नेपाल अमेरिका अन्तर्राष्ट्रिय चलचित्र महोत्सवको तयारी

A+ A A-

अमेरिकाको राजधानी वासिङ्गटन डिसी क्षेत्रमा आमगी जुन महिनाको २८ देखि हुने ‘नेपाल अमेरिका अन्र्तराष्ट्रिय चलचित्र महोत्सव २०१९’ को तीव्र तयारी भइरहेको छ ।

तीन दिनसम्म चल्ने उक्त महोत्सवका लागि संसारभरबाट आवेदन दिएका विभिन्न विधाका चलचित्रहरुको आइरहेको र अहिले चलचित्र छनौट गर्न थालेको आयोजक नेपाल अमेरिका फिल्म सोसाइटीका अध्यक्ष एवं महोत्सवका निर्देशक पूर्णसिंह बराइलीले जानकारी दिए ।

उनले महोत्सव नेपाली डायस्पोरा समुदायको चलचित्र संस्कृतिसम्बन्धि साझा मञ्चको रुपमा स्थापित गराउने लक्ष्यले महोत्सव आयोजना गर्न लागिएको छ ।

नेपाल र अमेरिकाको कला, संस्कृति र ज्ञानलाई चलचित्रको माध्यमबाट जोड्ने लक्ष्यका साथ स्थापित नेपाल अमेरिका फिल्म सोसाइटीले अमेरिकामा पहिलोपटक यस्तो महोत्सव आयोजना गर्न लागेको हो ।

महोत्सवमा मूलतः नेपालका फिचर फिल्म, वृत्तचित्र, छोटा चलचित्र, एनिमेशनका साथै सबै विधाका चलचित्रहरु प्रदर्शन गरिनेछ । नेपालबाहेक दक्षिण एसिया, अमेरिका सहित विश्वभरी बनेका चलचित्रहरु समेत महोत्सवमा समावेश गरिने निर्देशक बराइलीले जानकारी दिए ।

चलचित्र प्रदर्शनपछि चलचित्रबारे दर्शक र चलचित्र निर्माता÷निर्देशक तथा कलाकारसँग छलफल कार्यक्रम पनि आयोजना गरिन उनले बताए ।

महोत्सवमा नेपाली डायस्पोरा र चलचित्र जस्ता विभिन्न विधामा विषयगत छलफल तथा कार्यशालाहरुको पनि आयोजना हुनेछ । प्रतिष्पर्धाका लागि छानिएका उत्कृष्ट चलचिहरुलाई पुरस्कृत गरिने छ ।

सोसाइटीले चलचित्र प्रदर्शनीका साथसाथै आप्रवासी समुदायलाई लक्षित गरी चलचित्र सम्बन्धी तालिम कार्यशाला, कला संस्कृतिबारे छलफल र चलचित्र महोत्सव जस्ता गतिविधिहरु सञ्चालन पनि सुरु गरेको बराइलीले बताए ।

महोत्सव अमेरिकामा रहेका नेपाली डायस्पोरा संघ संस्था तथा व्यक्तिहरु, नेपाल लगायत विभिन्न देशका चलचित्रसँग नजिक रहेका संघ संस्था र महोत्सवहरुसँगको सहकार्यमा आयोजना गरिनेछ । महोत्सवमा सहभागिताका लागि नेपाली र आप्रवासी चलचित्रकर्मी लगायत विश्वभरिका सम्पूर्ण चलचित्रकर्मीहरुलाई महोत्सवलाई भव्य रुपमा सफल पार्न आयोजक संस्थाले अनुरोध गरेको छ ।

प्रकाशित मिति: सोमबार, माघ १४, २०७५ १७:४९