सार्क राष्ट्रमा कोरोना संक्रमितको संख्या १ लाख ७ हजार नाघ्यो

A+ A A-

दक्षिण एसियाली क्षेत्रीय सहयोग संगठन (सार्क) मुलुकहरूमा कोरोना भाइरसबाट १ लाखभन्दा बढी व्यक्ति संक्रमित भएका छन् ।

दक्षिण एसियाका यी ८ देशमा हालसम्म कोरोना संक्रमित संख्या १ लाख ७ हजार ४८४ पुगेको छ । त्यस्तै, २ हजार ९४९ जनाले ज्यान गुमाएका छन् ।

दक्षिण एसियाली मुलुकमध्ये भारतमा सबैभन्दा बढी संक्रमित रहेका छन् । शनिबारसम्ममा भारतमा ५९ हजार ८८१ जनामा कोरोनाको संक्रमण पुष्टि भएको छ । त्यहाँ १ हजार ९९० जनाको मृत्यु भइसकेको छ । भारतमा १७ हजार ९५६ संक्रमित उपचारपछि निको भएका छन् ।

त्यस्तै, पाकिस्तानमा २७ हजार ४७४ जनामा कोरोना पुष्टि भएको । जसमध्ये ६१८ जनाले ज्यान गुमाएका छन् । पाकिस्तानमा अहिलेसम्म ७ हजार ७५६ व्यक्तिले कोरोना जितेका छन् ।

बंगलादेशमा शनिबारसम्म कोरोना भाइरसबाट १३ हजार ७७० जना संक्रमति बनेका छन् । त्यहाँ २१४ जनाको मृत्यु भएको छ । बंगलबादेशमा २ हजार ४१४ जना उपचारपछि निको भएर घर फर्किएका छन् ।

लामो समयदेखि द्वन्द्वको कारण प्रभावित अफगानिस्तानमा ४ हजार ३३ जना कोरोनाबाट प्रभावित भएका छन् । जसमध्ये ११५ जनाकोे मृत्यु भएको छ । अफगानिस्तानमा हालसम्म ५०२ जना निको भएर घर फर्किएका छन् ।

श्रीलंकामा ८४४ जना सङ्क्रमित रहेका छन् भने ९ जनाको मृत्यु भएको छ । माल्दिभ्समा अहिलेसम्म कोरोना भाइरसबाट संक्रमित हुनेहरूको संख्या ७ सय ६६ पुगेको छ भने ३ जनाको मृत्यु भएको छ । त्यहाँ २ सय ६० संक्रमित निको भएर घर फर्किएका छन् ।

नेपालमा हालसम्म १ सय १० जना र भुटानमा ७ जनामा कोरोना भाइरसको संक्रमण पुष्टि भएको छ ।

विश्वव्यापी महामारीका रूपमा फैलिएको कोरोनाबाट हालसम्म ४० लाख ५० हजार मानिस संक्रमित भएका छन् । जसमध्ये १४ लाख ६० हजार निको हुँदा २ लाख ७७ हजार ४ सयको मृत्यु भएको छ ।

प्रकाशित मिति: शनिबार, वैशाख २७, २०७७ २१:१३