कांग्रेसले भन्योः प्रधानमन्त्रीको टिप्पणी आमाको अगाडि मावलको बयान !

A+ A A-

प्रधानमन्त्री केपी ओलीले आफ्नो पार्टीप्रति गरेको टिप्पणीलाई आमाको अगाडि मावलको बयान गरेजस्तो भएको टिप्पणी गरेको छ । ओलीले कांग्रेसलाई लक्षित गर्दै ‘कांग्रेस हेर्दाहेर्दै सकिएको’ टिप्पणी गरेका थिए । उनको सो टिप्पणीप्रति कांग्रेस आक्रमक बनेको छ ।

‘आज एक कार्यक्रममा नेपाली कांग्रेसका प्रति प्रधानमन्त्रीले गर्नुभएको टिप्पणीलाई हामीले प्रधानमन्त्रीको पदीय गरिमाको उचाई अनुरुप नभएको दुःखद र हलुका अभिव्यक्तिका रुपमा लिएका छौं,’ कांग्रेस प्रवक्ता बिश्वप्रकाश शर्माले बिज्ञप्ति जारी गर्दै भनेका छन् ।

‘एकदलीय अधिनायकवादको कम्युनिष्ट दर्शन बोकेर र घोकेर जीवनको पूर्वाध विताएका जो कोहीलाई जीवनको उत्तरार्धमा लोकतान्त्रिक पद्धतिको बाटो हिड्नु पर्ने परिस्थिति निश्चयनै कठिन रहेको मनस्थिति हामी बुझ्न सक्छौं । तर कांग्रेसले स्थापनाकालदेखि अंगिकार र विश्वास गरेको मार्गमा समाहित भएर अन्ततः कांग्रेसलाई नै लोकतन्त्रको व्याख्या सुनाउने कर्म ‘आमाका अघि मावलको बयान’ भन्दा भिन्न छैन,’ बिज्ञप्तिमा भनिएको छ ।

कांग्रेसले नेत्र बिक्रम चन्द (विप्लव) नेतृत्वको पार्टीमाथि लगाइएको प्रतिबन्धप्रति असन्तुष्टि जनाउदै निषेध नभई वार्ताबाट अन्तिम समाधानमा पुग्ने शासकीय योग्यता देखाउन प्रधानमन्त्रीलाई आग्रह गरेको छ ।

कांग्रेसले सीके राउतसँगको सहमतिप्रतिसमेत पुनः असन्तुष्टि जनाएको छ । ‘बिखण्डनको मुद्दा परित्याग गरेर नेपालको अखण्डता स्वीकार्ने जो कसैलाई हाम्रो स्वागत छ र रहनेछ तर सरकार–सिके सम्झौताको दोस्रो वुँदामा उल्लेखित ‘जनअभिमतमा आधारित लोकतान्त्रिक विधि’ को साझा व्याख्या सम्झौताको तीन साता पुग्दा पनि आउन नसक्नु दुःखद र आपत्तिजनक छ । तिक्त भाषणहरुमा समय खेर फाल्नु भन्दा परिपक्व छलफलमा समय लगाउनु पर्ने प्रधानमन्त्रीको कर्तव्य स्मरण गराउन चाहन्छौँ, ’ बिज्ञप्तिमा भनिएको छ ।

प्रकाशित मिति: शुक्रबार, चैत १५, २०७५ ०५:०४