राहतमा कुहिएकाे चामल बाँड्ने उपमहानगरका कागजपत्र अख्तियारको नियन्त्रणमा

A+ A A-

अख्तियार दुरुपयोग अनुसन्धान आयोगले धनगढी उप–महानगरपालिकामा खाद्यान्न खरिदसम्बन्धी कागजपत्र नियन्त्रणमा लिएको छ ।

कञ्चनपुरबाट आएको आयोगको टोलीले उप–महानगरपालिकाबाट राहत सामग्री खरिद प्रक्रियाका सबै कागजपत्र नियन्त्रणमा लिएको जनाएको छ ।

अख्तियारका प्रवक्ता टोपबहादुर विष्टले राहतका सामग्री खरिद प्रक्रियामा भएको अनियमितताबारे छानबिन गरिने बताएका छन ।

धनगढी उपमहानगरपालिकाले साढे २ करोड रूपैयाँभन्दा बढीमा खरिद गरेको चामल कुहिएको भेटिएको र त्यसको खरिद प्रक्रिया पनि त्रुटिपूर्ण भएको भन्दै सर्वत्र आलोचना भएको छ ।

धनगढी उपमहानगरपालिका–४ मा वितरणका लागि राखेका १५ किलोको २ सय ६९ बोरा चामल कुहिएको पाइएको थियो ।

धनगढी उपमहानगरपालिकाद्वारा गठित छानबिन समितिका संयोजक वडा नम्बर १८ का अध्यक्ष मुरारि अधिकारीले वडा नम्बर ४ को गोदाममा राखिएको राहतको चामलको अनुसन्धानका क्रममा ३ सय ६७ मध्ये २ सय ६७ बोरा चामल कुहिएको पाइएको बताए । उनले ८४ बोरा भने राम्रो भएको जानकारी दिए ।

वडा नम्बर ४ मा वितरण गरिएका १ हजार २ बोरामध्ये २ सय ६९ बोरा बिग्रिएको पाइएको अधिकारीले जानकारी दिए ।

धनगढी उपमहानगरपालिकाले २ करोड ६१ लाखमा ३ हजार ३ सय ७ क्विन्टल चामल आपूर्तिका लागि ठेक्का दिएको थियो । १९ वटा वडा मध्ये १८ वटा वडामा राहत बाँडिसकिएपछि अन्तिममा वडा नम्बर ४ मा राहतको चामल वितरण गर्ने क्रममा कुहिएको चामल फेला परेको भन्दै स्थानीयले फिर्ता गरेका थिए ।

अधिकारीले १५ किलो र २० किलोका ६÷६ सय बोरा चामल वितरण गरिएकोमा १५ किलोका २ सय ६९ बोराको चामल कुहिएको पाइएको बताए ।

छानबिन समितिका संयोजक अधिकारीले अनुसन्धानको क्रम जारी रहेको र भोलि विस्तृत विवरण आउने बताए ।

उपमहानगरपालिकाले अधिकारीको नेतृत्वमा वडा नम्बर ३ का अध्यक्ष बल बहादुर ऐर, वडा नम्बर ९ का अध्यक्ष प्रेम भण्डारी, वडा नम्बर १३ का अध्यक्ष विजय जोशी र कार्यपालिका सदस्य गीता पन्तसहितको छानबिन समिति गठन गरेको थियो ।

त्यस्तै, आजै क्षेत्रीय खाद्य प्रविधि तथा गुण नियन्त्रण कार्यालयले राहतका लागि वितरण गर्न लागिएको चामलको नमुना संकलन गरेको छ ।

कार्यालयका प्रवक्ता दीपक कुँवरले शंकास्पद चामललाई तीन भागमा बाँडेर सिलबन्दी गरिएका बोराको नमुना संकलन गरिएको बताए ।

‘१५ किलोको २ सय ४३ बोराको एक भाग र ८४ बोराको दोस्रो भाग बनायाैं,’ कुवँरले भने, ‘२० किलोको ४ सय ८ बोराको एक भाग बनायौँ । यसरी तीन भागका तीन वटा नमूना संकलन गरेर अनुसन्धान सुरु गरेका छौँ ।’

कुुँवरले ती नमुनाको रिपोर्ट आएपछि मात्र विस्तृत जानकारी दिन सकिने बताए । उनले भने, ‘हामीले उपमहानगरपालिकाको पत्राचारका आधारमा अनुसन्धान सुरु गरेका छौं र खाद्य ऐन २०३० अनुसार कारबाही प्रक्रिया अघि बढाएका छौँ ।’

राहत वितरण स्थगित

धनगढीका १९ वटै वडामा राहत वितरण कार्य रोकिएको छ । धनगढी उपमहानगरपालिकाले विज्ञप्ति निकाल्दै राहत वितरण तत्कालका लागि राहत वितरण स्थगित गरिएको जानकारी दिएको हो ।

धनगढी उपमहानगरपालिकाले वितरण गरेको राहतको चामल कुहिएको फेला परेपछि स्थानीयले चामल फिर्ता गरेका थिए ।

वडा नम्बर ४ र वडा नम्बर २ मा उपमहानगरपालिकाले खरिद गरी वितरण गरेको चामल कुहिएको फेला परेको भन्दै स्थानीयले फिर्ता गरेका थिए ।

उपमहानगरपालिकाले विज्ञप्ति जारी गर्दै खरिद प्रक्रियाको विषयमा छानविन भइरहेको र तत्कालनका लागि वितरणको कार्य स्थगित गरिएको जनाएको छ ।

प्रकाशित मिति: बिहीबार, जेठ १, २०७७ १९:०७