बुद्धिमान तामाङ कमाण्डर, कमल थापा सल्लाहकार

A+ A A-

राष्ट्रिय प्रजातन्त्र पार्टीले जनसंघर्षका कार्यक्रमलाई प्रभावकारी बनाउन भन्दै जनसंघर्ष परिचालन समिति गठन गरेको छ । समितिका कमाण्डर वरिष्ठ उपाध्यक्ष बुद्धिमान तामाङ चयन भएका छन् ।

तामाङको कमाण्डमा बनेको समितिको सल्लाहकारमा पार्टी अध्यक्ष कमल थापा तथा वरिष्ठ नेताहरु दिपक बोहोरा र बालाराम घर्तीमगर तथा सदस्य सचिबमा महामन्त्री भास्कर भद्रा रहेको राप्रपा प्रवक्ता शुसील श्रेष्ठले बताए । नवगठित जनसंघर्ष परिचालन समितिको सदस्यहरुमा पार्टीका केन्द्रीय पदाधिकारी एवं सदस्यहरु, प्रदेश कार्य समितिको अध्यक्ष, विभागीय प्रमुखहरु, भातृ संगठनका प्रमुखहरु तथा काठमाडौं उपत्यकाका तीनवटै जिल्लाका अध्यक्षहरु छन् ।

राप्रपा केन्द्रीय कार्यालय धुम्बाराहीमा आज बसेको बैठकमा बोल्दै राप्रपा अध्यक्ष कमल थापाले जनसंघर्षका कार्यक्रमलाई सफल बनाउन पार्टीका सबै तहलाई सक्रिय हुन निर्देशन दिएको प्रबक्ता श्रेष्ठले बताए ।

गणतन्त्र, धर्मनिरपेक्षता र संघीयताले मुलुकलाई स्थीरता तर्फ लैजान नसकेकाले संविधानमा रहेको धर्मनिरपेक्षता खारेज गरि पूर्ण धार्मिक स्वतन्त्रता सहित नेपाललाई हिन्दुराष्ट्र घोषणा गर्न, राजसंस्था सहित सबै राजनीतिक शक्तिहरु अटाउने नेपाली संस्करणको मौलिक प्रजातन्त्र कायम गर्न जनसंघर्ष गर्ने थापाले बताए । यसका लागि परिचालन समिति बनाइएको राप्रपाको भनाई छ ।

राप्रपाले अविलम्व सर्वपक्षीय गोलमेच सम्मेलन गर्न र संघीयता बारे जनताको प्रत्यक्ष अभिमत बुझ्न राष्ट्रिय जनमत संग्रह गर्न माग गर्दै आएको छ ।

राप्रपाले हिन्दु राष्ट्र पुनस्र्थापनाको लागि चरणबद्ध आन्दोलनको घोषणा यसअघि नै गरिसकेको छ । जस अनुसार १२ चैत्रदेखि १६ चैतसम्म प्रचारप्रसार,१७ देखि २३ गतेसम्म हिन्दु राष्ट्रको पक्षमा देशव्यापी हस्ताक्षर संकलन अभियान, २५ गते केन्द्रमा सिंहदरबार अगाडि, प्रदेशमा प्रदेश राजधानीमा र जिल्लामा जिल्ला सदरमुकामहरुमा १ घण्टे धर्ना दिने उसको कार्यक्रम छ ।

२८ चैतमा सम्पूर्ण स्थानीय तहको केन्द्रमा १ घण्टे धर्ना, ५ बैशाख ५ गते सम्पूर्ण जिल्ला सदरमुकाममा धर्म निरपेक्षताको व्यानर÷प्लेकार्ड जलाउने तथा ८ बैशाखमा देशका सम्पूर्ण राजमार्ग र चोकहरुमा दिनको १२ देखि २ बजेसम्म २ घण्टे सत्याग्रहका कार्यक्रम राप्रपाले तय गरेको छ ।

तामाङ यसैको कमाण्डर तोकिएका हुन भने थापा सल्लाहकार बनेका हुन ।

प्रकाशित मिति: शुक्रबार, चैत १५, २०७५ २१:४४