स्वास्थ्यकर्मीलाई मुख्यमन्त्री शाहीको आग्रहः उच्च मनोबलका साथ काम गर्नुहोस्

स्वास्थ्यकर्मीलाई मुख्यमन्त्री शाहीको आग्रहः उच्च मनोबलका साथ काम गर्नुहोस्

फाइल तस्वीर

A+ A A-

कर्णाली प्रदेशका मुख्यमन्त्री महेन्द्रबहादुर शाहीले कोरोना विरुद्धको लडाइँमा उच्च मनोबलका साथ सहभागी हुन चिकित्सकलाई आग्रह गरेका छन् ।

सोमबार कर्णाली प्रदेश अस्पताल सुर्खेतमा पुगेर मुख्यमन्त्री शाहीले चिकित्सकसँग अन्तरक्रिया गर्दै कोरोना विरुद्धको लडाइँ जित्न चिकित्सकहरूको महत्वपूर्ण भूमिका रहेको बताए ।

प्रदेश सरकार, स्वास्थ्यकर्मी, सुरक्षाकर्मी, सञ्चारकर्मी लगायत सबै नागरिकको उच्च सावधानी सहितको भूमिकाले कर्णाली प्रदेशमा कोरोना भाइरसका फैलिन नपाएको बताउँदै मुख्यमन्त्री शाहीले अबको चुनौतीलाई सामना गर्न स्वास्थ्यकर्मीहरूको भूमिका निर्णायक हुने बताए ।

‘सशस्त्र युद्धको अग्रमोर्चामा सिपाहीको जस्तो भूमिका कोरोना विरुद्धको लडाइँमा तपाइहरूको छ’ उनले चिकित्सकलाई भने, ‘तपाइहरू उच्च मनोबलका साथ आफ्नो भूमिका पूरा गर्नुस् ।’

कोरोनाले निम्त्याएको संकट समाधान गर्न प्रदेश सरकारले विशेषज्ञ चिकित्सक, स्वास्थ्यकर्मीको टोली गाउँगाउँमा पठाउने निर्णय गरेको बताउँदै मुख्यमन्त्री शाहीले हरेक वडामा पुगेर जनचेतना निर्माण, कोरोना परीक्षण लगायतको काम गर्न निर्देशन दिए ।

उनले कोरोना परीक्षणलाई व्यापक बनाउनुपर्ने बताउँदै लकडाउनपछि फरकफरक ठाउँबाट भित्रिएका नागरिकहरूको प्रतिनिधित्व हुने गरि स्वाब संकलन गरेर कोरोना परीक्षण तीव्र बनाउने बताए ।

प्रदेश प्रवेश गर्ने नाकाहरूमा अझै पनि लकडाउनलाई कडाई गर्नुपर्ने बताउँदै मुख्यमन्त्री शाहीले प्रदेशभित्र परीक्षण पश्चात् कोरोना देखिएको क्षेत्रलाई सिल गर्ने तथा नदेखिएको क्षेत्रमा लकडाउनलाई खुकुलो बनाउन सकिने धारणा राखे ।

चिकित्सकहरूले राखेका जिज्ञासाको जवाफ दिँदै उनले स्वास्थ्यकर्मीहरूको लागि प्रदेश सरकार गम्भीर रहेको बताए ।

मुख्यमन्त्री शाहीले स्वास्थ्यकर्मीलाई प्रदेश सरकारले निराश हुन नदिने भन्दै स्वास्थ्यकर्मीका लागि व्यक्तिगत सुरक्षा सामग्री र प्रोत्साहन भत्ताको व्यवस्थापन गरिएको बताए ।

प्रकाशित मिति: शुक्रबार, वैशाख २६, २०७७ २०:०८