कांग्रेसको प्रस्ताव अस्वीकार, सिद्धान्त र प्राथमिकतामा परम्परागत टिप्पणी गरेको व्यंग्य

A+ A A-

अर्थमन्त्री डा. युवराज खतिवडाले प्रमुख प्रतिपक्षी दल नेपाली कांग्रेसले राखेको प्रस्ताव अस्वीकार गरेका छन् । बुधबार बजेटको सिद्धान्त तथा प्राथमिकतामाथि उठेको प्रश्‍नको जवाफ दिँदै उनले यसअघि कांग्रेसका तर्फबाट राखिएको प्रस्तावलाई अस्वीकार गरेका हुन् ।

आगामी आर्थिक वर्षको बजेटको सिद्धान्त र प्राथमिकताका विषयमा धारणा राख्दै प्रमुख प्रतिपक्षी दल कांग्रेसको तर्फबाट छायाँ अर्थमन्त्री मिनेन्द्र रिजालले जेठ १५ को बजेट सानो आकारको लिएर साउनको पूरक बजेट ल्याउने प्रस्ताव गरेका थिए । कोरोना भाइरसका कारण अर्थतन्त्रमा ठूलो प्रभाव पारेको र अझै कति प्रभाव पार्ने हो भन्ने विषयमा मूल्यांकन गर्न नसकिएको सन्दर्भमा दिएको यस्तो सुझाव अर्थमन्त्री खतिवडाले अस्वीकार गरेका हुन् । ।

उनले अधिकतम् मूल्यांकन गरेर नै बजेट ल्याउने र अहिले अर्ध बजेट ल्याउन नसक्ने बताएका छन् । 'अधिकतम् मूल्यांकन गरेर बजेट आउछ पछि आवश्‍यक पर्‍यो भने पूरक बजेट पनि आउला, अहिले अर्ध बजेट भने आउन सक्दैन' खतिवडाले भने ।

यो पनि पढ्नुहोस

बजेट प्राथमिकता : केन्द्रले सांसदलाई पैसा बाँड्दा पालिकाले वडाध्यक्षलाई किन नबाँड्ने ?

अर्थमन्त्री खतिवडाले स्थानीय पूर्वाधार साझेदार कार्यक्रममा सांसदलाई साझा धारणा राख्न आग्रह गरेका छन् । विशेषगरि सत्ता पक्षका सांसदले कार्यक्रम निरन्तरता दिन लविङ गरेको र प्रतिपक्षी सांसदले कार्यक्रम रोक्न माग गरेको अवस्थामा उनले यस्तो जवाफ फर्काएका हुन् ।

उनले बजेट परम्परागत भएको भन्ने टिप्पणी गर्ने सांसदलाई टिप्पणी पनि परम्परागत भएको जवाफ फर्काएका छन् ।बजेटले स्वास्थ्य क्षेत्रलाई प्राथमिकतामा राखेर राज्यको सिद्धान्तअनुसार आउने बताए । खर्च कटौती गर्ने क्षेत्रमा कटौती गर्न केन्द्रित रहेको खतिवडाको भनाइ छ ।

संवैधानिक व्यवस्थाअनुसार १५ जेठमा संघीय सरकारले आगामी आर्थिक वर्षको बजेट पेस गर्नुपर्ने हुन्छ । २ जेठमा राष्ट्रपतिबाट सरकारको नीति तथा कार्यक्रम पेश गर्ने कार्यतालिका छ ।

प्रकाशित मिति: बुधबार, वैशाख ३१, २०७७ १७:४३