छाङ्गरुमा बीओपी राख्न दार्चुलाबाट उड्यो सशस्त्र प्रहरीको टोली

A+ A A-

दार्चुलाका सशस्त्र प्रहरी नायव उपरीक्षक डम्बरबहादुर विष्टसहितकाे सशस्त्र प्रहरीको टोली व्याँस क्षेत्रका लागि प्रस्थान गरेको छ । भारतद्वारा अतिक्रमित नेपाली भूमि कालापानी क्षेत्रनजिक व्याँस क्षेत्रमा बीओपी स्थापना गरिने भएपछि सशस्त्र प्रहरी व्यास प्रस्थान गरेको हो ।

नेपाली सेनाको एनए ०५७ हेलिकोप्टरमार्फत बीओपी स्थापनाका लागि डीएपीसहित ७ जना सशस्त्र प्रहरीको टोली व्याँस क्षेत्रका लागि गएको सशस्त्र प्रहरी नायव उपरीक्षक विष्टले जानकारी दिए ।

काठमाडौंबाट गृह मन्त्रालय सुरक्षा सल्लाहकार प्राध्यापक डाक्टर ईन्द्रजीत राई र सशस्त्र प्रहरीका अतिरिक्त महानिरीक्षक नारायणबाबु थापाको टोली खलंगा पुगेपछि सशस्त्र डीएसपीको टोली व्याँस क्षेत्रका लागि गएको हो ।

पहिलो चरणमा डीएसपी विष्टको नेतृत्वमा ७ जनाको सशस्त्र प्रहरी टोली र व्याँसका स्थानीय जीतबहादुर बोहरा दम्पत्ती साथमा लिएर सशस्त्र टोली व्याँसका लागि गएको हो । सुरक्षा सल्लाहकार थापा तथा सशस्त्रका एआईजीको टोलीलाई बिहान करिब ११ बजे अवतरण गराएर दिउँसो पौने १ बजेतिर व्याँस क्षेत्रका लागि उडेको हेलिकाेप्टर दिउँसो करिब डेढ बजेतिर फर्किएको छ ।

अहिले बन्दोबस्तीका लागि डीएसपी विष्टसहितको सशस्त्र प्रहरी टोली गएको छ भने आजै दोस्रो चरणमा अन्य आवश्यक सामग्रीहरू ढुवानी गरिनेछ ।

सशस्त्र प्रहरी निरीक्षक लिलिबहादुर चन्दको नेतृत्वमा २५ जनाको सशस्त्र टोली र ९ जना नेपाल प्रहरीको टोली खटिने भनिए पनि नेपाल प्रहरीको संख्या थपिन सक्ने प्रहरी स्रोतले बताएको छ।

खलंगा पुगेका गृह सुरक्षा सल्लाहकार राई र सशस्त्र प्रहरी अतिरिक्त महानिरीक्षक थापाको टोली अवलोकनमा लागि भोलि व्याँस क्षेत्रका लागि जानेछ ।

प्रकाशित मिति: बुधबार, वैशाख ३१, २०७७ १४:१०