सुदूरपश्चिममा कोरोना परीक्षण सुस्त, २४ घण्टामा ३१ जनाको परीक्षण

A+ A A-

सुदूरपश्चिम प्रदेशमा कोरोना भाइरस (कोभिड–१९) को परीक्षण सुस्त भएको छ । संघीय सरकारले किट पठाएको भएपनि परीक्षणले अझै तीव्रता पाउन नसकेको हो ।

पछिल्लो २४ घण्टामा धनगढीको पशुपन्छी अन्वेषण केन्द्रमा रहेको प्रयोगशालामा पीसीआर विधिबाट ३१ जनामा मात्र कोरोना परीक्षण गरिएको छ ।

आरटी/पीसीआर विधिबाट परीक्षण गरिएका ३१ जनाकै रिपोर्ट नेगेटिभ आएको सुदूरपश्चिम प्रदेश स्वास्थ्य निर्देशनालयले जनाएको छ ।

बितेको २४ घण्टामा ३१ जनाको मात्र थ्रोट स्वाबको नमुना संकलन भएको छ । यसअघि थ्रोट स्वाबको नमुना संकलन गरिएका २५ जनाको रिपोर्ट आउन बाँकी रहेको छ ।

पछिल्लो २४ घन्टामा १ सय ५८ जनाको आरडीटी गरिएको स्वास्थ्य निर्देशक डा. गुणराज अवस्थीले बताए ।

आइतबार परीक्षण गरिएका कसैमा पनि एन्टीबडी नदेखिएको उनले बताए । हालसम्म सुदूरपश्चिममा पीसीआर विधिबाट २ हजार ९ सय ५७ जनाको कोरोना परीक्षण गरिएको छ ।

परीक्षण गरिएका मध्ये ५ जनामा संक्रमण देखिएकोमा अहिले सबै कोरोनालाई जितेर घर गइसकेका छन् ।

कोभिड–१९ लाई जित्दै अस्पतालबाट घर फर्किनेमा ३ पुरुष र २ महिला छन् । घर फर्किने कैलालीका ४ र कञ्चनपुरका १ जना रहेका छन् ।

धनगढीमा स्थापना भएको प्रयोगशालामार्फत् अहिलेसम्म ६ सय ४१ जनाको परीक्षण भएको छ भने राष्ट्रिय जनस्वास्थ्य प्रयोगशालामार्फत् सुदूरपश्चिम प्रदेशका २ हजार ३ सय १६ जनाको परीक्षण भएको छ ।

सुदूरपश्चिम प्रदेशमा १५ हजार ५८ जनाको आरडीटी टेस्ट पनि गरिएको छ । आइतबारसम्म सुदूरपश्चिम प्रदेशमा कोरोनाको आशंकामा आइसोलेसनमा भर्ना गरिएका १ सय २९ जनालाई डिस्चार्ज गरिएको छ।

सुदूरपश्चिमका ९ वटै जिल्लामा ३ हजार ३ सय १ जनालाई क्वारेन्टाइनमा राखिएको प्रदेश स्वास्थ्य निर्देशनालयले जनाएको छ ।

प्रकाशित मिति: सोमबार, वैशाख २९, २०७७ ११:१६