आन्तरिक विद्युत् खपत बढाउने तयारी

A+ A A-

ऊर्जा जलस्रोत तथा सिँचाइ मन्त्री वर्षमान पुनले काठमाडौं उपत्यकामा विद्युत्खपत बढाउनका लागि १३२ केभी क्षमताको थप प्रसारण प्रणाली विस्तार गर्ने गरी विद्युत् आपूर्ति बढाउनेतर्फ केन्द्रित भएको बताएका छन् ।

नेपाल आर्थिक पत्रकार समाज समाज सेजनले मंगलबार गरेको छलफलमा मन्त्री पुनले भौतिक संरचनाको क्षमता अभिवृद्धिका लागि आगामी आवको बजेट मार्फत काम गरिने जानकारी दिए ।

उनले लकडाउनका कारण उद्योग धन्दा बन्द हुँदा विद्युत् खेर जाने अवस्था आएको भन्दै त्यसलाई समेत व्यवस्थापन गर्ने प्रयास भइरहेको बताए । वर्षा लाग्न थालेका कारण नदीमा जलसतह बढ्ने भएकाले थप विद्युत् उत्पादन हुने भएकाले त्यसलाई समेतखपत गर्नेतर्फ सरकार योजनाबद्ध प्रयासमा लागेको उनको भनाइ छ ।

प्रसारण प्रणालीको सुधार तथा निर्माण गर्न सकिएको खण्डमा होङसी सिमेन्टलाई ६० मेगावाट र कोहलपुरमा स्थापना हुने एक स्टिल उद्योगका लागि ३० मेगावाट विद्युत् दिन सकिने अवस्था छ ।

यस्तै, औद्योगिक करिडोरमा मात्रे ४५० मेगावाट जतिको विद्युत् माग भए पनि प्रसारण प्रणाली तथा अन्य भौतिक पूर्वाधारको अभावमा पूर्ण क्षमतामा विद्युत् दिन नसकिएको जानकारी दिँदै मन्त्री पुनले त्यसको समेत व्यवस्थापन गर्ने तयारीमा सरकार रहेको बताए ।

नयाँ विद्युत् ऐनमार्फत् ऊर्जा क्षेत्रमा थप व्यावसायिक र प्रतिस्पर्धी बनाउने प्रयास थालिएको मन्त्री पुनको भनाइ छ । यस्तै, सरकारले घोषणा गरेअनुसार नै भारतसँग विद्युत् व्यापारका लागि सार्थक पहल भइरहेको र निकट भविस्यमा नै सार्थक परिणाम हासिल हुने उनको भनाइ छ ।

प्रकाशित मिति: मंगलबार, वैशाख ३०, २०७७ १८:३३