मलहाेत्राले चिकित्सक संघलाई दिए ५ हजार थान मास्क

A+ A A-

आईएमएस ग्रुपका अध्यक्ष तथा नेपाल चेम्बर अफ कमर्शका उपाध्यक्ष दीपक मलहोत्राले नेपाल चिकित्सक संघलाई ५ हजार मास्क हस्तान्तरण गरेका छन् ।

उनले आफ्नै कम्पनीबाट उत्पादित मास्क चिकित्सक संघका अध्यक्ष डा. लोचन कार्कीलाई सहयोगस्वरूप हस्तान्तरण गरेका हुन् ।

मलहोत्राले आफ्नो कम्पनीबाट उत्पादित मास्क विभिन्न अस्पताल, सुरक्षा निकाय, सामाजिक कार्यकर्ता र पत्रकारहरूलाई निःशुल्कवितरण गर्दै आइरहेका छन् ।

कोरोना भाइरसको महामारीमा पनि आफ्नो ज्यान जोखिममा राखेर बिरामीको उपचार गरिरहेका चिकित्सकहरूलाई संघमै आएर मास्क वितरण गर्न पाएकोमा मलहोत्राले खुसी व्यक्त गरे । उनले भोलिका दिनमा पनि चिकित्सक संघसँग सहकार्य गरेर अगाडि बढ्ने जनाउँदै अहिलेको महामारीमा संघलाई अन्य थप सहयोग पनि गर्ने प्रतिवद्धता व्यक्त गरे ।

कार्यक्रममा चिकित्सक संघका अध्यक्ष डा. लोचन कार्कीले कोरोनाभाइरस (कोभिड– १९) फैलिन सक्ने त्रासका बीच मास्क अभाव भइरहेको बेला मलहोत्राले ठूलो मात्रामा मास्क उत्पादन सुरू गरेर देशका लागि धेरै राम्रो काम र ठूलो सहयोग गरेको बताए ।

मलहोत्राले अहिले व्यवसाय गर्न भन्दा पनि सामाजिक कामका लागि मास्क कम्पनी नै सञ्चालनमा ल्याएको बताए । उनले आफ्नो कम्पनीले दिनमा करिब ७० हजार मास्क उत्पादन गर्ने र शुरूका दिनमा उत्पादित मास्क सबै हस्पिटललगायतका क्षेत्रमा वितरण गरिँदै आएको बताए ।

उनले अबको केही दिनदेखि नै बजारमा मास्कको सर्टेज नहुने समेत दाबी गरे । आफूहरूले उत्पादन गरेको सर्जिकल मास्क बजारमा आइसकेकाले पनि उपलब्ध रहेको उनले बताए । आफूहरूले मास्क उत्पादन सुरू गरेपछि बजारमा मास्कमा भइरहेको कालो बजारी पनि अन्त्य भएको उनले दाबी गरे ।

मलहोत्राले भने, ‘बजारमा छ्यापछ्याप्ती मास्क उपलब्ध हुँदै छ । अब मास्क नपाएर आत्तिनु पर्दैन मास्क न्यून मूल्यमा पाइने समेत मलहोत्राले बताए ।

यस्तो बेला जनता र सरकारलाई सहयोग गर्न पनि नाफा नखाने उनले बताए । चेम्बरले केही समयअघि कोरोना भाइरस नियन्त्रणसम्बन्धी बनाएको सहजीकरण समितिको संयोजकसमेत रहेका मलहोत्रा अहिलेको लकडाउनको समयमा पनि दैनिक मास्क वितरण गर्नमै व्यस्त छन् ।

मलहोत्राले अहिलेको महामारीमा आफू र समाजलाई सुरक्षित राख्न घरमै बसी सरकारले लागू गरेको लकडाउन पालना गरिदिनसमेत उनले सबैलाई आग्रह गरे ।

प्रकाशित मिति: आइतबार, वैशाख २८, २०७७ १७:४५