संघ र प्रदेश सरकारलाई कांग्रेस महामन्त्री खड्काका ६ प्रश्न

A+ A A-

सरकारले कर्णाली प्रदेशलाई कोरोनाको ग्रीन जोनमा राखेपछि नेपाली कांग्रेसका महामन्त्री तथा पूर्वगृहमन्त्री पूर्णबहादुर खड्काले केन्द्र सरकार र प्रदेश सरकारलाई ६ प्रश्न गरेका छन् ।

खड्काले कर्णाली प्रदेशमा पीसीआर विधिबाट कोरोना परीक्षण गर्न माग गर्दै भारतबाट कर्णाली प्रदेशमा भित्रिएका सबै नागरिकको कोरोना परीक्षण गर्न माग गरेका हुन् ।

महामन्त्री खड्काले कोरोना परीक्षणलाई व्यापक रूपमा सञ्चालन गर्न सुझाव दिँदै केन्द्र र प्रदेश सरकारले ‘कर्णाली प्रदेशमा एकातिर किटको अभावले कोरोना परीक्षण व्यापक रूपमा गर्न नसकिएको कुरा र अर्काेतिर कर्णाली प्रदेश ग्रीन जोनमा राख्न सफल भएको भनी एकैसाथ संघ र प्रदेशका मन्त्रीको अभिव्यक्ति सञ्चारमाध्यमबाट सुन्नुपर्दा जनताले के भन्ने ? के बुझ्ने सरकार ?’ भनी प्रश्न गरेका छन् ।

कर्णालीलाई ग्रिन जोनमा राखेको विषयमा प्रश्न गर्दै खड्काले फेसबुक पेजमा लेखका छन्, ‘त्यसो हो भने भारतबाट कर्णाली प्रदेश प्रवेश गरेका सबै नागरिकको परीक्षण हामीले गरिसक्यौँ सरकार ?’

बाहिरबाट आएका नागरिकलाई क्वारेन्टाइनमा राखेर परीक्षण नै नगरी पठाएकोमा महामन्त्री खड्काले आपत्ति जनाएका छन् । ‘क्वारेन्टाइनमा राखेकामध्ये समूह छुट्याई केहीको मात्र परीक्षण गरिएको भन्ने खबर के साँचो हो सरकार ?,’ उनले प्रश्न गरेका छन्, ‘किटको अभावले कर्णाली प्रदेशमा केही दिनदेखि परीक्षण रोकिएको भन्ने खबर के हो सरकार ?’

कर्णालीका नागरिकको व्यापक रूपमा परीक्षण नगरी ग्रिन जोनको रूपमा कर्णाली प्रदेश सुरक्षित रहेको प्रचारमा संघीय सरकारदेखि सबै यत्तिकैमा रमाउँदा भोलि एकैचोटि भुसको आगोको रूप कोरोना संक्रमणले नलेला भन्न नसकिने उनको भनाइ छ ।

कर्णालीको नजिकको बाँकेमा देखिएको हालैको संक्रमणको डरलाग्दो विस्तार कर्णालीका लागि लामो समयका लागि खतराको घन्टी भएको उनको भनाइ छ ।

कोरोनाविरुद्ध सबै एकजुट भएर लाग्न महामन्त्री खड्काले आग्रह गरे । ‘त्यसैले सबै जुटौँ, एकतावद्ध भएर लागौँ,’ उनले भने, ‘संघीय सरकार, कर्णाली प्रदेशको संवेदनशीलतालाई ध्यान दिई तत्काल पर्याप्त पीसीआर किट उपलब्ध गराऊँ ।’

कर्णालीका १० ओटै जिल्लामा विलम्ब नगरी आरडीटी विधिबाट नभएर पीसीआर प्रविधिबाट परीक्षणको दायरा बढाउन सुझावसमेत दिएका छन् । ‘अभियानको रूपमा कोरोना परीक्षण समुदाय स्तरमा व्यापक रूपमा सुरु गरौँ,’ उनले भने ।

प्रकाशित मिति: आइतबार, वैशाख २८, २०७७ १४:३१