त्रिशुली ३ बीको शेयर बाँडफाँड आज, कति पर्ला प्रधानमन्त्री ओलीलाई ?

A+ A A-

प्रधानमन्त्री केपी शर्मा ओलीले सम्भवतः पहिलो पटक माथिल्लो त्रिशुली ३ बी जलविद्युत आयोजनाको साधारण शेयर (आइपीओ) भरेका छन् । प्रधानमन्त्री ओली, उनीकी श्रीमती राधिका शाक्य, उर्जामन्त्री बर्षमान पुन र उनकी श्रीमती ओनसरी घर्तीलगायतले सो आयोजनाको आइपीओ भरेका थिए ।

प्रधानमन्त्री ओलीले १० हजार कित्ता आइपीओ भरेका थिए । प्रधानमन्त्री पत्नी शाक्यले पनि १० हजार कित्ता नै आइपीओ भरेकी थिइन् । उर्जामन्त्री पुनले एक हजार कित्ता र उनकी पत्नी घर्तीले १/१ हजार कित्ता आइपीओ भरेकी थिइन् ।

शेयर विक्री प्रबन्धक ग्लोबल आइएमइ क्यापिटलका अनुसार सो आयोजनाको आइपीओ किन्न १ लाख ५४ हजारभन्दा बढी आवेदन परेको थियो । यसमध्ये साढे ३ हजार जति आवेदन रद्द भएको विक्री प्रबन्धकले जानकारी दिएको छ ।

सो आयोजनाको लागि ३७ करोड ५ लाख रुपैयाँ बराबरको आइपीओ माग गरिएको थियो । तर, आवेदन भने ६ करोड ४५ लाख ५२ हजार ९ सय कित्ता अर्थात ६ अर्ब ४५ करोड ५२ लाख ९ हजार रुपैयाँभन्दा बढीको परेको विक्री प्रबन्धकको भनाइ छ ।

तर, सो आयोजनाको आइपीओ माग गर्दा आफूले माग गर्ने शेयर संख्याको १० प्रतिशत रकम बुझाए हुने व्यवस्था गरिएको छ । त्यसैले ६ अर्ब ४५ करोड ५२ लाख ९ हजार रुपैयाँ बराबरको आइपीओ माग भएपनि अहिले आवेदकले ६४ करोड ५५ लाख २९ हजार रुपैयाँ मात्रै बुझाएका छन् ।

सो आयोजनाले मागेकोभन्दा बढी आइपीओ माग भएकोले आवेदन भरे अनुसारको संख्यामा आइपीओ पाइने छैन । त्यसैले प्रधानमन्त्री ओली, उनकी श्रीमती, उर्जामन्त्री पुन र उनकी श्रीमतीले पनि माग अनुसारको आइपीओ पाउने सम्भावना कम छ ।

धितोपत्र बोर्डले सबै आवेदकलाई कम्तिमा १० कित्ता आइपीओ दिनै पर्ने व्यवस्था गरेको छ । त्यसैकारण प्रधानमन्त्रीसहितका उच्च सरकारी अधिकारीले कति कित्ता आइपीओ पाउँछन् भन्ने चासो बढेको छ ।

माथिल्लो त्रिशुली ३ बी आयोजनाको आइपीओ बाँडफाँड आज (विहिबार) उर्जामन्त्रालयको सभाहलमा गरिने भएको छ । सो कम्पनीको साधारण शेयर विक्रीको सुरुआत प्रधानमन्त्री निवास वालुटारबाट गरिएको थियो । प्रधानमन्त्री ओलीले आइपीओ आवेदन भरेर आइपीओ विक्री सुरु गरिने भएकोले वालुवाटारबाट उद्घाटन गरिएको हो ।