उद्योगीको माग : अर्थतन्त्र 'कोमा'मा जान लाग्यो, कम्तीमा ब्याज मिनाहा गर

A+ A A-

नेपाल उद्योग वाणिज्य महासंघले अर्थतन्त्र निकै कमजोर अवस्थामा पुगेको भन्दै तत्काल राहतको कार्याक्रम ल्याउनको लागि सरकारसँग माग गरेको छ ।

महासंघले नेपालको अर्थतन्त्र 'कोमा'मा जाने स्थितिमा पुगेको भन्दै पुनरुद्वार र पुनरउत्थानका कार्यक्रम ल्याउन माग गरेको हो । बिहीबार महास‌ंघले प्रदेश च्याप्टर र स्थानीय उद्योगीसँग छलफल गरेपछि सरकारलाई यस्तो सु्झाव दिएको हो ।

अर्थतन्त्रलाई बचाउन सरकारले आगामी बजेटमार्फत् पर्याप्त प्याकेज ल्याउन आग्रह गरेको छ । महासंघले उद्योगी व्यवसायीका कुरालाई नसुनीएमा आउँदा दिनमा मुलुक आर्थिकरूपमा निकै ठूलो समस्यामा जान सक्ने चेतावनी दिएको छ ।

विश्वका अधिकांश राष्ट्रले उद्योग व्यवसायसहित अर्थतन्त्रको संरक्षणका लागि महत्वपूर्ण राहत कार्यक्रम घोषणा गरी सकेको तर सरकारले भने अहिलेसम्म पनि आकर्षक 'स्टिमुलस प्याकेज' ल्याउन नसकेको भन्दै आगामी बजेटमार्फत् त्यस्ता कार्यक्रम आउनेमा निजी क्षेत्र आशावादी रहेको जनाएको छ ।

छलफलमा उद्योग व्यवसाय बचाउने कार्यमा बैंक तथा उद्योगी व्यवसायीबीच सहकार्य हुनुपर्ने, विद्युत् डिमाण्ड चार्ज छुट दिनुपर्ने, अतिसंवेदनशील क्षेत्रलाई बढी निगरानीमा राखेर सामान्य जिल्लामा आन्तरिक रूपमै भए पनि आर्थिक गतिविधि चालू गर्नुपर्ने माग गरेको छ ।

लकडाउनको समयको बैंक ब्याज मिनहा गर्नुपर्ने, महासंघले सरकारमा पेस गरेको सुझाव कार्यान्वयनमा निरन्तर दबाब दिनुपर्ने, कृषि उत्पादन संकलन, सुरक्षित भण्डारण, आवश्यक मल बीउबिजनको पर्याप्त आपूर्ति गर्न दबाब दिनुपर्ने र निजी क्षेत्रलाई पनि मल आयात गर्ने सुविधा दिनुपर्ने, अहिलेसम्म संकलन भएको आयकर अन्य देशले जस्तै नेपाल सरकारले पनि कर तिरेका उद्योगी व्यवसायीलाई फिर्ता दिनुपर्ने सुझाव छलफलमा आएको महासंघले जनाएको छ ।

त्यसैगरी, लकडाउनको अवधिमा बैंकहरूले सेवा शुल्क र नवीकरण शुल्क लिने कार्यलाई बन्द गर्नुपर्ने, उद्यमी व्यवसायीमाथि सुरक्षा निकायबाट भएका अभद्र व्यवहार रोक्नुपर्ने माग गरेको छ ।

बैंक ब्याजको टुंगो नभएसम्म अवस्था सामान्य भए पनि उद्योग व्यवसाय चलाउन नसकिनेलगायतका सुझाव व्यवसायीले दिएको महासंघले जारी गरेको विज्ञप्तिमा भनिएको छ ।

प्रकाशित मिति: बिहीबार, जेठ १, २०७७ १२:१०