कर्णाली सरकारले जथाभावी खेती गर्‍यो : वीरेन्द्रनगर नगरपालिका

A+ A A-

आन्तरिक मामिला तथा कानुन मन्त्रालय अगाडि रहेको खाली चौरमा कर्णाली प्रदेश सरकारको खाली जग्गामा कर्णाली प्रदेश भूमि व्यवस्था, कृषि तथा सहकारी मन्त्रालयले मकै रोपेपछि सुर्खेतको वीरेन्द्रनगर नगरपालिकाले असन्तुष्टि जनाएको छ ।

वीरेन्द्रनगर नगरपालिकाले विगतदेखि नै एकीकृत गुरुयोजना तयार भएको त्यहीअनुसार काम गरिरहेकाले प्रदेश सरकारले गुरुयोजनाविपरीत काम गरेको भन्दै असन्तुष्टि जनाएको हो ।

नगरपालिकाकी उपप्रमुख मोहनमाया ढकालले शुक्रबार एक प्रेस विज्ञप्ति जारी गर्दै सडक, खेलकुद, मनोरञ्जन, आवास, एकीकृत बस्ती, बसोबास, सरकारी कार्यालय, औद्योगिक, कृषि, वन, पार्क, संस्थान आदिका लागि अलग्गै क्षेत्र छुटाएको र प्रदेश सरकारले अन्य प्रयोजनका लागि छुटाएको जग्गामा कृषि खेती गरेका भन्दै विरोध गरेको हो ।

नगरपालिकाको गुरुयोजनाविपरीत कृषि प्रदेश सरकारले काम गरेको र नगरपालिको स्वरूप बिगारेको विज्ञप्तिमा उल्लेख गरिएको छ ।

भूमि व्यवस्था, कृषि तथा सहकारी मन्त्रालयले १ उच्च कर्मचारीले कृषि तथा खाद्य सुरक्षाको जोखिम कम गर्न कर्णाली प्रदेश सरकारले बाँझो जमिन अनिवार्य खेती गर्ने नीति लिँदै कर्णाली प्रदेश सरकारले बाँझो जमिनमा खेती कार्यक्रम सुरु गरेको र कुनै ठाउँमा बाँझो जमिनमा भएको मन्त्रालयले नै काम अगाडि बढाएको बताए ।

‘हामीले संघीय सरकारको नीतिअनुसार नै खाद्य असुरक्षा हुने गरेको कर्णालीमा भोकमरी हुनसक्छ भनेर कार्यक्रम संचालन गरेका हौँ’ उनले भने, ‘यो कुनै गुरुयोजनाको स्वरूप बिगार्ने काम हुँदैन् ।’