किट अभावले सुदूरपश्चिममा कोरोना परीक्षण ठप्प

A+ A A-

सुदूरपश्चिम प्रदेशमा कोरोना परिक्षणको लागि अत्यावश्यक सामग्रीको अभाव भएपछि परीक्षण रोकिएको छ । कोरोना परीक्षणका लागि आवश्यक किट र केमिकलको अभावका कारण बिहीबारबाट परीक्षण नै ठप्प भएको हो ।

किट अभावका कारण थ्रोट स्वाब संकलन गरिएका ५० बढिको नमूना परीक्षण गर्न समस्या भइरहेको छ । सुदूरपश्चिम प्रदेशमा पिसीआर मेसिनबाट धनगढीका दुई ठाँउबाट कोरोना परीक्षणको व्यवस्था मिलाइएको छ । तर, परीक्षणका लागि अत्यावश्यक किट र केमिकलका कारण बिहीबारबाट परिक्षण रोकिएको छ ।

गएराति ४ जनाको परीक्षण गरिए पनि बिहीबार भने परिक्षण नै नगरिएको सेती प्रादेशिक अस्पतालका प्रवक्ता डाक्टर जगदिश जोशीले बताए । दैनिक २ सय ७० बढीको परीक्षण गर्ने क्षमताको मेसिन र जनशक्ती हुँदा पनि सुस्त अवस्थामा रहेको कोरोना परीक्षण अब भने बन्द नै भएको छ ।

बुधवारसम्म सुदूरपश्चिम प्रदेशमा पिसिआर र आरडीटी दुवै परीक्षण १७ हजार ४ सय ४७ जनाको मात्रै कोरोना परिक्षण भएको छ । तर, अब भने सामग्री अभावका कारण परीक्षण नै रोकिएको सुदूरपश्चिमका स्वास्थ्य निर्देशक डाक्टर गुणराज अवस्थीले बताए । प्रदेशभर ९ हजार १ सय ४२ जना क्वारेन्टाइनमा रहेको उनले जानकारी दिए ।

पीसीआर किटको मौज्दात भए पनि आरएनए एक्पेक्सन किट सकिएपछि परीक्षण बन्द भएको प्रयोगशालाले जनाएको छ । अत्यावश्यक परीक्षणका लागि १० वटा किट भने राखिएको छ । किट नभएपछि थ्रोट स्वाब संकलन गरिएका ५० बढिको अहिले सम्म नमूना परीक्षण गर्न सकिएको छैन् । किटको अभाव भएपछि सेती प्रादेशिक अस्पताल धनगढीमा उपचारपछि निको भएर घर फर्केका ३ जना बिरामीको पुनः परीक्षणसमेत गर्न सकिएको छैन् । डिस्चार्ज भएर गएकाहरूको स्वास्थ्य परीक्षण गर्नैपर्ने स्वास्थ्य निर्देशक अवस्थीले बताए ।

पीसीआर बिधिबाट कोरोना परीक्षण गर्दा पीसीआर किट र आरएनए एक्पेक्सन किट आवश्यक हुने गरेको छ । किटको मौज्दात सकिएपछि धनगढी प्रयोगशालामा कोरोना परीक्षण बन्द भएको हो । किट अभाव संकलित नमूनाको समेत परीक्षण रोकिएपछि शंकास्पदको नमूना संकलन समेत अहिलेलाई बन्द गरिएको छ ।

तर, सुदूरपश्चिम प्रदेश सरकारले भने सामग्री अभावकै कारण परीक्षण रोकिन नदिने दावी गरेको छ । सामाजिक विकास मन्त्री कृष्णराज सुवेदीले अत्यावश्यक सामग्रीको ठेन्डर भइसकेकाले आउने क्रममै रहेको बताए ।

धनगढीको पशु अन्वेषण प्रयोगशालामा स्थापना गरिएको आरटी–पीसीआर मेसिनमार्फत हुने कोरोना परीक्षण बन्द भएको हो । यसअघि सुदूरपश्चिम प्रदेशमा स्वाब राख्ने भाडो भीटीएमको अभाव हुँदा परीक्षण प्रभावित भएको थियो । यस्तो संकटका बेला कोरोना परीक्षण नै बन्द भएपछि झनै जोखिम बढाएको छ ।

प्रकाशित मिति: बिहीबार, वैशाख २५, २०७७ १७:५८