कोरोना भाइरस लाग्दैमा मरिन्न, कोभिड–१९ लाग्यो भने भन्न सकिन्न

A+ A A-

कोरोना भाइरस (कोभिड–१९) का कारण दिन प्रतिदिन मान्छे मर्नेको संख्या बढिरहेको छ । विश्वमा ३ लाखभन्दा बढीको मृत्यु भइसकेको छ । तर, नेपालमा अहिलेसम्म मानवीय क्षति भएको छैन । यो सुखद पक्ष हो ।

मानिसमा डर र त्रास भने बढ्दो छ । कतै कोरोना भाइरस लाग्यो भने मरिने त होइन भन्ने भय छ । अन्य देशका समाचार हेर्दा र पढ्दा भयावह दृश्य देखिन्छ । त्यसैले नेपालीमा पनि डर र त्रास हुनु स्वाभाविक हो ।

बाहिर र यहाँ किन फरक देखिएको छ ? कोरोना भाइरस र कोभिड–१९ बीच के फरक छ ? भाइरस लाग्दैमा मरिन्छ ? भाइरस र कोभिडबीच के फरक छ ?

कोरोना भाइरस लाग्दैमा मरिन्न

जनस्वास्थ्यविद् डाक्टर रवीन्द्र पाण्डेले कोरोना भाइरस सर्नु र कोभिड–१९ रोग लाग्नु फरक कुरा भएको बताए ।

‘कोरोना भाइरस र कोभिड–१९ फरक कुरा हो,’ उनले भने, ‘भाइरस लाग्दैमा मरिने होइन ।’

‘भाइरसकाे नाम नाेवेल कोरोना भाइरस हो । याे भाइरसको संक्रमण भएपछि मात्र कोभिड– १९ रोग लाग्छ,’ उनले भने, ‘भाइरसले श्वासप्रश्वासमा असर गर्छ । संक्रमण भएपछि मात्र कोभिडको लक्षण देखिन्छ ।’

उच्च ज्वरो, सुख्खा खोकी, सास फेर्न गाह्रो, असाध्य थकाइ लागेमा मात्र कोभिड हुने हो । त्यसैले कोरोना भाइरस र कोभिडमा फरक छ । कोरोना भाइरस लाग्दैमा डराउनुपर्ने हुँदैन । कोरोना संक्रमण हुँदैमा मान्छेको ज्यान जाँदैन ।

यो पनि पढ्नुहोस

के हो कोरोना जिन सिक्वेन्सिङ ? किन गरिन्छ ?

‘कोरोना भाइरस केही समय घाँटीमा बस्छ । अनि फोक्सोमा जान्छ । त्यसपछि फोक्सोमा भाइरल निमोनिया हुन्छ । पानी जम्छ । पिप जम्मा हुन्छ । फोक्सोको लचकता गुम्छ । त्यसपछि किड्नी, मुटु, ब्रेनमा रगत कम पुग्छ । अनि मान्छेको ज्यान जान सक्छ,’ डा. पाण्डेले भने ।

अहिलेसम्म नेपालमा कोभिड रोग देखिएको छैन । कोरोना संक्रमण मात्र देखिएको हो । कोभिडको लक्षण पनि देखिएको छैन ।

‘जसरी एचआईभी सर्दैमा एड्स हुँदैन । एचआईभी भनेको भाइरसको नाम हो,’ डा. पाण्डेले भने, ‘एचाईभीको किटानु सर्र्दैमा कसैलाई एड्स हुँदैन । कसैलाई हुन्छ । कसैलाई धेरै समय पछि हुन्छ । त्यस्तै हो कोरोना भाइरस र कोभिडमा पनि ।’

भाइरसलाई हाम्रो खानपान जीवनशैली र इम्युनिटी पावरले जित्यो भने कोभिड रोग लाग्न पाउँदैन । जोखिम वर्ग किड्नी, मुटु र फोक्सोका बिरामीमा भाइरसका कारण कोभिड–१९ हुने सम्भावना धेरै हुन्छ ।

‘नेपालमा सुरुका काेराेना संक्रमित दुई जनामा कोभिडको लक्षण देखिएको थियो,’ उनले भने, ‘त्यसपछिका केसमा कुनै लक्षण देखिएको छैन ।’ कोभिड– १९ लागकेका मध्ये पनि विश्वभर मृत्युदर ३ प्रतिशत मात्र छ ।

प्रकाशित मिति: शुक्रबार, जेठ २, २०७७ १२:५०