आगामी बजेट कोभिड–१९ पछिको अवस्था निराकरणमा केन्द्रित हुने

A+ A A-

अर्थमन्त्री डा. युवराज खतिवडाले आगामी वर्षकाे बजेटले कोभिड–१९ पछिको अवस्था निराकरणसँगै समाजवादउन्मुख अर्थतन्त्रको अवधारणालाई आत्मसाथ गर्ने बताएका छन् । आइतबार प्रतिनिधिसभा बैठकमा आर्थिक वर्ष २०७७/०७८ को विनियोजन विधेयकका सिद्धान्त र प्राथमिकता सम्बन्धमा (कर प्रस्तावबाहेक) पूर्व बजेटमा छलफल गरियोस् भनी प्रस्ताव प्रस्तुत गर्दै उनले कोरोना महामारीपछि थला परेको अर्थतन्त्रलाई उठाउने, असमानता घटाउने, पुँजीले श्रमको शोषण नगर्ने र भएको आर्थिक वृद्धिको समन्यायीक वितरणलाई नै बजेटले आत्मसाथ गर्ने बताएका हुन् ।

‘मैले मूलतः नेपालको संविधानले परिकल्पना गरेको समाजवाद उन्मुख आर्थिक प्रणाली निर्माणलाई मार्गदर्शनको रूपमा लिएको छु । राज्यका निर्देशक सिद्धान्त, नीति तथा दायित्व एवं नागरिकका मौलिक हक कार्यान्वयन गर्न बनेका कानुनहरूलाई समेत बजेट तर्जुमाको आधारको रूपमा लिएको छु’, उनले भने ।

आर्थिक वृद्धिको आधार फराकिलो भए मात्रै दिगो विकास हुने उल्लेख गर्दै उनले आर्थिक वृद्धि सँगसँगै सामाजिक न्याय र वितरण प्रणाली तथा सबैलाई सामाजिक संररक्षण र सुरक्षा जस्ता राज्यका निर्देशक सिद्धान्तबाट नै बजेट निर्देशित हुने बताए ।

सरकारले अपनाएको राजनीतिक, आर्थिक प्रणाली तथा अन्तर्राष्ट्रिय आर्थिक सम्बन्ध भित्र रहेर बजेटको मोडल तयार पारिने उनको भनाइ छ । संविधान र राज्यको निर्देशक सिद्धान्त अनुसार नै बजेटको मोडल तयार गरिने छ’, उनले भने,। ‘त्यो मोडलले मुलुकको सम्मृद्धिलाई समाजवादतर्फको बाटोमा अघि बढाउने छ भन्ने मेरो विश्वास छ ।’

उनले वित्तिय संघीयता कार्यान्वयन गर्ने तथा स्रोतको बाँडफाँडको विषयमा आवश्यक कानुनहरु बनेकाले यसले विस्तारै पूर्णता पाउने बताए । संघ, प्रदेश र स्थानीय तहबीचको सहकार्य र परिपुरक भूमिका अनुसार नै आर्थिक र राज्य प्रणाली सञ्चालन हुने तथा आयोजना कार्यान्वयनका सम्बन्धमा निश्चित मापदण्ड बनाएर अघि बढ्ने भएकाले दुविधा नहुने स्पष्ट पारे ।

उनले यस वर्षको बजेटले गुणस्तरीय स्वास्थ्य सेवा तथा विपत व्यवस्थापनलाई उच्च प्राथमिकतामा राख्ने पनि बताए ।

‘आगामी बजेटमा स्वास्थ्य प्रणालीलाई सबल र सृदृढ तुल्याउने गरी कार्यक्रम र योजनाहरू समेटिने छ’, उनले भने, ‘स्वास्थ्य बीमाजस्ता कार्यक्रमलाई विस्तार गरिनेछ ।’

वैदेशिक रोजगारीबाट फर्केका युवासँगै ग्रामीण उद्यमलाई उच्च प्राथमिकतामा राखिने उनले बताए ।

अर्थमन्त्री खतिवडाले प्रस्तुत गरेको प्रस्तावमाथि २९ र ३० वैशाखमा बस्ने बैठकमा छलफल हुने सभामुख अग्निप्रसाद सापकोटाले जानकारी दिए । आइतबारको वैठक २९ वैशाखमा बस्ने गरी स्थगित गरिएको छ ।

प्रकाशित मिति: आइतबार, वैशाख २८, २०७७ १२:१७