वैैशाखभित्र नतिजा प्रकाशन गर्न विद्यालयलाई निर्देशन

A+ A A-

लकडाउनले पठनपाठन र विद्यालय ठप्प भएको बेला पोखरा महानगरपालिकाले विद्यालयलाई वार्षिक परीक्षाको परीक्षाफल प्रकाशन गर्न निर्देशन दिएको छ ।

महानगरले समय सीमा तोकेर यस अघि विद्यालयहरूले लिइसकेको परिक्षाको परीक्षाफल वैशाखभित्र प्रकाशन गर्न निर्देशन दिएको हो ।

विद्यार्थी र अभिभावकमा नयाँ शैक्षिक सत्र सुरू भइसकेको अवस्थामा समेत अघिल्लो वर्षको वार्षिक परीक्षाको नतिजा प्रकाशन नहुँदा अन्योल सिर्जना भएकाले तत्काल नतिजा प्रकाशन गर्न निर्देशन दिइएको महानगरपालिका शिक्षा महाशाखा प्रमुख गंगाबहादुर गुरुङले बताए ।

गुरुङका अनुसार कक्षा ८ को नगरस्तरीय परीक्षाको नतिजा २९ गते भित्र सार्वजनिक गर्ने तयारी भइरहेको छ । कक्षा ८ को परीक्षा नतिजा प्रकाशनबारे निर्णय नभए पनि तत्काल बैठक बसेर सार्वजनिक गर्ने उनले बताए ।

तत्कालै परीक्षाको नतिजा प्रकाशन भए पनि नयाँ पाठ्यापुस्तक पाउने सम्भावना नभएकाले पुराना पाठ्यपुस्तकबाट अध्ययन गर्न महानगरले आग्रह गरेको छ । ‘तत्काल नयाँ पाठ्यपुस्तक पाउने अवस्था नभएकाले विद्यालयले माथिल्लो कक्षा उत्तीर्ण हुने विद्यार्थीको पुरानो पाठ्यपुस्तक प्रयोग गरी अध्ययन गर्ने व्यवस्था मिलाउन अनुरोध छ,’ महानगरले जारी गरेको सूचनामा उल्लेख छ ।

विद्यार्थीको भर्ना प्रक्रिया भने संघ सरकारको निर्देशनपछि मात्र थालिने शिक्षा महाशाखा प्रमुख गुरुङले बताए । ‘तत्कालै भर्ना प्रक्रिया सुरू गर्न संघ सरकारले भनेकाले अर्को निर्देशन नआएसम्म भर्ना नथाल्न विद्यालयलाई भनेका छौं’ उनले भने । पोखरामा २ सय ७ वटा सामुदायिक र १ सय ७९ निजी विद्यालय छन् ।

प्रकाशित मिति: शुक्रबार, वैशाख २६, २०७७ २०:३६