प्रदेश ३ का ५ जिल्लामा लागु हुदैं

A+ A A-

प्रदेश ३ सरकारले पाइलट परियोजनाका रुपमा ‘मुख्यमन्त्री स्वास्थ्य परिक्षण कार्यक्रम’ प्रदेशको ५ जिल्लामा लागु गर्ने भएको छ ।

प्रदेश ३ सरकारले नागरिकको स्वास्थ्य परिक्षणको लागि ३ करोड २० लाख बिनियोजन गरेको छ । सबै नागरिकलाई स्वाथ्य सेवामा पहुँच पुर्याउने उद्धेश्यले यस प्रदेशको ५ वटा जिल्लामा लागु गर्न लागेको मुख्यमन्त्री जनता स्वास्थ्य परिक्षण कार्यक्रमको लागि चालु आर्थिक वर्षमा उक्त बजेट बिनियोजन गरिएको हो ।

मकवानपुरलगायत भक्तपुर, सिन्धुपाल्चोक, सिन्धुली र धादिङ जिल्लाका १ र १ वटा स्थानीय तहका लक्षित समूहलाई निःशुल्क स्वास्थ्य परीक्षण कार्यक्रम सञ्चालन गर्न लागिएको छ । केही समयपछि प्रदेशको सबै जिल्लामा यो कार्यक्रम लागु गरिने बताइएको छ । यो परिक्षण क्याम्पबाट कम्तिमा एउटा स्थानीय निकायबाट २ हजार जनताको स्वास्थ्य परिक्षण गरिने लक्ष्य लिइएको छ ।

यसको लागि स्थानीय तहमा रहेका अस्पतालहरूलाई बजेटसमेत निकासा गरिसकेको छ । अस्पताललाई प्रतिव्यक्ति २ हजार २ सयका दरले स्वास्थ्य परीक्षण शुल्क उपलब्ध गराइएको छ । आगामी १७ चैतमा प्रदेश सरकाले हेटौंडा अस्पतालबाट मुख्यमन्त्री जनता स्वास्थ्य परीक्षण कार्यक्रम सुरु गर्ने छन् । यसपछि यो कार्यक्रम सधैं चलिरहने छ ।

मकवानपुरको हेटौंडा अस्पातलबाट मुख्यमन्त्री डोरमणी पौडेलले जनतास्वास्थ्य परिक्षण कार्यक्रमको उद्घाटन गर्ने छन् । विपन्न, लोपोन्मुख तथा अल्पसंख्यक जातिहरू, दलित, महिला स्वास्थ्य स्वयंसेविका, सहिद तथा बेपत्ता परिवार, सशस्त्र द्वन्द्वका घाइतेलाई निःशुल्क स्वास्थ्य परीक्षण गरी उनीहरूको स्वास्थ्य अवस्थाबारे जानकारी दिन कार्यक्रम सुरु गर्ने भएको ३ नम्बर प्रदेश सरकारले जनाएको छ ।

यस प्रदेशको सामाजिक विकाश मन्त्रालयले मुख्यमन्त्री जनता स्वास्थ्य परिक्षणको सबै तयारी पुरा भएको बताएको छ । आर्थिक अभावकै कारण आफ्नो स्वास्थ्य अवस्थाबारे जानकारीसमेत लिन नसक्ने समूहलाई लक्षित गरी प्रदेश सरकारले विभिन्न नसर्ने रोगको पहिचान गर्ने गरी कार्यक्रम ल्याएको सामाजिक विकास मन्त्रालय स्वास्थ्य महाशाखा प्रमुख सतिश विष्टले बताए ।

स्वास्थ्य अवस्था पहिचान भएपछि आवश्यकताअनुसार उपचार भने नागरिकले आफ्नै खर्चमा गर्नुपर्नेछ । संघीय सरकारले नसर्ने रोगबाट प्रभावितहरूका लागि स्वास्थ्य उपचारमा सहुलियतसमेत प्रदान गरिरहेको सन्दर्भमा प्रदेश सरकारले निश्चित समूहलाई स्वास्थ्य समस्या पहिचान गर्न सहयोग गर्दै आवश्यकताअनुसार संघीय सरकारको कार्यक्रमबाट समेत लाभ लिन परामर्श सेवा प्रदान गर्न सकिने विष्टको भनाइ छ ।

मुख्यमन्त्री जनता स्वास्थ्य परीक्षण कार्यक्रम सञ्चालन सम्बन्धी कार्यविधि २०७५ को अनुसूची अनुसार वडाअध्यक्षहरूबाट सिफारिस लिनुपर्नेछ । मुख्यमन्त्री जनता स्वास्थ्य परीक्षण कार्यक्रममा ३० वर्ष पूरा भएका नागरिक हुनुपर्नेछ ।

प्रकाशित मिति: शुक्रबार, चैत १५, २०७५ २०:५०