भारतीय कदमविरुद्ध डडेल्धुराका विद्यार्थी आन्दोलित

A+ A A-

डडेल्धुराका विद्यार्थी संगठनले नेपाली भूमीको रक्षार्थ सरकारले बेलैमा कदम नचाले चरणवद्ध आन्दोलन गर्ने चेतावनी दिएका छन् । आइतबार जिल्ला प्रशासन कार्यालयमार्फत् प्रधानमन्त्री केपी शर्मालाई ज्ञापन पत्र बुझाउँदै उनीहरूले यस्तो चेतावनी दिएका हुन् ।

जिल्लाका अनेरास्ववियु, नेपाल विद्यार्थी संघ र समाजवादी विद्यार्थी युनियनले संयुक्त विज्ञप्ति निकालेर सीमा अतिक्रमणको विषयले आफूहरूको ध्यानाकर्षण भएको जनाएका छन् ।

‘नेपालको लिपुलेक हँुदै मानसरोवर जोड्ने ८० किलोमिटर सडक नेपालको अनुमतिविना उद्घाटन गरेकोप्रति हामी डडेल्धुरा जिल्लामा क्रियाशील सम्पूर्ण विद्यार्थी संगठनहरूको गम्भीर ध्यानाकर्षण भएको छ’, ज्ञापन पत्रमा भनिएको छ ।

विद्यार्थी संगठनहरूले विगत ६ महिनादेखि सीमा अतिक्रमणको विषय उठान गर्दै आए पनि सरकार मौन बसेको भन्दै आपत्ति जनाएका छन् ।

‘झण्डै दुईतिहाई जनमत प्रात गरेको यो सरकारलाई हिजोका असमान सन्धि तथा सम्झौता खारेजी गर्ने र सच्याउन सक्ने जनमत भएको बेलामा कुनै पनि किसिमका पहल कदमी नहुनु, अन्तर्राष्ट्रिय स्तरमा कुनै कुटनीतिक र कानुनी पहल नहुँदा हामी सम्पूर्ण विद्यार्थी संगठन शसंकित भएका छौँ’, अनेरास्ववियुका संयोजक सन्तोष भट्ट, नेविसंघका प्रतिनिधि जगत ऐर र समाजवादी विद्यार्थी यूनियनका प्रतिनिधि प्रदीप भट्टले हस्ताक्षर गरेको ज्ञापनपत्रमा उल्लेख छ ।

उनीहरूले भारतीय कदमविरुद्ध सडकमा शान्तिपूर्ण आन्दोलन गरिरहेका विद्यार्थीलाई पक्राउ गरिएकोमा आपत्ति जनाउँदै धरपकड नगर्न आग्रह गरेका छन् ।

ज्ञापनपत्रमा अगाडि भनिएको छ, ‘यथाशीघ्र नेपाल सरकारले आफ्नो भूमीको रक्षार्थ सर्वपक्षीय बैठकसहित संसदबाट उपयुक्त कदम नचाले हामी सम्पूर्ण विद्यार्थी आगामी दिनमा चरणवद्ध आन्दोलनका कार्यक्रम निरन्तर जारी राख्ने चेतावनीसमेत यस ज्ञापन पत्रमार्फत् जानकारी गराउँछौँ ।’