहेको राष्ट्रिय प्रजातन्त्र पार्टीका अध्यक्ष एवं पूर्वउपप्रधानमन्त्री कमल थापाले बताएका छन् । उनले सरकारको प्रयासमा राप्रपाको ऐक्यवद्धता र समर्थन रहेको बताएका छन् । उनले राष्ट्रपतिले संयुक्त सदनमा नीति तथा कार्यक्रम प्रस्तुत गरेलगत्तै प्रतिक्रियास्वरूप यस्तो धारणा व्यक्त गरेका हुन् ।

'राष्ट्र प्रमुखको तहबाट सरकारको नीति तथा कार्यक्रममा नै पहिलो पटक लिम्पियाधुरालगायतका अतिक्रमित नेपाली भूमि फिर्ता लिने प्रतिवद्धता आउनु ऐतिहासिक तथा प्रशंसनीय छ,' उनले सामाजिक सञ्जाल ट्विटरमा भनेका छन्, 'सरकारको यस प्रयासमा राप्रपाको ऐक्यवद्धता र समर्थन रहनेछ ।'

सरकार अन्तर्राष्ट्रिय सीमाको सुरक्षा गर्न प्रतिवद्ध रहेको राष्ट्रपति भण्डारीले बताएकी छन् । उनले ऐतिहासिक सन्धि, नक्सा, तथ्य तथा प्रमाणका आधारमा कूटनीतिक माध्यमबाट मित्रराष्ट्र भारतसँगको सीमासम्बन्धमा विगत लामो समयदेखि बाँकी रहेका र समयसमयमा उठिरहेका विषयहरूको सामाधान गरिने उनले बताएकी छन् ।

लिम्पियाधुरा, लिपुलेक र कालापानी क्षेत्र नेपाली भूमि भएको र त्यसलाई प्राप्त गर्न ठोस कूटनीतिक पहल गरिने राष्ट्रपतिले स्पष्ट पारेकी छन् । 'लिम्पियाधुरा, लिपुलेक र कालापानी क्षेत्र नेपाली भूमि हो, त्यसलाई प्राप्त गर्न ठोस कूटनीतिक पहल गरिनेछ,' उनले भनेकी छन्, 'तदअनुरुप छुटेको भूमिसमेत समावेश गरी नेपालको नक्सा जारी गरिनेछ ।'