लकडाउनका कारण बन्द उद्योग आंशिक सञ्चालनमा

A+ A A-

लकडाउनका कारण बन्द रहेका उद्योगहरू आंशिक रूपमा सञ्चालनमा आउन थालेका छन् ।

काठमाडौंको बालाजु औद्योगिक क्षेत्र र ललितपुरको पाटन औद्योगिक क्षेत्रभित्र रहेका अधिकांश उद्योगहरू आंशिक रूपमा सञ्चालनमा आएका छन् ।

सबै कामदार उपस्थित हुन नसक्ने र कच्चा पदार्थको अभाव भएका कारण अझै पनि उद्योग सञ्चालन गर्न समस्या रहेको उद्योगीहरूले बताएका छन् ।

लकडाउनका कारण सबै उद्योग बन्द हुँदा अर्थतन्त्रमा असर परेको भन्दै सरकारले २८ वैशाखदेखि ४२ प्रकारका उद्योगले एकतिहाइ श्रमिक राखेर सञ्चालन गर्न सक्ने निर्णय गरेको थियो ।

त्यससँगै सरकारले श्रमिक तथा कर्मचारीहरूको आवागमनलाई सहज बनाउन उपत्यकाभित्र टाइम कार्डसमेत लागू गर्‍यो । तर पनि टाढाबाट आउनुपर्ने र उपत्यकाबाहिर रहेका श्रमिकहरू उपस्थित नहुँदा उद्योगहरू पूर्ण सञ्चालनमा आउन सकेका छैनन् ।

यस्तै, उद्योग सञ्चालनका लागि कच्चा पदार्थको अभाव, उत्पादित वस्तुको वितरण एवं ढुवानीमा समस्या आउने गरेको उद्योगीहरूले बताएका छन् ।

तर पनि उपत्यकाको बालाजु औद्योगिक क्षेत्रमा ८१ वटा र पाटन औद्योगिक क्षेत्रमा ९५ वटा उद्योग सञ्चालनमा आएका छन् ।

उद्योग सञ्चालन गरिए पनि कर्मचारीहरू आउन नसक्दा पूर्ण रूपमा सञ्चालन गर्न नसकिएको बालाजु औद्योगिक क्षेत्रमा रहेको पोलिथिन एण्ड प्लास्टिक उद्योग प्रालिका प्रबन्ध निर्देशक प्रमोद घिमिरेले बताए । उनले लकडाउनमा काम नभएपछि आफ्नो घर गएका श्रमिकहरू आउन नसकेको बताए ।

बिस्कुट उत्पादन गर्ने कम्पनी नेबिको प्राइभेट लिमिटेडका महाप्रबन्धक केशव भट्टराईले लकडाउन सुरू भएको १ महिनापछि नै आंशिक रूपमा उद्योग सञ्चालन गरिएको बताए । उनले उद्योगको नजिक रहेका श्रमिकहरूलाई बोलाई काम सुरू गरिएको बताए ।

अहिले पनि सबै श्रमिकहरू काममा फर्कन नसक्दा पूर्ण रूपमा उद्योग सञ्चालन गर्न नसकिएको भट्टराईले बताए । उनले दैनिक रूपमा श्रमिकहरूको स्वास्थ्य परीक्षण गरी काममा लगाइएको बताए ।

निजीक्षेत्रका उद्योगहरू पूर्ण रूपमा सञ्चालनमा आउन नसके पनि सरकारी लगानीको दुग्ध विकास संस्थानको ‘काठमाडौं दुग्ध वितरण आयोजना’ भने पूर्ण रूपमा सञ्चालनमा आएको छ ।

आयोजना प्रमुख तीर्थकुमार महर्जनले लकडाउनमा पनि दूध उत्पादनमा कुनै कमी नआएको बताएका छन् । उद्योगमा काम गर्ने प्राविधिक जनशक्तिको अभाव हुन नदिएको र प्रशासनिक क्षेत्रमा पालैपालो गरी कर्मचारीहरू आउने व्यवस्था मिलाइएको उनले बताए ।

अहिले पनि दैनिक ७५ देखि ७६ हजार प्याकेट दूध उत्पादन भइराखेको प्रबन्धक महर्जनले बताए ।

बालाजु औद्योगिक क्षेत्र व्यवस्थापन लिमिटेडका कायम मुकायम क्षेत्र व्यवस्थापक भोजराज विनाडीले औद्योगिक क्षेत्र भित्र सञ्चालनमा रहेका उद्योगहरूको नियमित अनुगमन गर्ने गरिएको बताए ।

उनले औद्योगिक क्षेत्रभित्र सञ्चालित उद्योगहरूमा कोरोना भाइरस संक्रमणको सावधानी अपनाइएको बताए । उनले अहिलेसम्म ८१ वटा उद्योगहरू आंशिक रूपमा सञ्चालन गरिएको बताए ।

अहिले उद्योगहरूमा सबै श्रमिक आउन सक्ने अवस्था पनि नरहेको र कच्चा पदार्थको समेत अभाव भएकाले पूर्ण रूपमा सञ्चालन गर्न समस्या रहेको बताए ।

उद्योगमा उत्पादन भएका वस्तुहरूको वितरण तथा ढुवानीका लागि टाइम कार्डका कारण समस्या भएको उनले बताए ।

पाटन औद्योगिक क्षेत्रमा सञ्चालनमा रहेका केही उद्योगहरूले भने श्रमिकहरूलाई उद्योगमै बस्ने व्यवस्था मिलाई उद्योग सञ्चालन गरेको पाइएको छ । पूर्ण वुड कभरिङ इन्डस्ट्रिजका सञ्चालक किरण स्थापितले श्रमिकहरूलाई उद्योगमै खाने र बस्ने व्यवस्था मिलाएर आंशिक रूपमा उद्योग सञ्चालन गरिएको बताए ।

सबै श्रमिकहरू उद्योगसम्म आउन कठिन भएकाले उद्योगलाई पूर्ण रूपमा सञ्चालन गर्न नसकिएको उनले बताए ।

पाटन औद्योगिक क्षेत्रका प्रशासनिक अधिकृत प्रदीप पराजुलीले लकडाउन कायम हुँदा पनि पाटन औद्योगिक क्षेत्रभित्र ७ वटा उद्योगहरू सञ्चालनमा आइरहेको बताए । उनले सरकारले उद्योगहरू सञ्चालन गर्न दिने भनेपछि आइतबारदेखि करिब ९५ वटा उद्योगहरू आंशिक रूपमा सञ्चालनमा आएको बताए ।

उनले सबै उद्योगहरूलाई कोरोना भाइरस संक्रमणको जोखिमलाई ध्यान दिई सामाजिक दूरी कायम राख्ने र स्वास्थ्य सावधानीका उपायहरू अपनाएर काम गर्न आग्रह गरिएको र सोहीअनुसार नै उद्योगहरू सञ्चालन भइराखेको बताए ।

सरकारले एकतिहाई कर्मचारी राखेर उद्योग सञ्चालन गर्न भने पनि अझै केही उद्योगहरू सञ्चालनमा आउन भने सकेका छैनन् । बालाजु औद्योगिक क्षेत्रभित्र १ सय ३१ उद्योगहरू छन् भने पाटन औद्योगिक क्षेत्रमा १ सय २१ उद्योगहरू छन् ।

प्रकाशित मिति: बुधबार, वैशाख ३१, २०७७ १२:१७