कोरोनाको असरलाई नजरअन्दाज गर्दै नीति र सिद्धान्त : पूर्वअर्थमन्त्री कार्की

कोरोनाको असरलाई नजरअन्दाज गर्दै नीति र सिद्धान्त : पूर्वअर्थमन्त्री कार्की

A+ A A-

नेपाली कांग्रेसका सांसद ज्ञानेन्द्रबहादुर कार्कीले सरकारले कोरोनालाई नजरअन्दाज गर्दै नीति र सिद्धान्त ल्याएको बताएका छन् ।

पूर्वअर्थमन्त्रीसमेत रहेका कार्कीले मानव जीवनको रक्षा गर्दै सिद्धान्तहरू आउनुपर्ने भए पनि कोरोनालाई नजरअन्दाज गरेर परम्परागत ढंगबाट सिद्धान्त र प्राथमिकताहरू आएको बताए । नेपाली जनताको जीवन रक्षाका लागि स्वास्थ्य क्षेत्रमा लगानी गर्दै नेपाली अर्थतन्त्र चलायमान बनाउने अवस्थामा सरकारले त्यसो गर्न नसकेको उनले बताए ।

सरकारले अघि सारेका सिद्धान्तर प्राथमिकताका कारण मुलुकको अर्थतन्त्र धराशयी बन्ने र नेपालीको जीवन कष्टकर हुन सक्ने चेतावनी उनले दिए । आगामी आर्थिक वर्षको विनियोजन विधेयकका सिद्धान्त र प्राथमिकतामाथिको छलफलका क्रममा आफ्नो धारणा राख्दै उनले फागुनसम्म विकास खर्च २५ प्रतिशत मात्रै हुनु अहिलेको सरकारको ठूलो असफलता भएको बताए ।

सरकारको खर्चमा शिथिलता, निजीक्षेत्रप्रतिको अविश्वास र बढ्दो भ्रष्टाचारका कारण नेपाली अर्थतन्त्र शिथिल हुँदै गएको उनले बताए । निर्वाचनको समयमा स्थिर सरकार र सुखी नेपाली समृद्ध नेपालको नारा दिए पनि तेस्रो बजेट ल्याउने तयारी हुँदासमेत राष्ट्रिय गौरवका योजनाको प्रगति शून्यप्राय: रहेको उनले बताए ।

‘सरकार तेस्रो बजेट ल्याउने तयारीमा छ । निर्वाचनमा स्थिर सरकार र सुखी नेपाली समृद्ध नेपालको नारा लगायौँ । तर, तेस्रो बजेट ल्याउँदै गर्दा यो सरकारले विगत २ वर्षमा राष्ट्रिय गौरवका आयोजनाको अवस्था चिन्ताजनक छ । ३३ अर्बकाे लागतमा आर्थिक वर्ष २०७४/२०७५ मा सम्पन्न गर्ने भनिएको मध्यपहाडी लोकमार्ग लागत बढेर ८४ अर्ब पुगेको छ । अब उक्त मार्ग २०७९/०८० सम्म सम्पन्न गर्ने भनिएको छ । ४७ अर्बको हुलाकी राजमार्ग अहिले ६५ अर्ब लागत पुग्यो । सिक्टाको लागत झण्डै दोब्बर भएको छ । २०७०/७१ मा सम्पन्न गर्ने लक्ष्य राखिएको कर्णाली राजमार्ग १० वर्ष पर धकेलिएको छ । निजगढ विमानस्थलको प्रगति शून्य छ,' उनले भने .

उनका अनुसार आजको मितिसम्म विद्युत्क्षेत्रमा भारतबाट ५५ अर्बको निर्यात हामीले गरिरहेका छौँ ।

उनले थपे, 'माथिल्लो तामाकोसी ३५ अर्ब ९ करोडकाे लागतमा २ वर्ष अगाडि सम्पन्न गरिसक्नुपर्नेमा अहिले लागत ७७ अर्बमा पुगेको छ । माथिल्लो सेती, बूढीगण्डकी आयोजा पनि त्यस्तै छ । ड्रिम प्राेजेक्टको रूपमा रहेको मेलम्ची ड्रिममै छ । यस्तो अवस्थाले कसरी देशको विकास हुन सक्छ ? यो गतिले नेपाल कहिले विकास हुन सक्छ ।’

प्रकाशित मिति: मंगलबार, वैशाख ३०, २०७७ १५:५२