सुदूरपश्चिममा के गर्दै छन् डा. गोविन्द केसी

A+ A A-

स्वास्थ्य क्षेत्रको सुधारका लागि १७ पटकसम्म अनशन बसेका डाक्टर गोविन्द केसी अहिले सुदूरपश्चिममा छन् । १७औँ पटकको अनशनका लागि डडेल्धुरा रोजेका उनको स्वास्थ्य अवस्था बिग्रिएको भन्दै सरकारले काठमाडौं लगे पनि केही समयपछि उनी फेरि डडेल्धुरा पुगेका थिए । गत फागुन २० गते उनी डडेल्धुरा पुगेका उनले २ महिना डडेल्धुरा जिल्ला अस्पतालमा रहेका बिरामीलाई सेवा दिए ।

डा. केसीले कुनै पनि पारिश्रमिक नलिएर २ महिनासम्म अस्पतालमा स्वयंसेवकका रूपमा सेवा प्रदान गरे । डा. केसीले सरकारले आफूसँग गरेको सम्झौता कार्यान्वयन नगरेको भन्दै गत कात्तिक १८ देखि डडेल्धुरामा १७ औँ अनशन गरेका थिए । उनी त्रिभुवन विश्वविद्यालय शिक्षण अस्पतालबाट अवकाश लिएपछि डडेल्धुरा पुगेर ९ दिन अनशन बसेका थिए ।

उनले उक्त समयमा भारतले नेपाली भूमि कालापानी, लिपुलेक र लिम्पियाधुरा आफ्नो नक्सामा समेटेर सीमा मिचेकाले राष्ट्रियताका लागि एकजुट हुन आग्रह गर्दै अनशन स्थगित गरेका थिए ।

त्यसपछि झनै दुर्गमतिर ....

डडेल्धुरा अस्पतालमा २ महिना निःशुल्क सेवासेवा पूरा गरी डा. केसी बझाङतर्फ लागेका छन् । अर्थोपेडिक सर्जन हाडजोर्नीका शल्यचिकित्सक केसी डडेल्धुरा रहँदा हाडजोर्नीसम्बन्धी समस्या भएका धेरै सुदूर पहाडवासीले विशेषज्ञ चिकित्सक सेवा पाएका थिए । डडेल्धुरा अस्पतालका सूचना अधिकारी टंकप्रसाद पन्तका अनुसार केसीबाट सेवा लिन डडेल्धुरासहित बैतडी, बझाङ, दार्चुला र डोटीका बिरामी आउने गरेका थिए । अस्पताल प्रशासनका अनुसार केसीले डडेल्धुरा अस्पतालमा हुँदा २ हजार बढी सामान्य र करिब ४ सयको हाराहारीमा अप्रेसन गरेका थिए । यद्यपि, उनले कति बिरामी जाँचे भन्ने यकिन तथ्यांक नरहेको अस्पतालले जनाएको छ ।

अर्थोपेडिक वार्डमा अन्य चिकित्सकसमेत भएका हुँदा डा. केसीले मात्रै चेकजाँच गरेको तथ्यांक नरहेको सूचना अधिकारी पन्तले जानकारी दिए ।

लकडाउन अघिसम्म उनीसँग उपचार गराउन धेरैको भीड लाग्ने गरेको थियो। तर, लकडाउनका कारण बिरामीको चाप भने केही कम भएको थियो । धेरैजसो बिरामीले उपचार गर्न आउँदा डाक्टर केसीलाई भगवानको संज्ञा दिने गरेको अस्पतालमा कार्यरत कर्मचारी रमेश भट्टले बताए । ६५ दिन डडेल्धुरा अस्पतालमा सेवा प्रदानपश्चात् सुदूरपश्चिमको विकट जिल्ला बझाङ गएका उनले जानकारी दिए । डाक्टर केसीले बझाङमा पनि बिरामीलाई निःशुल्क सेवा प्रदान गरेको थिए ।

दिनमा १ छाक मात्रै खाना खाने गरेका डाक्टर केसीले अस्पतालबाट कुनै रकम नलिएको र उल्टै बिरामीका लागि औषधिसमेत किनिदिने गरेका थिए । केही केसीले लकडाउनका कारण यातायात बन्द हुँदा मारमा परेका बिरामीलाई सरकारी गाडीको प्रयोग गरेर अस्पतालसम्म पुर्‍याउन आग्रहसमेत गरेका थिए ।

९ वैशाखमा प्रेस विज्ञप्ति जारी गर्दै कोरोना भाइरस (कोभिड-१९) नियन्त्रणजस्तै ग्रामीण क्षेत्रका नागरिकको स्वास्थ्य सेवा महत्वपूर्ण भएको भन्दै केसीले यस्तो आग्रह गरेका थिए । अहिलेको अवस्थामा एम्बुलेन्सले मात्रै सबै बिरामीलाई अस्पताल पुर्‍याउन पर्याप्त नभएको भन्दै उनले सो माग गरेका हुन् । तर, उनका माग सरकारले सुनेन् ।

अबको यात्रा बैतडीतर्फ

डडेल्धुरा अस्पतालमा २ महिना निःशुल्क सेवा गरेर बझाङ पुगेका डा. केसी अब बैतडीतर्फ लागेका छन् । फागुन २० गतेदेखि डडेल्धुरामा निःशुल्क सेवा प्रदान गरेका डा. केसी बझाङमा १ दिन सेवा प्रदान गरेपछि बैतडीतर्फ गएका हुन् ।

उनले बझाङमा रहँदा हाडजोर्नीसम्बन्धी समस्या भएका बिरामीलाई विशेषज्ञ सेवा प्रदान गरेका थिए । बझाङ अस्पतालका प्रमुख डा. सन्दीप ओखेडाका अनुसार १ दिनमा डा. केसीले धेरै बिरामीलाई निःशुल्क सेवा दिए भने ३ जनाको शल्यक्रियासमेत गरेका थिए ।

‘बझाङमा निःशुल्क सेवा दिएपछि डा केसी बैतडीतर्फ लागेका छन् । बैतडीमा पनि बिरामीलाई निःशुल्क सेवा दिने र त्यहाँबाट दार्चुला जाने तयारी गरेको बुझिएको छ’ उनले भने ।

गत कार्तिक १८ गते डडेल्धुरा पुगेर अनसन बसेका बेला उनले चिकित्सा शिक्षा ऐनमा संशोधन, अर्बौंको ठगी गर्ने मेडिकल कलेजका सञ्चालकलाई कारबाही र सुदूरपश्चिमको डोटी, डडेल्धुरामा मेडिकल कलेजको माग राखेको थिए। तर कालापानी, लिपुलेख र लिम्पियाधुरा सीमा विवादका कारण उनको सत्याग्रह कार्तिक २६ गते ९औं दिनमा स्थागित भएको थियो ।

प्रकाशित मिति: सोमबार, वैशाख २९, २०७७ १५:३१