लकडाउन पालना गराउन ड्रोन गस्ती

A+ A A-

कञ्चनपुरको भीमदत्त नगरपालिकामा लकडाउन पालना गराउन ड्रोन गस्ती सुरू गरिएको छ । भीमदत्त नगरपालिकाका १९ वटै वडामा ड्रोन गस्ती गरी लकडाउनको निगरानी बढाइएको छ ।

रोबोटिक एसोसिएशन आफ नेपाल इञ्जिनिरिङ र नगरपालिकाबीच लकडाउन निगरानीका लागि ड्रोन गस्ती गर्ने सम्झौताअनुसार आजदेखि ड्रोन गस्ती सुरू गरिएको हो ।

नगर प्रमुख सुरेन्द्र विष्टले नगर क्षेत्रमा लकडाउन पालनाको अवस्थाबारे जानकारी लिन ड्रोन गस्ती सुरू गरिएको बताए । उनले लकडाउन उल्लंघन गरिएको पाइएमा तत्कालै निर्देशनसमेत दिइने बताए ।

कोरोना भाइरस रोकथामका लागि पूरै नगर लकडाउन गरिएको छ । नगरपालिकामा लकडाउन पालना भए नभएको के छ भनेर ड्रोनबाट जानकारी लिन सुरू गरिएको नगर प्रमुख विष्टले जानकारी दिए । उनले भने, ‘कही कतै उल्लंघन गरिएको पाइएमा तत्काल पालना गराउन निर्देशनसमेत दिन्छौँ ।’

ड्रोन गस्तीका आधारमा लकडाउन पालनालाई प्रभावकारी बनाउन स्थानीय प्रशासनसित सहकार्य र समन्वयको कार्य गरिएको नगर प्रमुख विष्टले बताए ।

गस्तीका क्रममा नगरपालिकाका कुनै स्थानमा भीडभाड देखिएमा ड्रोनबाटै हट्न निर्देशन दिइने र सूचना प्रवाहसमेत गरिने भएको छ । रोबोटिक एसोसिएशन आफ नेपाल इञ्जिनिरिङका सुदूरपश्चिम शाखाका अध्यक्ष दीपक विष्टले नगरपालिकासित गरिएको सम्झौताअनुसार ड्रोन गस्ती गरी लकडाउनको अवस्थाबारे जानकारी लिने कार्य थालिएको बताए ।

ड्रोन गस्तीबाट लकडाउन निगरानीमा सुदूरपश्चिमाञ्चल विश्वविद्यालय इञ्जिनियरिङ संकायका विद्यार्थीले समेत सहयोग गरेका छन् ।

सुदूरपश्चिमाञ्चल विश्वविद्यालयका इञ्जिनियरिङ सङ्कायका विद्यार्थी लोचन कार्कीले ड्रोन गस्तीले नगरपालिकामा लकडाउन पालना प्रभावकारी बनाउन सहयोग पुग्ने बताए । नगरपालिकामा ५ दिनसम्म ड्रोन गस्ती गरिने बताइएको छ ।

प्रकाशित मिति: शुक्रबार, वैशाख २६, २०७७ १९:५९