सुदूरपश्चिमका यी ५ जना जसले कोरोनालाई जितेर घर फर्किए

A+ A A-

धनगढीस्थित सेती प्रादेशिक अस्पतालको आइसोलेसन वार्डमा उपचाररत सुदूरपश्चिम प्रदेशका पाँचजना संक्रमित निको भएर घर फर्किएका छन् । कारोना भाइरस (कोभिड–१९)लाई जित्दै अस्पतालबाट घर फर्किनेमा तीन पुरुष र दुई महिला छन् । घर फर्किने चार कैलालीका हुन् भने, अर्का एक कञ्चनपुरका हु्न् ।

धनगढीस्थित सेती प्रादेशिक अस्पतालमा उपचाररत कोरोना संक्रमित महिला कोरोनालाई जितेर शुक्रबार अस्पतालबाट घर फर्किए सँगै पाँचै जना कोरोना संक्रमित निको भएर घर फर्किएका छन्।

३५ दिनदेखि सेती अस्पतालमा उपचाररत धनगढी उपमहानगरपालिका–५ की ३४ वर्षीय महिलालाई शुक्रबार अस्पतालबाट डिस्चार्ज गरिएको सेती प्रादेशिक अस्पतालका सूचना अधिकारी दिलीपकुमार श्रेष्ठले बताए ।

सूचना अधिकारी श्रेष्ठका अनुसार उनको लगातार दुई पटक रिपोर्ट ‘नेगेटिभ’ आएपछि अस्पतालबाट डिस्चार्ज गरिएको हो । उनको ६ पटकसम्म गरीएको थ्रोट स्वाब परीक्षणमा कोरोना रिपोर्ट पोजेटिभ आएकोमा पछिल्लो दुई पटक गरिएको परीक्षणमा रिपोर्ट नेगेटिभ आएको हो। चैत २२ गते उनमा पहिलो पटक कोरोना भाइरस पुष्टि भएको थियो ।

यी हुन यसअघि निको भएर घर गएका संक्रमित

कैलालीको लम्कीका कोरोना संक्रमित युवक निको भएर अस्पतालबाट डिस्चार्ज भएका थिए। लम्कीचुहा नगरपालिका–९ प्रतापपुरका २१ वर्षीय राज विक १६ दिन अस्पताल बसेपछि कोरोनालाई जितेर गत घर फर्किएका थिए ।

भारतबाट आएका लम्कीचुहा नगरपालिका–९ प्रतापपुरका ती युवकमा चैत २२ गते पिसिआरबाट कोरोना संक्रमणको पुष्टि भएको थियो । दोस्रो र तेस्रो रिपोर्ट नेगेटिभ आएपछि उनलाई डिस्चार्ज गरिएको थियो। उनी भारतको मुम्बईबाट चैत ११ गते नेपाल फर्किएका हुन् ।

उनलाई लम्की बहुमुखी क्याम्पसको क्वारेन्टाइनमा राखिएको थियो। कोरोना देखिएको १६ दिनमा उनी डिस्चार्ज भएका हुन् । उनी कैलालीको गौरीफन्टा नाका भएर घर फर्किएका थिए ।

यसैगरी कैलालीको धनगढीका युवक ३० दिनमा कोरोनालाई जितेर घर फर्किएका थिए । धनगढी उप–महानगरपालिका–५ का ३४ वर्षीय अमृत शाही ३० दिन अस्पताल बसेपछि कोरोनालाई जितेर फर्किएका हुन् ।

लगातार दुई पटकसम्म कोरोना परीक्षण रिपोर्ट ‘नेगेटिभ’ आएपछि उनलाई अस्पतालले डिस्चार्ज गरेको थियो । दुबईबाट भारतको राजधानी नयाँ दिल्ली हुँदै नेपाल आएका उनमा चैत १४ गते कोरोना संक्रमण पुष्टि भएको थियो ।

तीनपटक परीक्षण गर्दासम्म उनमा कोरोना रिपोर्ट ‘पोजेटिभ’ देखाएको थियो । त्यसपछि दुईपटकसम्म ‘नेगेटिभ’ ३० दिनसम्म अस्पतालमा उपचार गराएपछि निको भएर डिस्चार्ज भएका थिए ।

कोरोनालाई जितेर घर फर्किएकाहरु मध्ये कैलालीको लम्कीचुहा नगरपालिका–१ भुरुवाकी ६१ वर्षीया पानादेवी विक पनि एक हुन् । उनको पनि लगातार दुई पटक रिपोर्ट ‘नेगेटिभ’ आएपछि अस्पतालबाट डिस्चार्ज गरिएको थियो ।

उनी वीरगञ्जबाट आएर १२ दिन क्वारेन्टाइनमा बसेकी थिइन् भने चैत २२ गते कोरोना पुष्टि भएको थियो । लम्कीचुहा बहुमुखी क्याम्पसको क्वारेन्टाइनमा राखिएकी ती महिलाको र्‍यापिड टेष्टमा नेगेटिभ देखिए पनि राष्ट्रिय जनस्वास्थ्य प्रयोगशाला काठमाडौंमा परीक्षण गर्दा कोरोना पोजेटिभ देखिएको थियो ।

यस्तै, कञ्चनपुरको बेदकोट नगरपालिकाका ४१ वर्षीय इन्द्र बिकले पनि कोरोनालाई जितेर घर फर्किएका थिए । तेस्रो र चौथो रिपोर्ट ‘नेगेटिभ’ आएपछि उनलाई पनि वैशाख १० गते अस्पतालबाट डिस्चार्ज गरिएको थियो।

चैत १३ गते उत्तराखण्डबाट फर्किएका उनलाई कोरोना संक्रमण देखिएपछि चैत २२ गते सेती प्रादेशिक अस्पतालमा भर्ना गरिएको थियो। उनी १९ दिनको बसाइँपछि घर फर्किएका थिए ।

प्रकाशित मिति: शनिबार, वैशाख २७, २०७७ ११:५७