सफाइ कर्मचारीको भरमा चल्दैछन् हुम्लाका स्वास्थ्य संस्था

विरामीलाई पिठ्युमा बोकेर जिल्ला अस्पताल ल्याउदै राँयाका स्थानीयवासिन्दा

A+ A A-

स्वास्थ्य सेवाका दृष्टिले पनि हुम्लालाई दुर्गम मानिन्छ । स्वास्थ्य चौकी पर्याप्त हुदाहँुदैपनि बिगतमा औषधि नपाएर बिरामीको बिचल्ली हुन्थ्यो ।

तर यो वर्षको स्वास्थ्य दृश्य भने फरक छ । बिरामीकालागि स्वास्थ्य चौकीमा पर्याप्त औषधि छन् । सामान्य बिरामीले जिल्ला बाहिर र सदरमुकाम धाउनुपर्दैन ।

यति हुदाहुँदैपनि बिरामीले सुबिस्ता भने पाएका छैनन । किनकी पर्याप्त औषधि भएका स्वास्थ्य चौकीमा रोग जाँच्ने र औषधि बितरण गर्ने स्वास्थ्यकर्मी नै छ्रैनन् ।

जिल्लाका स्वास्थ्य चौकीहरु स्वास्थ्यकर्मी अभावमा रित्ता छन् । कतिपय स्वास्थ्यचौकी सफाई कर्मचारीले धानेका छन् । चिकित्सक अभावमा बिरामीलाई रोग साधेर औषधि बितरण गर्ने काम सफाइ कर्मचारीले गरिरहेकाछन् ।

स्वास्थ्य चौकीमा सिटामोल प्रर्याप्त भएपनि दिने स्वास्थ्यकर्मी नहुँदा सामान्य विरामी भएका ब्यक्तिहरु अहिले ३ दिनको पैदल यात्रा तय गरेर जिल्ला सदरमुकाम सिमकोट धाउन बाध्य छन् ।

जिल्लाको सर्केगाड गाउँपालिका–३ रिपस्थित स्वास्थ्यचौकीमा स्वास्थ्यकर्मी नभएको धेरै भयो । बिरामीहरु स्वास्थ्य चौकी पुगेर रित्तो हात फर्कन्छन्, वाध्य भएर दुई दिनको बाटो बिरामी बोकेरै सदरमुकाम पुग्छन् ।

स्वास्थ्यकर्मी अभावमा २ दिनको बाटो बिरामी बोकेर औषधिका लागि सिमकोट धाउनु परेको स्थानीयबासी बताउँछन् ।

सडक सञ्जालले नजोडिएको जिल्लाका नागरिक विरामी हुँदा एक दिनको पैदल हिडेर बिरामी बोकेर नै जिल्ला अस्पताल सिमकोटमा लैजानुपर्ने बाध्यता रहेको स्थानीय बिर्खे दमाईले बताए । ‘स्वास्थ्य चौकीमा औषधि छ तर स्वास्थ्यकर्मी नभएपछि बाध्य भएर सिमकोट ल्याउन परेको हो,’ उनले भने ।

रिपमा मात्र नभई जिल्लाको खार्पुनाथ गाउँपालिकाका स्थानीयलाई सामान्य झाडापखाला र टाउको दुख्ने बिरामी हुँदा रायाँबाट विरामी बोकेर जिल्ला अस्पताल धाउनुपर्ने बाध्यता छ ।

रायाँ स्वास्थ्यचौकीमा पुग्दा औषधि दिने मान्छे कोही नभएको स्थानीय मान बहादुर परियारले गुनासो गरे । परियारका अनुसार बुवाको वाथरोगको उपचार स्वास्थ्यकर्मी अभावकै कारण गाउँमा भएन ।

स्वास्थकर्मी नहँुदा उपचारका लागि सिमकोटमा रहेका फार्मेसीबाट खरिद गरेको सुई लगाउने व्यक्तिसमेत नभेटिएको उनले बताए ।

सदरमुकाम सिमकोट गाउँपालिका–७ डाँडाफया इलाका स्वास्थ्य चौकीमा एक वर्षदेखि स्वास्थ्यकर्मी छैनन । स्वास्थ्यकर्मी अभावमा गर्भवती महिलाको उपचारमा समस्या भएको स्थानीयको गुनासो छ ।

अनमी रमिता रोकाया र बसन्ती रावत पाँच महिनादेखि सम्पर्कबिहिन भएको स्थानीय इसारा सिहंले बताइन् ।

राँया स्वास्थ्य चौकीमा चारजनाको दरबन्दी छ । तर हाल एकजनापनि चौकीमा छैनन् । स्वास्थ्यकर्मी अभावमा सरसफाई स्वच्छता प्रवद्र्धनका कर्मचारी जरम शाहीले स्थानीयलाई सिटामोललगायतका औषधि बितरण गर्दै आएकीछन् ।

अहिले जिल्लाभरिका अधिकांश स्वास्थ्य चौकीमा स्वास्थ्यकर्मी नहुँदा स्थानीयबासीलाई उपचार गर्न कठिन भइरहेको छ । स्वास्थ्यचौकीमा स्वास्थ्यकर्मी नहुँदा औषधि भएपनि सेवाग्राहीले सेवा पाउन नसकेको वडाध्यक्ष गुमन रावलको भनाई छ ।

जिल्लाका अधिकांश स्वास्थ्यचौकीमा औषधि भएतापनि स्वास्थ्यकर्मी नहुँदा विरामीले जिल्ला अस्पताल धाउनुपर्ने बाध्यता छ । सिमकोट गाउपालिकाका स्वास्थ्य इन्चार्ज धुब्र बहादुर सिहंले भने उक्त विषयमा आफुलाई कुनै जानकारी नभएको बताए ।

प्रकाशित मिति: शुक्रबार, चैत १५, २०७५ ०१:५९