सबै क्याम्पसमा अनिवार्य अनलाइन ल्याबको माग

A+ A A-

सामुदायिक क्याम्पसमा अनिवार्य अनलाइनसम्बन्धी प्रयोगशाला (ल्याब) बनाएर अनलाइनबाटै पठनपाठनको व्यवस्था मिलाउन सरोकारवालाले सरकारसँग माग गरेका छन् ।

शिक्षा पत्रकार सञ्जाल नेपाल र नेपाल पब्लिक क्याम्पस संघले शुक्रबार संयुक्त रूपमा आयोजना गरेको ‘भर्चुअल मिटिङ’मा उनीहरूले यस्तो माग गरेका हुन् । कोभिड–१९ रोकथाम तथा नियन्त्रणका लागि जारी लकडाउन अवधिमा भइरहेको अनलाइन पढाई ‘देखावटी मात्र’ भएको उनीहरूको भनाइ थियो ।

संघका अध्यक्ष शिवराज सञ्जेलले धेरै क्याम्पसले अनलाइनबाट पढाउन कोसिस गरे पनि संरचना नहुँदा समस्या भएको बताए । उनले क्याम्पस मात्र होइन, सम्पूर्ण तहका शैक्षिक संस्थाले अनलाइनबाट पढाउन गरेको प्रयास सकारात्मक भए पनि पूर्ण नभएको धारणा व्यक्त गरे ।

‘राज्यले अब हरेक क्याम्पसमा अनिवार्य अनलाइन ल्याब राख्ने व्यवस्था गर्नुपर्छ । यसका लागि विश्वविद्यालय अनुदान आयोग तथा सम्बन्धित विश्वविद्यालयले सहयोगको पहल गर्नुपर्छ’, ललितपुरस्थित जनभावना क्याम्पसका प्राचार्यसमेत रहेका सञ्जेलले भने ।

संघकै पूर्वअध्यक्ष भोला ओझाले त्रिभुवन विश्वविद्यालयले अनलाइन माध्यमबाट पढाउन आंगिक क्याम्पसलाई निर्दशिका जारी गरे पनि सामुदायिकलाई भने बेवास्ता गरेको गुनासो गरे । ‘हामी पनि त्यही विश्वविद्यालयको सम्बन्धनमा सञ्चालित क्याम्पस हौँ’, कुलेश्वरस्थित जनमैत्री क्याम्पसका प्राचार्यसमेत रहेका ओझाले भने, ‘हामीले त्रिविको कुल विद्यार्थी भारको ३३ प्रतिशत बोकेका छौँ ।’

उनका अनुसार मुलुकभर ७ सय सामुदायिक क्याम्पस छन् । अधिकांश क्याम्पसले अनलाइन माध्यमबाट पढाई सञ्चालन गरिरहेको उनले बताए । तर, यी क्याम्पसका समस्या बुझिदिने र आवश्यक निर्देशन दिने अभिभावकको अभाव रहेको गुनासो उनले गरे ।

पोखराको जनप्रिय बहुमुखी क्याम्पसका प्रमुख वीरन्जी गौतमले अहिले अनलाइन कक्षाले करिब १० प्रतिशत विद्यार्थी मात्र समेटेको बताए ।

अनलाइन कक्षाका लागि अघि बढ्दा भविष्यमा विद्यार्थीलाई राम्रो पद्धति विकास हुने नवलपुरस्थित मध्यबिन्दु बहुमुखी क्याम्पसका प्रमुख मुक्ति पाण्डेको भनाइ थियो ।

प्रकाशित मिति: शनिबार, वैशाख २७, २०७७ १४:४३