विपन्नलाई खाना खुवाउँदै कांग्रेस डडेल्धुरा

A+ A A-

लामो समयदेखि जारी लकडाउनका कारण डडेल्धुरा सदरमुकाममा अलपत्र परेका विपन्न नागरिकहरूका लागि पूर्व प्रधानमन्त्री एवं नेपाली कांग्रेसका सभापति शेरबहादुर देउवाको गृहजिल्लामा कांग्रेस डडेल्धुराले निःशुल्क खानाको व्यवस्था गरेको छ ।

डडेल्धुरामा कोरोना महामारीको सन्त्रासका कारण जारी लकडाउनबाट प्रभावित भएर अलपत्र परेका नागरिकहरूका लागि कांग्रेसले निःशुल्क खानाको व्यवस्था गरेको हो । कांग्रेस डडेल्धुराका संस्थापक सभापति स्व. एनडीप्रकाश चटौतको स्मरणमा शनिबारदेखि एनडीप्रकाश चटौत आपतकालिन् चुल्हो सञ्चालनमा ल्याइएको हो ।

नेपाली कांग्रेस पार्टी कार्यालय किसुनजी भवनमा अहिले खाना खान विपन्न मजदुर र सदरमुकाममा अलपत्र परेका व्यक्तिहरूको भीड लाग्न थालेको छ । शनिबार बेलुकी २२ जना मजदुरले खाना खाएको र आइतबार बिहान ३६ जनालाई खाना खुवाइएको कांग्रेस डडेल्धुराका कार्यालय सचिव राम बिष्टले जानकारी दिए ।

सुदूरपश्चिम प्रदेशको १ मात्र संघीय सरकार मातहतको डडेल्धुरा सदरमुकामस्थित डडेल्धुरा अस्पतालमा उपचार गराउन आएका बिरामीहरू, विभिन्न कामले सदरमुकाम पुग्न बाध्य जिल्लाबासी र सदरमुकाममै खाना पाउन नसकेर अलपत्र परेका नागरिकहरूका लागि लकडाउन अवधिभर निःशुल्क खाना खुवाउनका लागि आपतकालिन् चुल्हो सञ्चालनमा ल्याइएको कांग्रेस डडेल्धुराका सभापति तथा सुदूरपश्चिम प्रदेश सांसद कर्णबहादुर मल्लले बताए ।

चुल्हो सञ्चालनमा ल्याउन नेपाली कांग्रेस डडेल्धुराले जिल्ला कार्यसमिति सदस्य टंकबहादुर क्षेत्रीको संयोजकत्वमा २१ सदस्यीय सेवा दलसमेत गठन गरेको छ । सेवा दलले भोजनका लागि आवश्यक खाद्यान, नुन, तेल र तरकारी खरिद गर्न आर्थिक व्यवस्थापनका साथै भोका रहेका नागरिकहरूको मागअनुसार भोजन तयार गरेर सुरक्षित रुपमा खुवाउन थालेको छ ।

कोरोना महामारीको सन्त्रासका कारण सरसफाईमा विशेष ध्यान दिइएको सेवा दलकी सदस्य समाजसेवी पदमा गुरुङले जानकारी दिइन् । आपतकालिन् चुल्हो सञ्चालन गर्न कांग्रेस डडेल्धुराका सभापति तथासांसद मल्लले १० क्विन्टल चामल दान गरेका छन् भने सेवा दलका संयोजक क्षेत्रीले २ क्विन्टल चामल उपलब्ध गराएका छन् ।

यसैगरी सेवा दलका सदस्यहरूले समेत १ क्विन्टलका दरले चामल उपलब्ध गराउनुका साथै अन्य खाद्य सामग्रीका लागि स्रोत जुटाउने छन् । कांग्रेस डडेल्धुराले यसअघि डडेल्धुराका ७ वटै स्थानीय तहमा मास्क, स्यानिटाइनजर, थर्मल गन, पीपीई र राहतका लागि खाद्यान वितरण गरिसकेको छ ।

कोरोना महामारीका कारण विपद्मा परेका जिल्लाबासीलाई मानवीय सेवाको उद्देश्यले सक्दो सहयोग गरिरहेको सांसद मल्लले बताए ।

उनले मानव समुदाय संकटमा रहेका बेला ‘सबैलाई प्रेम र स्नेह गर, सबैको सेवा गर’ भन्ने भावनाका साथ आपतकालिन् चुल्हो सञ्चालनमा सहयोग पुर्याउन सबैलाई आग्रह गरेका छन् ।

नेपाली कांग्रेस डडेल्धुराले निःशुल्क भोजनको व्यवस्था गरेसँगै डडेल्धुरा सदरमुकामस्थित अपि अस्पतालमा समाजसेवी प्रकाशबहादुर साउँदले १ सय व्यक्ति बस्न सक्ने गरि आइसोलेसन कक्ष निर्माण गरेर सुत्ने प्रबन्ध गरेका छन् ।

प्रकाशित मिति: आइतबार, वैशाख २८, २०७७ १९:५२