आँधीखोला गाउँपालिकाद्वारा दोस्रो चरणको राहत वितरण सुरु

A+ A A-

स्याङजाको आँधीखोला गाउँपालिकाले दोस्रो चरणको राहत वितरण कार्य सुरु गरेको छ ।

लकडाउन लम्बिएपछि दैनिक ज्यालादारी गर्ने मजदुर तथा विपन्न घर परिवारलाई हातमुख जोड्न समस्या नहोस् भनेर दोस्रो चरणको राहत वितरण सुरु गरिएको गाउँपालिका अध्यक्ष सुधिर कुमार पौडेलले बताए ।

उनका अनुसार वडा नं ५ र २ मा राहत वितरण गरिसकिएको छ भने वडा नम्बर १, ३ र ६ मा २ गते तथा वडा नं ४ मा ३ गते राहत वितरण गर्न लागिएको हो ।

राहत सामाग्रीमा अत्यावश्यक खाद्यान्न चामल, दाल, नुन, खाने तेल, चिनी र साबुन वितरण गरिएको अध्यक्ष पौडेलले बताए ।

गाउँपालिकाले पहिलो चरणमा ६ सय ३५ घर परिवारलाई राहत वितरण गरेको थियो भने, दोस्रो चरणमा ३ सय ३० परिवारलाई राहत वितरण कार्य सुरु गरेको गाउँपालिका सूचना प्रविधि अधिकृत रोशन लामिछानेले बताए ।

गाउँपालिकाले संघीय सरकारले तयार गरेको मापदण्ड अनुसार परिवार संख्याका आधारमा आधा र पूरा परिमाणमा राहत वितरण गर्न लागेको हो ।

राहत सामाग्री अन्तर्गत दुईजनासम्मको परिवारलाई १५ किलो चामल, डेढ किलो दाल, १ प्याकेट नुन, साबुन दुईवटा, १ किलो चिनी र १ लिटर तेल वितरण गरिने छ । त्यसैगरी तीन र तीनभन्दा माथिका परिवार संख्या भएकालाई ३० किलो चामल, ३ किलो दाल, २ प्याकेट नुन, ४ वटा साबुन, २ किलो चिनी र २ लिटर तेल वितरण गर्ने निर्णय कार्यपालिका बैठकले गरेको थियो ।

यसैगरी आँधीखोला गाउँपालिकाले कोरोना भाइरस (कोभिड १९) नियन्त्रण र रोकथाम तथा राहत वितरण गर्न एनआईसी एसिया बैंकमा स्थानीय तह प्रकोप व्यवस्थापन कोषको (खाता नं २३४२०५००२७७६८००२) को स्थापना गरेको छ ।